AVROPA PARLAMENTİ AZƏRBAYCAN İLƏ BÜTÜN SAHƏLƏRDƏ ƏMƏKDAŞLIQDA MARAQLIDIR
AZƏRTAC xəbər verir ki, sentyabrın 29-da Milli Məclisin sədri Oqtay Əsədov Azərbaycanda səfərdə olan Avropa Parlamentinin Avropa üzrə Liberallar və Demokratlar Alyansı siyasi qrupunun rəhbəri Qraham Uatsonla görüşmüşdür.
O.Əsədov demişdir ki, Avratlantik məkana inteqrasiya Azərbaycanın xarici siyasətinin əsas istiqamətlərindən biridir. Azərbaycan bütün beynəlxalq təşkilatlar, o cümlədən Avropa Parlamenti ilə əlaqələrin inkişafına xüsusi əhəmiyyət verir. Biz təşkilatla əməkdaşlıq və tərəfdaşlığa dair saziş çərçivəsində uğurla əməkdaşlıq edirik. Milli Məclisdə Avropa Parlamenti ilə əməkdaşlıq komissiyası fəaliyyət göstərir. Milli Məclisin sədri bildirmişdir ki, oktyabrın əvvəllərində Brüsseldə Azərbaycan-Avropa İttifaqı parlamentlərarası əməkdaşlıq komissiyasının birgə iclası keçiriləcəkdir. İnanırıq ki, bu cür toplantılar və qarşılıqlı səfərlər münasibətlərimizin daha da möhkəmlənməsinə və inkişafına xidmət edəcəkdir.
Qraham Uatson müqəddəs Ramazan bayramı ərəfəsində onunla və başçılıq etdiyi nümayəndə heyəti ilə görüşdüyünə görə O.Əsədova dərin minnətdarlığını bildirmiş, Azərbaycan xalqına sülh və əmin-amanlıq arzulamışdır. Qonaq demişdir ki, Azərbaycana ikinci dəfədir səfər edir. Ötən iki il ərzində Bakı çox dəyişmiş, gözəlləşmişdir. Ölkəniz sürətlə inkişaf edir. Q.Uatson bildirmişdir ki, Avropa Parlamenti Milli Məclislə əməkdaşlıqdan məmnundur. Təşkilat Azərbaycan ilə bütün sahələrdə əlaqələrin inkişafında maraqlıdır.
Sonra görüşdə qarşılıqlı maraq doğuran digər məsələlər ətrafında geniş fikir mübadiləsi aparılmış, Azərbaycan ilə Avropa Parlamenti arasında əməkdaşlığın müxtəlif aspektləri müzakirə olunmuşdur.
Bölmənin digər xəbərləri
