“Australian Open” tennis turniri yenidən tamaşaçılarla keçiriləcək
Bakı, 17 fevral, AZƏRTAC
Mövsümün ilk “Böyük dəbilqə” turniri olan “Australian Open” yarışını tamaşaçılar yenidən izləyə biləcəklər.
AZƏRTAC xəbər verir ki, bu barədə turnirin təşkilat komitəsindən məlumat verilib.
Məlumatda bildirilir ki, turnirin yarımfinal və final oyunlarında tamaşaçıların maksimum sayı “Melburn Park” kompleksinin ümumi tutumunun təxminən 50 faizi qədər olacaq (hər matçda maksimum 7477 nəfər). Sosial məsafəni qorumağın mümkün olmadığı yerlərdə tibbi maska taxmaq məcburi olacaq.
Avstraliyanın Viktoriya əyalətinin səlahiyyətli nümayəndələri bölgənin inzibati mərkəzi olan Melburnda koronavirus infeksiyasına görə fevralın 13-18-də karantin rejiminin tətbiq olunduğunu elan ediblər. Turnirin oyunları da məhz bu şəhərdə keçirilir. Beş günlük karantin rejimindən əvvəl turnirdə məhdud sayda tamaşaçının iştirakına icazə verilmişdi.
“Australian Open” fevralın 21-də başa çatacaq.
Bölmənin digər xəbərləri
