AVROPA ŞURASININ BAŞ KATİBİ VALTER ŞVİMMER OMBUDSMANLA GÖRÜŞMÜŞDÜR
Ombudsman aparatından AZƏRTAC-a bildirmişlər ki, görüşdə E.Süleymanova qonağa Azərbaycanda insan hüquqlarının təmin olunmasının vəziyyəti, ölkəmizdə yeni yaranmış ombudsman təsisatının fəaliyyəti, müvəkkilin ilk illik məruzə ilə Milli Məclisdə çıxış etməsi barədə məlumat vermişdir. O demişdir ki, insan hüquqlarının müdafiəsinin təkmilləşdirilməsi məqsədi ilə bir sıra tədbirlərin həyata keçirilməsi və qanunvericilikdə dəyişikliklərin edilməsi ilə əlaqədar ümumiləşdirilmiş təklifləri Milli Məclisə və Nazirlər Kabinetinə təqdim etmişdir.
E.Süleymanova Dağlıq Qarabağ münaqişəsinin sülh yolu ilə həll edilməsi, Ermənistan tərəfindən zəbt olunmuş Azərbaycan torpaqlarının tezliklə qaytarılması və məcburi köçkünlərin doğma yurdlarına dönməsi zərurətini vurğulamış və bu məsələlərin həllində Avropa Şurasının köməyinə ümid bəslədiyini bildirmişdir.
Qonaq Avropa Şurasının münaqişənin nizamlanmasında maraqlı olduğunu, problemin danışıqlar yolu ilə həll edilməsi, bu danışıqlar zamanı qaçqınların fikirlərinin nəzərə alınmasının vacibliyini vurğulamışdır. V.Şvimmer ombudsmana insan hüquqlarının və azadlıqlarının müdafiəsi üzrə fəaliyyətində uğurlar arzulamış, Avropa Şurası ilə əməkdaşlıq imkanlarının müzakirə edilməsi məqsədi ilə Strasburqa işgüzar səfərə dəvət olunacağını bildirmişdir.
Bölmənin digər xəbərləri
