Avropa sərhədlərinin mühafizəsi agentliyinin əməkdaşlarının sayı artırılacaq
Vyana, 28 mart, AZƏRTAC
Avropa sərhədlərinin mühafizəsi agentliyinin (Frontex) əməkdaşlarının sayı 2027-ci ilədək artırılacaq. Buna səbəb Avropanın xarici sərhədlərinin mühafizəsinin gücləndirilməsidir.
AZƏRTAC xəbər verir ki, Aİ üzv dövlətləri və Avropa Parlamenti arasında danışıqlar nəticəsində agentliyin əməkdaşlarının sayını 10 min nəfərədək artırmaq barədə razılıq əldə edilib. Razılaşmaya əsasən, kadrların sayının artırılması mərhələli şəkildə həyata keçiriləcək.
Avropa Komissiyası hələ ötən il Frontex Agentliyinin kadr potensialını 2020-ci ilədək on min nəfərə çatdırılmasını təklif etsə də, İtaliya və Yunanıstan bu təklifi dəstəkləməmişdilər. Komissiya prezidenti Jan-Klod Yunker bu ölkələri sərhəd mühafizəsində səlahiyyətlərinin məhdudlaşdırılmasından çəkinməkdə tənqid etmişdi.
Qeyd edilməlidir ki, qeyri-leqal şəkildə sərhədi keçməklə Avropa İttifaqı ərazisinə daxil olanların sayı ötən il ciddi şəkildə azalıb. 2018-ci ildə 150 min 114 nəfər Aİ sərhədlərini pozub, bu isə 2017-ci illə müqayisədə 27 faiz aşağı göstərici olub.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
