Avropa və Afrika liderləri Afrikada xəstəliklərə qarşı birgə mübarizəni dəstəkləyirlər
Madrid, 15 aprel, AZƏRTAC
Avropa və Afrika liderləri "Afrikada COVID-19 pandemiyasına qarşı birgə mübarizə məqsədi ilə fəaliyyətə çağırış" imzalayıblar.
AZƏRTAC xəbər verir ki, BMT Baş Katibinin Afrikaya qlobal humanitar yardım göstərilməsi barədə xahişinə cavab olaraq, müraciətdə qitədə səhiyyə sistemlərinin reaksiya səviyyəsinin artırılmasına, genişləndirilmiş iqtisadi stimullaşdırma paketinin təqdim edilməsinə xüsusi diqqət yetirilib.
Sənəddə deyilir: "Böhran bir-birimizlə nə qədər bağlı olduğumuzu göstərdi. Heç bir region COVID-19-un öhdəsindən təkbaşına gələ bilməz. Koronavirus Afrikada məğlub edilməsə, o, yenidən hamımızı təqib edəcək. Yalnız qlobal səviyyədə qələbə, o cümlədən Afrikada koronavirusun məğlub edilməsi bu pandemiyaya son qoyacaq. Əks halda pandemiya Afrikaya güclü təsir göstərə bilər. Bu isə dünya böhranını xeyli uzatmaq deməkdir.
Biz harada tüğyan etməsindən asılı olmayaraq, pandemiyanı bitirmək, gələcəkdə insanların təhlükəsizliyini təmin edən dayanıqlı səhiyyə sistemləri yaratmaq üçün G7 və G20 üzrə tərəfdaşlarımızla işləyəcəyik. İndi ixtilaflar aparmaq və ya siyasət yürütmək vaxtı deyil, indi birlik və əməkdaşlıq vaxtıdır".
Müraciəti Avropa tərəfindən Avropa Komissiyasının sədri Ursula fon der Lyayen, Avropa Şurasının sədri Şarl Mişel, Fransa Prezidenti Emmanuel Makron, İspaniyanın Baş Naziri Pedro Sançes, Portuqaliyanın Baş Naziri Antoniu Koşta, İtaliyanın Baş Naziri Cüzeppe Konti, Niderlandın Baş Naziri Mark Rütte, Afrika tərəfindən Ruanda Prezidenti Kaqame Pol, Seneqal Prezidenti Maki Sall, Anqola Prezidenti Joau Lourensu, Cənubi Afrika Respublikasının Prezidenti Siril Ramafosa, Konqo Demokratik Respublikasının Prezidenti Feliks Çisekedi, Efiopiya Prezidenti Abi Əhməd Əli, Mali Prezidenti İbrahim Bubakar Keyta, Misir Prezidenti Əbdülfəttah əs-Sisi, habelə Çadın sabiq Baş Naziri Faki Musa imzalayıblar.
Avropa və Afrika siyasətçiləri hesab edirlər ki, müvəffəqiyyət qazanmaq üçün beynəlxalq əməkdaşlıq və əlaqələndirmə, o cümlədən Ümumdünya Səhiyyə Təşkilatının, Dünya Bankının, Afrika İnkişaf Bankının və Beynəlxalq Valyuta Fondunun iştirakı lazımdır.
100 milyard dollar (91 milyard 533 milyon avro) həcmində iqtisadi stimullaşdırma paketinə gəldikdə isə o, koronavirusa qarşı mübarizə üçün əlavə daxili iqtisadi resursların ayrılması məqsədi ilə 55 dövlətə fiskal məkan ayrılmasına, eyni zamanda, iqtisadi və sosial nəticələrin yumşaldılmasına yönəldiləcək.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
