Avropa İttifaqı Ukraynaya dəstək üçün yeni fond yaratmaq istəyir
Bakı, 18 fevral, AZƏRTAC
Avropa İttifaqı yeni fond yaratmaqla Ukraynaya hərbi yardımın maliyyələşdirilməsinə növbəti cəhd edir.
AZƏRTAC Polşanın “Money.pl” nəşrinə istinadla xəbər verir ki, yeni təşəbbüslə bağlı müzakirələr bu gün Avropa İttifaqına üzv ölkələrin səfirləri ilə başlayacaq. Sənəddə vurğulanır ki, “əsas məqsəd Ukraynanın ən aktual müdafiə ehtiyaclarını ödəməkdir”.
Prioritet ehtiyaclara iriçaplı artilleriya sursatları, hava hücumundan müdafiə sistemləri və uzaqmənzilli raketlər, Ukrayna Silahlı Qüvvələri briqadalarının bərpası və Ukraynanın müdafiə sənayesi sektorunun gücləndirilməsi üçün birgə səylər daxildir.
Fondun iki mənbədən - üzv dövlətlərin milli gəlirlərinə mütənasib olaraq könüllü üzvlük haqları və bu il 900 milyon avroyadək olan dondurulmuş Rusiya aktivlərindən əldə edilən mənfəət hesabına maliyyələşəcəyi gözlənilir.
Nəşr qeyd edir ki, indiki mərhələdə sənəddə konkret məbləğ nəzərdə tutulmayıb.
Bölmənin digər xəbərləri
