AVROPA ŞURASININ BAŞ KATİBİ VALTER ŞVİMMERİN AZƏRBAYCANA SƏFƏRİ
ƏDLİYYƏ NAZİRLİYİNDƏ GÖRÜŞ
Azərbaycanda aparılan demokratik islahatlar və həyata keçirilən mütərəqqi tədbirlər barədə qonağa məlumat verən nazir, bu sahədə Azərbaycanın Avropa Şurası ilə uğurlu əməkdaşlıq etdiyini vurğulamış, ölkəmizin üzərinə götürdüyü öhdəliklərə toxunaraq, insan hüquqlarının etibarlı təmin edilməsi, ədalət mühakiməsinin səmərəliliyinin artırılması, yerli özünüidarə orqanlarının fəaliyyətinin təkmilləşdirilməsi və digər sahələrdə görülən ardıcıl tədbirləri qeyd etmişdir.
Azərbaycanda aparılan demokratik islahatların vacibliyini və Avropa Şurası tərəfindən dəstəkləndiyini vurğulayan qonaq, bəzi konkret öhdəliklər və tövsiyələrin həyata keçirilməsi, Avropa Konvensiyalarının milli qanunvericiliyimizdə implementasiyası ilə maraqlanmış, ədalət mühakiməsinin səmərəliliyinin artırılması üzrə Ədliyyə Nazirliyi tərəfindən Avropa Şurası ilə birgə bu günlərdə keçirilmiş ikitərəfli görüşün müsbət nəticələrinə toxunmuşdur.
Söhbət zamanı Azərbaycan Respublikası və Avropa Şurası arasında əməkdaşlığın genişləndirilməsi, ölkəmizdə demokratik hüquqi islahatların davam etdirilməsi barədə fikir mübadiləsi aparılmış, qonağı maraqlandıran suallara ətraflı cavab verilmişdir.
Sonra hörmətli qonaq Azərbaycan ədliyyəsinin tarixi muzeyi ilə tanış olmuş, xatirə kitabına ürək sözlərini yazmışdır.
Görüşdə Azərbaycanın Avropa Şurası yanında daimi nümayəndəsi səfir Aqşin Mehdiyev, ədliyyə nazirinin müavini Toğrul Musayev və Avropa Şurasının məsul təmsilçiləri iştirak etmişlər.
Bölmənin digər xəbərləri
