Avropa liderləri Ukraynada sülhə dəstəklə bağlı bəyanat yayıblar
Roma, 21 oktyabr, AZƏRTAC
Avropa liderləri Ukraynada ədalətli və davamlı sülhə dəstəklə bağlı bəyanat yayıblar.
AZƏRTAC xəbər verir ki, bu barədə İtaliya Nazirlər Şurası məlumat yayıb.
İtaliyanın Baş naziri Ciorcia Meloni, Böyük Britaniyanın Baş nazir Kir Starmer, Fransa Prezidenti Emmanuel Makron, Almaniya Kansleri Fridrix Merts, Polşanın Baş naziri Donald Tusk, Avropa Komissiyasının Prezidenti Ursula Fon der Lyayen, Avropa İttifaqı Şurasının Prezidenti Antonio Koşta, Norveçin Baş naziri Yonas Qar Störe, Finlandiya Prezidenti Aleksandr Stubb, Danimarkanın Baş naziri Mette Frederiksen və Ukrayna Prezidenti Volodimir Zelenskinin birgə bəyanatında deyilir: “Biz Ukrayna xalqının layiq olduğu ədalətli və davamlı sülh istəyimizdə həmrəyik. ABŞ Prezidenti Donald Trampın döyüşlərin dərhal dayandırılması və hazırkı təmas xəttinin danışıqların başlanğıc nöqtəsi olması ilə bağlı mövqeyini qətiyyətlə dəstəkləyirik. Beynəlxalq sərhədlərin zorla dəyişdirilməməsi prinsipinə sadiq qalırıq”.
Bəyanatda vurğulanır ki, Ukrayna istənilən atəşkəsdən əvvəl, atəşkəs vaxtı və sonrakı dövrdə mümkün olan ən güclü mövqedə olmalıdır.
Eyni zamanda, Ukraynanın ehtiyac duyduğu resurslara sahib olması üçün Rusiyanın dondurulmuş aktivlərinin tam istifadəsi ilə bağlı tədbirlərin hazırlandığı bildirilib.
Liderlər həftənin sonunda bir araya gələrək bu işi necə irəli aparmağı və Ukraynaya daha çox dəstək verməyi müzakirə edəcəklər.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
