AVROPA BİRLİYİNİN BARSELONA ZİRVƏ TOPLANTISI BAŞA ÇATMIŞDIR
Şənbə günü Barselonada Avropa Birliyi dövlət və hökumət başçılarının görüşü birləşmiş Avropanın enerji bazarlarının sərbəstləşdirilməsi barədə saziş əldə edilməsi ilə başa çatmışdır. İkigünlük iclasın yekunlarına əsasən, Avropa liderləri iqtisadiyyatda struktur islahatları aparılmasına yönəldilmiş geniş tədbirlər paketi qəbul etmişlər.
Enerji bazarlarının sərbəstləşdirilməsi Barselona görüşünün gündəliyində duran əsas məsələlərdən biri idi. Qəbul edilmiş qərara görə, Avropanın sənaye şirkətləri 2004-cü ildən etibarən elektrik enerjisi və qaz təchizatçılarını özləri seçə bilərlər. Prezident seçkiləri ərəfəsində həmin qərarı daha sonrakı müddətə keçirməyə çalışan Fransaya güzəşt kimi, elektrik enerjisi və qazın fərdi istehlakçıları sazişə daxil edilmişlər.
Barselona zirvə toplantısı 2010-cu ilədək tam məşğulluğa nail olmaq proqramını bəyənmişdir. Proqramda 20 milyon iş yeri yaradılması nəzərdə tutulur. Bundan ötrü əmək bazarını daha çevik etmək, onun mütəhərrikliyini artırmaq, qadınların və gənclərin məşğulluğunun yüksəldilməsi üzrə bir sıra konkret tədbirlər görmək lazımdır.
Zirvə toplantısında bütün Avropa Birliyi üçün vahid tibbi sığorta kartlarının təqdimatı olmuşdur. Bu kartlar onların sahiblərinə AB-nin üzvü olan bütün ölkələrdə tibbi xidmət göstərilməsinə təminat edir. Orta pensiya yaşını mərhələ-mərhələ 58-dən 63 yaşa qədər artırmaq qərara alınmışdır.
İTAR-TASS-ın yaydığı xəbərə görə, zirvə toplantısının gündəliyindəki xarici siyasət məsələlərinə Yaxın Şərqdəki vəziyyətin müzakirəsi də daxil idi. Müzakirənin yekunlarına əsasən, ayrıca bəyanat qəbul edilmişdir. AB-nin liderləri əmin olduqlarını bildirmişlər ki, Yaxın Şərqdə sülh İsrail və Fələstin dövlətlərinin yanaşı yaşaması prinsipinə əsaslanmalıdır. Bəyanatda BMT Təhlükəsizlik Şurasının ötən həftə Yaxın Şərqə dair qəbul etdiyi qətnamə “dərhal yerinə yetirilməli” sənəd kimi tamamilə dəstəklənir.
Bölmənin digər xəbərləri
