Avropanın yeraltı anbarlarında qaz ehtiyatları 44 faizə düşüb
Bakı, 18 fevral, AZƏRTAC
Avropada yeraltı anbarlardakı (UGS) qaz ehtiyatları təxminən 44 faizə qədər azalıb.
AZƏRTAC Avropa Qaz İnfrastrukturu Agentliyinin (GIE) məlumatına istinadla xəbər verir ki, fevralda baş verən azalma son dörd ildə analoji ay üçün ən yüksək göstəricidir. Aİ qış mövsümü başlayandan bəri yeraltı qaz anbarlarından təxminən 60 milyard kubmetr qaz çıxarıb. Bu, artıq payız-qış dövrü üçün onlara vurulan qazın həcmini xeyli üstələyir.
GIE-nin məlumatına görə, fevralın 16-da Aİ ölkələrində yeraltı qaz anbarlarından qazın götürülməsi 646 milyon kubmetr təşkil edib, habelə inyeksiya 28 milyon kubmetrə qədər azalıb. Cari ayda qaz ehtiyatlarının istehlakının yüksək olmasına baxmayaraq (fevral ayı üçün tarixdə dördüncü), UGS-də yanacağın ümumi həcmi fevralın əvvəlindən bəri bütün müşahidə dövrü üçün altıncı maksimum səviyyədə - 48,9 milyard kubmetr olub.
Avropanın yeraltı anbarlarından qazın istifadəsinin sonuncu mövsümü 2024-cü il martın 31-də başa çatıb. Həmin vaxt UGS-də 58,44 faiz qaz ehtiyatı qalmışdı. Hazırda Avropanın yeraltı qaz anbarları 44,05 faizə qədər doludur ki, bu da son beş ildə analoji dövr üçün orta göstəricidən 9,48 faiz bəndi aşağıdır.
Avropada istilik mövsümü 2024-cü il oktyabrın 29-da (əvvəlki payız-qış mövsümündən 10 gün tez) başlayıb və o vaxtdan bəri Aİ ölkələri anbarlardan təxminən 60 milyard kubmetr qaz çıxarıblar.
Aİ üçün ən problemli dövr 2018 və 2022-ci illər olub. Həmin dövrdə anbarlardakı ehtiyatlar müvafiq olaraq 18 və 26 faizdə düşüb.
Bölmənin digər xəbərləri
