“ATAHOLDİNQ” ŞİRKƏTLƏR QRUPU MƏSLƏHƏT ŞURASININ SƏDRİ ƏHMƏD ERENTOKUN ÇIXIŞI
- Möhtərəm cənab Prezident!
Hörmətli qonaqlar, xanımlar və cənablar!
Bu əlamətdar gündə “Excelsior” hotelində sizləri görməkdən məmnunluq duyur, özümü həddən artıq xoşbəxt hiss etdiyimi bildirmək istəyirəm.
“AtaHoldinq” şirkətlər qrupunun investisiyası ilə inşa edilən və onun tərəfindən idarə ediləcək “Excelsior” hotelinin açılış mərasimində iştirak etdiyinizə görə hamınıza dərin minnətdarlığımı bildirirəm.
“AtaHoldinq” şirkətlər qrupu maliyyə, sənaye, kənd təsərrüfatı, inşaat, turizm və xidmət sahələrində fəaliyyət göstərir. 17 şirkəti və 1000-dən artıq işçisi olan “AtaHoldinq” şirkətlər qrupu “Deloitte Touche”, MRI kimi dünyanın ən aparıcı audit şirkətlərinin keçirdiyi yoxlamaların nəticələrinin də göstərdiyi kimi, şəffaf və imici yüksək imicə malik qurumdur və daha da inkişaf edərək, Azərbaycan iqtisadiyyatında özünəməxsus yer tutmaqdadır.
Bu gün cənab Prezidentimiz tərəfindən açılan “Excelsior” hoteli beynəlxalq səviyyədə ən keyfiyyətli hotellərlə rəqabətə girmək qabilliyyəti ilə yanaşı, “Aura” sağlamlıq mərkəzi də daxil olmaqla, dünyada bənzəri olmayan və yeganə sayıla biləcək bir layihədir. 3 il bundan əvvəl düşündüyümüz və doğrudan da gərgin əmək sərf edilmiş bu layihəyə ən böyük hədiyyə cənab Prezidentimizin açılış mərasimində şəxsən iştirak etməsi və öz xeyir-duasını verməsidir.
İnşallah, 2006-cı ildə Londonda keçiriləcək “Qızıl açar” müsabiqəsində 5 nominasiya üzrə - ən yaxşı dizayna malik hotel, ən yaxşı dizayna malik adi otaq, ən yaxşı dizayna malik lüks otaq, ən yaxşı dizayna malik Prezident otağı, ən yaxşı dizayna malik sağlamlıq mərkəzi nominasiyalarında “Excelsior”un namizədliyi irəli sürüləcək və ümidvarıq ki, ikinci hədiyyəni də alacaq, Azərbaycana mükafatla qayıdacağıq. Bu mükafatı Azərbaycan üçün alacaq, Azərbaycana hədiyyə edəcəyik. Bundan əlavə, hotelimiz Dünya Lider Hotellər Assosiasiyasına üzv olacaq, Azərbaycanın turizm potensialını dünyaya tanıdacaqdır.
Bu günə qədər gördüyümüz və bundan sonra görəcəyimiz işlərin təməlində Azərbaycan xalqının ümummilli lideri Heydər Əliyev siyasətinə, bu siyasəti uğurla davam etdirən cənab Prezidentə inamımız durur. Biz Azərbaycanda gələcəyin Azərbaycanla gələcəyinə inanırıq. Əminik ki, önümüzdəki illər ərzində Azərbaycan dünyada güclü, regionda isə lider bir ölkəyə çevriləcəkdir. “AtaHoldinq” şirkətlər qrupunun və Azərbaycan Türkiyə İş Adamları Birliyinin rəhbəri kimi həmişə dediyim bir sözü təkrarlamaq istəyirəm: Biz iş adamları üçün ən vacib amil iqtisadi sabitlik və onun əsasını təşkil edən siyasi sabitlikdir. Mərhum Prezidentimiz Heydər Əliyevin Azərbaycanda bərqərar etdiyi siyasi sabitlik nəticəsində yaranmış iqtisadi sabitlik cənab Prezidentimiz tərəfindən verilən fərman və sərəncamlar, təsdiq edilən qanunlar və dövlət proqramları ilə daha da möhkəmlənmiş, dönməz olmuşdur.
Möhtərəm cənab Prezident, Siz həyata keçirdiyiniz beynəlxalq səfərlər və gərgin iş rejimi şəraitində iş adamlarını yaddan çıxarmır, onlara diqqət və qayğınızı əsirgəmirsiniz. Məhz bunun nəticəsidir ki, Azərbaycandakı iqtisadi inkişaf bütün regionda və paytaxt Bakıda özünü göstərməkdədir. Bu inkişafı görməmək üçün “kor”, başa düşməmək üçün isə “cahil” olmaq lazımdır.
Bu gün də burada Sizin xeyir-duanızla açılan “Excelsior” hoteli Azərbaycanın inkişafını sübut edən nümunələrdən biridir. Eyni zamanda, hotelimizdə azərbaycanlıdan türkə, almandan filippinliyə qədər müxtəlif millətlərdən olan insanların çalışması ölkənin dünyaya nə qədər inteqrasiya olunduğunu və qloballaşan dünyada Azərbaycanın özünəməxsus yer tutduğunu göstərməkdədir. Bu qədər fərqli millətlərdən olan insanları burada birləşdirən amil təkcə pul deyil, həm də layihənin cəlbediciliyi və ən əsası, Azərbaycanda mövcud olan sabitliyə inamdan doğan işləmək arzusudur.
Hər bir layihə əvvəlcə xəyalla başlanır və səmimi arzu ilə nəticələnir. Azərbaycana gəldiyim gündən bəri xəyallarımdan biri də Azərbaycana layiqli, beynəlxalq standartlara uyğun, dünya miqyaslı bir hotel inşa etmək idi. Uca Allahın köməyi ilə mən bu gün arzuma çatmışam. Buna görə öncə mənə həyatı bağışlayan Allahıma şükür və həmd edirəm. Məni həyata gətirən, bu günlərə gətirib çıxaran ata və anamın ruhlarına rəhmət diləyirəm. Gərgin iş rejimində mənə göstərdikləri səbirə və dəstəyə görə öz ailəmə təşəkkürümü bildirirəm.
“AtaHoldinq” şirkətlər qrupunun səhmdarları başda olmaqla bütün kollektivə, xüsusilə də bütün bacarıqlarını ortaya qoyaraq, gördükləri işlərinə görə “Ataİnşaat” və “AtaTurizm”in əməkdaşlarına, onların ailələrinin səbir və dəstəyinə təşəkkür edirəm. Ən əsası, Siz cənab Prezidentə “Excelsior” hotelinin açılış mərasimində iştirak edərək xeyir-duanızı verdiyinizə görə minnətdarlığımı bildirirəm!
Hörmətli qonaqlar!
Mərhum Prezident Heydər Əliyevin “Mən hər zaman fəxr etmişəm və bu gün də fəxr edirəm ki, mən azərbaycanlıyam” sözlərindən çıxış edərək qeyd etmək istəyirəm ki, mən də fəxr edirəm ki, özümü bir azərbaycanlı kimi hiss edirəm. Ona görə də əbədi arzum Azərbaycan və onun xalqının xoşbəxt və firavan yaşamasıdır. Bunun da açarının Heydər Əliyev siyasətində və Siz cənab Prezidentdə olduğunu bildirirəm.
Mənim əbədi arzumun açarı Siz cənab Prezidentdədir. “AtaHoldinq” “Excelsior” hotelinin qızıl açarını təqdim edir və xeyir-duanızı vermək üçün icazənizlə, Sizi kürsüyə dəvət edirəm.
Diqqətinizə görə minnətdarlığımı bildirirəm.
X X X
“AtaHoldinq” şirkətlər qrupunun Məsləhət Şurasının sədri Əhməd Erentok dövlətimizin başçısına hotelin qızıl açarını təqdim etdi.
X X X
Azərbaycan Prezidenti İlham Əliyev mərasimdə nitq söylədi. (Dövlətimizin başçısının nitqi qəzetin bugünkü nömrəsinin birinci səhifəsində dərc olunur).
X X X
Prezident İlham Əliyev hotelin Fəxri qonaqlar kitabına ürək sözlərini yazdı.
Bölmənin digər xəbərləri
