Astanada gənc dini liderlərin II Forumu keçirilib
Astana, 18 sentyabr, AZƏRTAC
Dünya və Ənənəvi Dinlərin Liderlərinin VIII Astana Qurultayı çərçivəsində Astanada gənc dini liderlərin II Forumu keçirilib. Tədbir müxtəlif konfessiyaların, beynəlxalq təşkilatların və ekspert icmasının nümayəndələrini bir araya gətirib.
AZƏRTAC xəbər verir ki, forum “Gənclər sülh şəraitində birgəyaşayış naminə: gələcək üçün sinerji” mövzusunda keçirilib. Tədbir onlarla ölkədən gənc ruhani liderləri bir araya gətirərək, onlara əsas müasir çağırışlar üzrə təcrübə və perspektivlər mübadiləsi üçün unikal imkan yaradıb.
Forumun keçirilməsi təşəbbüsü 2022-ci ildə baş tutan VII Qurultayda irəli sürülüb və Dünya və Ənənəvi Dinlərin Liderləri Konqresinin 2023-2033-cü illər üçün İnkişaf Konsepsiyasında öz əksini tapıb. Onun məqsədi gənc liderlər arasında dialoq üçün daimi beynəlxalq platforma yaratmaq, tolerantlığı, qarşılıqlı hörməti və mənəvi dəyərləri qlobal şəkildə təbliğ etməkdir.
Forum zamanı iştirakçılar sülhün möhkəmləndirilməsində, dini və mədəni zəmində münaqişələrin qarşısının alınmasında gənclərin rolunu müzakirə ediblər. Din və müasir texnologiyanın qarşılıqlı əlaqəsinə, ekstremizmə qarşı mübarizəyə, müxtəlif icmalar arasında etimadın yaradılmasına xüsusi diqqət yetirilib.
Tədbirin sonunda gənc liderlərin həmrəylik və qarşılıqlı anlaşmaya əsaslanan ədalətli və təhlükəsiz gələcəyin qurulmasına fəal töhfə verməyə hazır olduqlarını ifadə edən birgə müraciət qəbulu olunub.
AZƏRTAC-ın xüsusi müxbiri
Astana
Bölmənin digər xəbərləri
