Avstraliyada peyvəndlərin vurulması və sertifikatların verilməsi sistemi fəaliyyətə başlayıb
Tokio, 7 fevral, AZƏRTAC
Avstraliya dövlət tibbi sığorta sistemi çərçivəsində peyvənd vurulması və sertifikatların verilməsinin qeydiyyatı sistemini işə salıb.
AZƏRTAC xəbər verir ki, bu barədə Avstraliya Dövlət sığorta xidməti naziri Stüart Robert məlumat verib.
Nazir bildirib ki, peyvəndin qəbulu barədə sertifikatı həm onlayn, həm də kağız şəklində almaq olar. S.Robert əlavə edib ki, Avstraliya hökuməti həmin sertifikatın beynəlxalq status alması üçün əcnəbi həmkarları ilə müvafiq iş aparır. Bu, avstraliyalılara xarici ölkələrə səfər zamanı yardım edəcək.
Qeyd edək ki, son məlumatlara görə Avstraliyada koronavirusa yoluxanların ümumi sayı 28 min 848 nəfər təşkil edir. Pandemiyanın yaratdığı xəstəlik nəticəsində bu ölkədə 909 nəfər həyatını itirib.
Bildirilir ki, Avstraliya kütləvi peyvənd vurulmasına fevralın sonlarında başlanacaq. Əlaqədar qurumlar bu ölkədə ABŞ-ın “Pfizer” və Almaniyanın “BioNTech” şirkətlərinin istehsalı olan peyvəndlərin tətbiqinə razılıq verib. Eyni zamanda, martın ortalarından Britaniya-İsveç birgə müəssisəsi olan “AstraZeneca” və ABŞ-ın “Novavax” şirkətlərinin peyvəndlərinin vurulmasına razılıq verildiyi də qeyd edilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
