“Astana Media Week 2025” regionun media peşəkarlarını bir araya gətirəcək
Astana, 3 noyabr, AZƏRTAC
Noyabrın 5-dən 7-dək Qazaxıstan paytaxtında “Astana Media Week 2025” tədbiri keçiriləcək. Bu forumda sənaye mütəxəssisləri, beynəlxalq platformalar və dövlət rəsmiləri ilin mövzusu olan “Millətə xidmət - medianın missiyası” ətrafında bir araya gələcəklər.
AZƏRTAC Qazaxıstan Mədəniyyət və İnformasiya Nazirliyinə istinadla xəbər verir ki, üçgünlük tədbirdə plenar və panel müzakirələri, açıq mühazirələr, qapalı təqdimat sessiyaları, aparıcı qlobal və regional media mütəxəssislərinin praktiki ustad dərsləri keçiriləcək.
İştirakçılar arasında jurnalistlər, redaktorlar, regional media qurumlarının, mətbuat xidmətlərinin və PR agentliklərinin nümayəndələri, blogerlər, analitiklər, prodüserlər, məzmun menecerləri və jurnalistika fakültələrinin tələbələri olacaq.
“Astana Media Week 2025” illər ərzində Qazaxıstanda və regionda media sahəsi üçün əsas böyümə nöqtəsinə çevrilib. Bu tədbir peşəkar icmalar, tənzimləyici orqanlar və beynəlxalq platformalar arasında dialoqu asanlaşdırıb. 2025-ci il forumu jurnalistikanın gələcəyi, etik standartlar, rəqəmsal müstəqillik və ictimai birliyin gücləndirilməsində medianın rolu mövzularında müzakirələr üçün faydalı məkanı təmin edəcək.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
