Astaralı müəllimdən buraxılış imtahanları üçün faydalı olacaq mobil tətbiq
Astara, 13 aprel, Bağır Əliyev, AZƏRTAC
Təhsil Nazirliyinin həyata keçirdiyi “Təhsildə inkişaf və innovasiyalar üzrə 4-cü qrant müsabiqəsi”ndə qalib olmuş “OrdEng” tətbiqi - ingilis dili fənnindən buraxılış imtahanlarına hazırlıq və özünüyoxlama aplikasiyası” layihəsinin icrası başa çatıb.
Layihə rəhbəri, Astara şəhər M.Ə.Sabir adına 1 nömrəli tam orta məktəbin ingilis dili müəllimi Babək Rzazadə AZƏRTAC-ın bölgə müxbirinə bildirib ki, artıq aplikasiya həm “Android”, həm “IOS” istifadəçiləri üçün istifadəyə hazırdır.
Layihənin məqsədi şagirdlərin buraxılış imtahanlarında ingilis dili fənnindən test işləmə, oxuyub-anlama, dinləyib-anlama üzrə hazırlığına dəstək olacaq resurs yaratmaq və ölkəmizdə distant təhsilə töhfə verməkdir.
Qeyd olunub ki, aplikasiya 6 ay müddətində hazırlanaraq başa çatdırılıb. Hazırda “Android” və “IOS” platformalarından istifadə edən bütün smartfon istifadəçiləri üçün tətbiq əlçatımlı və ödənişsizdir. Sadəcə “OrdEng” açar sözünü daxil edərək bir klikdə applikasiyanı endirmək və istifadə etmək mümkündür.
Tətbiqdə istifadəçilər ingilis dili fənnindən buraxılış imtahanlarına (IX və XI siniflər) hazırlaşa, test vərdişlərini, oxuyub-anlama, dinləyib-anlama bacarıqlarını inkişaf etdirə bilirlər.
Layihə müddətində peşəkar səviyyədə 1050 açıq və qapalı test, 75 oxuyub-anlama üzrə mətn (hər mətn üçün 8 sual - 4 açıq, 4 qapalı olmaqla), 75 dinləmə üzrə mətn (hər mətn üçün 6 sual - 3 açıq, 3 qapalı olmaqla) hazırlanıb. Buradakı testlər hər hansı bir test kitabında və yaxud vəsaitdə istifadə olunmayıb, tam orijinal testlərdir.
İT proqramçı tərəfindən həm “Android”, həm də “IOS” platformaları üçün aplikasiya kodlaşdırılıb, applikasiyanın veb-dizaynı edilib, müvafiq test, mətn və səsləndirmələr tətbiqə yüklənib və tətbiq sınaqdan keçirilib.
“OrdEng” tətbiqi şagirdlərin ingilis dili fənnindən dinləyib-anlama və oxuyub-anlama vərdişlərinə asan şəkildə yiyələnməsinə imkan yaradır.
Hazırda ölkənin istənilən bölgəsindən olan şagirdlər bu proqrama daxil olmaqla mətnləri dinləyib testləri həll edə və testin sonunda elə yerindəcə cavablarını yoxlaya bilərlər. Test işləməklə onlar öz xarici dil bacarıqlarını inkişaf etdirə, hər sınaq imtahanında öz nəticələrini yüksəltmək imkanı əldə edə bilərlər. Şagirdlər, həmçinin bu tətbiqdən istifadə edərək ingilis dilində oxuyub-anlama və dinləyib-anlama bacarıqlarını artıra bilərlər.
Bu tətbiq müəllim, valideyn və şagirdlər üçün əlçatan, yığcam və uyğun bir aplikasiyadır. Şagirdlər repetitor yanına getmədən, heç bir müəllimə ehtiyac olmadan, müstəqil şəkildə öz bilik və bacarıqlarını artıra bilər, eyni zamanda heç bir maliyyə xərcləmədən öz oxuyub-anlama və dinləyib-anlama bacarıqlarını inkişaf etdirərlər.
Bu tətbiqdən təkcə buraxılış sinif şagirdləri yox, bütün yuxarı sinif şagirdləri və müəllimlər də istifadə edə bilər. Müəllimlər üçün də bu əlavə bir resursdur. Şagirdlər dinləmə və oxuma bacarıqlarından savayı danışıq səviyyələrində də inkişafa nail ola bilərlər.
Bölmənin digər xəbərləri
