Avropanın qara bazarlarında saxta “Ozempic” dərmanları satılır
Stokholm, 27 noyabr, Nərgiz Cəfərli, AZƏRTAC
Çəki azaldılmasında populyar dərmana çevrilən, diabet xəstəliyi üçün nəzərdə tutulan “Ozempic” preparatlarının saxta versiyası veb-saytlar və sosial şəbəkələr vasitəsilə satılır. Lakin Avropanın qara bazarında satılan dərmanların tərkibində başqa maddələr aşkarlanıb və bir neçə nəfər xəstəxanaya yatırılıb.
Qablaşdırmada toz, maye və şpris, eləcə də həkimlərin tövsiyə etdikləri dozanı xeyli üstələyən dozada qəbul edilmənin məsləhət görüldüyü təlimat yerləşir. Birinci iynədən dərhal sonra sifarişçilərin halı dəyişib və onlar təcili yardım şöbəsinə çatdırılıblar.
“Ozempic”in tərkibində olan semaqlutid adlı maddə qanda həddən artıq şəkər olduqda onun miqdarını aşağı salır. Nəticədə, mədə ləng boşalır ki, bu da iştahanın azalmasına səbəb olur.
Preparat arıqlamaq istəyənlər arasında çox populyar olub. Tələbat ciddi qlobal çatışmazlığa gətirib çıxarıb.
İsveçin dərman vasitələri agentliyi bu məhsulları instaqramda reklam edən bəzi akkauntlara qarşı tədbirlər görüb. Lakin bu dərmanlar əsasən əlçatanlığı mürəkkəb olan anonim saytlar vasitəsilə satılır.
“Çoxsaylı anonim səhifələri aşkarlamağınız üçün axtarış kifayət edir. Onların əksəriyyəti narkotiklərin qanunsuz dövriyyəsi və cinayətkarlıq fəaliyyəti ilə bağlıdır. “Ozempic”in saxta versiyası çox vaxt olduqca yaxşı hazırlanır və onu həqiqi qablaşdırmadan ayırd etmək çətin olur. Həmin saxta dərmanların tərkibində nə desən ola bilər”, - deyə İsveçin dərman vasitələri agentliyinin təhqiqatçısı Tomas Nilsson qeyd edib.
Bölmənin digər xəbərləri
