AVROPA OLİMPİYA KOMİTƏSİNİN PREZİDENTİ PATRİK HİKEYİN ÇIXIŞI

09.04.2007 [18:08]
Çap et
A⁺ A^-

-Cənab Prezident Əliyev!

Azərbaycan Milli Olimpiya Komitəsinin üzvləri!

Hörmətli cənablar!

Avropa Olimpiya Komitəsinin prezidenti kimi bu gün burada, Masallıda belə möhtəşəm yeni kompleksin rəsmi açılış mərasimində olmaqdan son dərəcə məmnunam. 2001-ci ildə Avropa Olimpiya Komitəsinin baş katibi kimi mənə Azərbaycana səfər etmək şərəfi nəsib olmuşdur. Həmin il Avropa Olimpiya Komitəsinin İcraiyyə Komitəsi tam heyətlə özünün ilk toplantısını keçirirdi. Həmin vaxt biz Azərbaycandan dinamik inkişaf edən Milli Olimpiya Komitəsi, gözəl xalqınız və onun səmimi qonaqpərvərliyi haqqında ən xoş xatirələrlə qayıtdıq.

Ölkənizin Prezidenti, o cümlədən Olimpiya Komitəsinin prezidenti cənab İlham Əliyevin bacarıqlı rəhbərliyi altında Azərbaycan xalqı bütün ölkədə bir sıra çox gözəl olimpiya komplekslərinin və indi isə burada, Masallıda gördüyümüz çox yaraşıqlı kompleksin tikintisinin şahidi olduq.

Azərbaycan bir ölkə kimi həm beynəlxalq miqyasda, həm də Avropa səviyyəsində olimpiya idmanının inkişafında parlaq məşələ çevrilib və bu nailiyyət, əsasən, sizin siyasi və idman sahələrində rəhbərliyinizin sadiqliyi və baxışları, eləcə də idman gücünü, haqlı olaraq, sosial rifahın və iqtisadi tərəqqinin rəmzi hesab edən xalqınızın səyləri sayəsində mümkün olmuşdur.

Son illər ərzində Azərbaycanda idmanın inkişafı, bu cür idman qurğularının tikintisi sahəsində görülən işlər, nəzərdə tutulan planları barədə mənim məlumatım var idi. Bununla bağlı cənab Prezident İlham Əliyevin nəzərdə tutduğu işlərin həyata keçirilməsinin şahidiyəm. Cənab Prezident, icazənizlə, Avropa

Olimpiya Komitəsi adından, Beynəlxalq Olimpiya Komitəsi adından Sizə dərin minnətdarlığımı bildirir, Sizin gördüyünüz bu işlərdən çox böyük şərəf hissi duyuram.

Hörmətli cənab Prezident, ola bilsin, coğrafi baxımdan ölkəniz Avropanın mərkəzindən uzaq olsun. Amma idmanla və Masallıdakı kimi bu cür gözəl komplekslərin tikintisi ilə Siz Avropanın lap ürəyində yer tutursunuz. Bir çox hallarda, siyasət və diplomatiyanın bacarmadığı hallarda, idman, sözün əsl mənasında, xalqları birlik və dostluq şəraitində bir araya gətirən vasitə kimi çıxış edə bilər.

Masallıdakı son dərəcədə heyrətləndirici yeni Olimpiya İdman Kompleksi bütün Azərbaycan atletlərinin toplantı yeri olacaqdır. Buradan heyətlər bütün dünyada keçirilən beynəlxalq yarışlara çıxacaq və qəhrəmanlığına görə qazandıqları tərifləri almaq məqsədi ilə yenə də buraya qayıdacaqlar.

Bu kompleksin tikilməsində əməyi olan memarlara, inşaatçılara və bütün işçilərə minnətdarlığımı bildirmək istəyirəm. Bilirəm ki, bu yer idman zirvəsinin əsl mərkəzinə çevriləcək və Masallı rayonunun

və onun iqtisadiyyatının inkişafına böyük töhfə verəcəkdir.