“AZƏRALÜMİNİUM” SC-DƏ SOSİAL OBYEKT AÇILMIŞDIR
Sumqayıt sahəsinin ictimai əlaqələr üzrə meneceri İlqar Abbasov AZƏRTAC-ın müxbirinə bildirmişdir ki, burada bərpa işləri uğurla davam etdirilir. Müəssisəni 25 il müddətinə icarəyə götürən Hollandiyanın “Fondel Metall” firması artıq bura 40 milyon ABŞ dolları məbləğində sərmayə qoymuşdur.
Uzunmüddətli boşdayanmadan sonra iki korpus işə başlamışdır. Yeniləşdirilmiş 164 elektroliz vannası hər gün 60 ton ilkin alüminium istehsal edir. Özü də istehsal olunan məhsulun 60 faizi yüksəkkeyfiyyətli (A-8) alüminiumdur. Biznes-plana uyğun olaraq, yaxın vaxtlarda müəssisə tam bərpa ediləcək və bunun sayəsində 2500 iş yeri açılacaqdır.
Fəhlələrin əməyinin təşkilinə böyük diqqət yetirən “Azəralüminium” SC Sumqayıt sahəsinin rəhbərliyi onların sağlam qidalanmasını xüsusilə vacib sayır. İstifadəyə verilmiş təzə yeməkxanada müəssisənin əməkçiləri pulsuz yeməklə təmin olunacaqlar. Yaxın vaxtlarda burada klinika da açılacaqdır. Ərazinin abadlaşdırılması üçün də xeyli iş görülmüşdür. Bir sözlə, burada məhsuldar əmək üçün şərait yaratmaqdan ötrü hər cür tədbir görülür.
Bölmənin digər xəbərləri
