AYİB Azərbaycana su təchizatı sisteminin rəqəmsal texnologiyalar vasitəsilə modernləşdirilməsində kömək edir
Bakı, 4 noyabr, Pərvanə Qafarova, AZƏRTAC
Avropa Yenidənqurma və İnkişaf Bankı (AYİB) Azərbaycana su ehtiyatları sektorunun rəqəmsal modernləşdirilməsində və onun dayanıqlılığının artırılmasında dəstək göstərir.
AZƏRTAC xəbər verir ki, bunu AYİB-in Qafqaz üzrə regional direktoru Alkis Drakinos Bakıda keçirilən “State and IT Eurasian Forum” çərçivəsində çıxışı zamanı bildirib.
Onun sözlərinə görə, bank müasir texnologiyalar vasitəsilə su ehtiyatlarının idarə olunmasının səmərəliliyinin artırılmasına yönəlmiş bir sıra təşəbbüslər həyata keçirir.
“Biz Azərbaycan Dövlət Su Ehtiyatları Agentliyinə ölkənin uzunmüddətli su təhlükəsizliyini təmin etmək məqsədilə rəqəmsallaşma ilə bağlı mövcud problemlərin müəyyənləşdirilməsi və aradan qaldırılmasında kömək edirik”, – deyə o vurğulayıb.
Bu dəstək AYİB-in milli tərəfdaşlarla birgə həyata keçirdiyi Rəqəmsal Transformasiya Proqramı və Kiberdayanıqlılığın Gücləndirilməsi Proqramı çərçivəsində göstərilir.
“Bizim məqsədimiz rəqəmsallaşma və süni intellektin insanların rifahına xidmət etməsi və infrastrukturun davamlı inkişafına töhfə verməsidir. AYİB illər ərzində Azərbaycanla əməkdaşlıq çərçivəsində kommunal təsərrüfat və su təchizatı sahəsi də daxil olmaqla 200-dən çox layihəyə ümumilikdə 3,6 milyard avrodan artıq investisiya yatırıb. Bu layihələr əhalinin həyat keyfiyyətinin yüksəldilməsinə, iqtisadiyyatın möhkəmlənməsinə və ölkə regionlarının davamlı inkişafına xidmət edir”, – deyə AYİB nümayəndəsi qeyd edib.
Bölmənin digər xəbərləri
