ASTARA QAZ-KOMPRESSOR STANSİYASI İLƏ TANIŞLIQ
AZƏRTAC-ın müxbiri xəbər verir ki, Azərbaycan Prezidenti İlham Əliyev sentyabrın 8-də Astara Qaz-kompressor stansiyasında olmuşdur. Dövlətimizin başçısını burada çalışan fəhlələr böyük hörmətlə qarşıladılar.
“Azəriqaz” QSC-nin sədri Əlixan Məlikov stansiyanın texniki-iqtisadi göstəriciləri barədə Azərbaycan Prezidentinə məlumat verərək bildirdi ki, Astara Qaz-kompressor stansiyasının tikintisinə 2004-cü ilin dekabrında başlanmışdır. Bildirildi ki, tikinti ilə bağlı müsabiqədə Ukraynanın Sumı Maşınqayırma Elm-İstehsalat Birliyi qalib gəlmişdir. Tikintidə əsas işləri onlar görürlər. Obyekt istifadəyə veriləndən sonra burada 50 nəfər daimi işlə təmin olunacaqdır. Stansiyanın əsas funksiyası İran İslam Respublikasına ötürüləcək qazın təzyiqini 12 atmosferdən 55 atmosferə qaldırmaqdır. Onun ümumi gücü sutkada 3 milyonkubmetr olacaqdır. Stansiya istifadəyə verildikdən sonra cənub bölgəsinin qazla təminatında problem olmayacaqdır.
Prezident İlham Əliyev regional qaz şəbəkəsinə baxdı. Stansiyada quraşdırılan nasosların, qurğuların, qəbuledici və ötürücü kompressorların iş prinsipi ilə maraqlandı, İrandan Naxçıvana qaz verilməsinin böyük əhəmiyyət kəsb etdiyini vurğuladı.
Sumı maşınqayırma birliyi idarə heyətinin sədri VLADİMİR LUKYANENKO Prezident İlham Əliyevə müraciətlə dedi ki, mən Sizi Sumı maşınqayıranları, Ukrayna nümayəndələri adından salamlamaq istəyirəm. Fəxr edirəm ki, Moskvada dahi Heydər Əliyeviçin rəhbərliyi altında işləmişəm. Biz Azərbaycanın nail olduğu çox böyük uğurları heyranlıqla izləyirik. Ukrayna ilə Azərbaycan arasındakı dostluqdan qürur duyuruq. Fürsətdən istifadə edərək, cənab Məlikova və onun mütəxəssislərinə, Azərbaycan inşaatçılarına, dostlarımıza təşəkkürümü bildirmək istəyirəm. Onlar stansiyanın tikintisi ilə əlaqədar bizə Bakıda da, burada da kömək göstərmişlər.
Siz bütün xalq tərəfindən seçilmiş Prezidentsiniz. Bizim Ukraynada gürz bütün dövrlərdə hakimiyyət rəmzi olubdur. Ona görə də mən bu hakimiyyət rəmzini Ukrayna nümayəndə heyəti adından Sizə təqdim edirəm və Sizə, Azərbaycan xalqına firavanlıq, xoşbəxtlik, sülh və tərəqqi arzulayıram. Biz isə həmişə Sizinlə çiyin-çiyinə olacaq, kömək edəcək və əməkdaşlığımızı inkişaf etdirəcəyik.
Prezident İLHAM ƏLİYEV təşəkkürünü bildirərək dedi: Belə həcmdə işləri qısa müddətdə və dünya standartlarına cavab verən yüksək səviyyədə yerinə yetirdiyinizə, Azərbaycanın qaz şəbəkəsi üçün çox böyük əhəmiyyəti olan bu kompressor stansiyasını tikdiyinizə görə sizə çox minnətdaram. Bu stansiya vasitəsilə qaz yüksək təzyiqlə vurulacaqdır. İran Naxçıvan üçün qaz alacaqdır. Lakin bununla yanaşı, Azərbaycanın cənub bölgəsi də qazla təmin ediləcəkdir. Bizim buna ehtiyacımız var. Bilirəm ki, bu, Azərbaycanla çox uğurlu əməkdaşlıq sahəsində ilk təcrübə deyildir. Ona görə də təşkilatlarımız arasında və əlbəttə ki, ölkələrimiz arasında əməkdaşlığın daha da genişlənəcəyinə ümid bəsləyirəm. Bir sözlə, belə müştərək layihənin tez, keyfiyyətlə başa çatmasına çox şadam.
Prezident İlham Əliyev daha sonra Ukrayna nümayəndələri ilə xatirə şəkli çəkdirdi, onlara və yerli mütəxəssislərə işlərində uğurlar arzuladı.
Bölmənin digər xəbərləri
