AZƏRBAYCAN – ÇEXİYA: ƏLAQƏLƏR GENİŞLƏNİR
Noyabrın 15-də Azərbaycan Respublikasının xarici işlər naziri Vilayət Quliyev Çexiya Respublikasının Azərbaycanda akkreditə olunmuş fövqəladə və səlahiyyətli səfiri cənab Cozef Braunu qəbul etmişdir.
Bu barədə XİN-in mətbuat mərkəzindən AZƏRTAC-a verilən məlumatda deyilir ki, görüş zamanı nazir Vilayət Quliyev Çexiya ilə Azərbaycan arasında münasibətlərin və əlaqələrin bir çox sahələrdə inkişaf etdirilməsini xüsusi vurğulayaraq, əməkdaşlığın bundan sonra da genişlənəcəyinə ümidvar olduğunu bildirmişdir.
Daha sonra nazir Vilayət Quliyev Azərbaycanda demokratiyanın inkişafı, respublikamızın Qərbə inteqrasiyası və həmçinin Ermənistan-Azərbaycan, Dağlıq Qarabağ münaqişəsi və onun həlli istiqamətində göstərilən səylər, ATƏT-in Minsk qrupunun bu yöndə fəaliyyəti və qaçqınların ağır vəziyyəti barədə qonağa ətraflı məlumat vermişdir.
Sonra cənab səfir Cozef Braun öz ölkəsi ilə Azərbaycan arasındakı əlaqələrin siyasi, iqtisadi sahələrdə və ticarət sahəsində inkişaf etdirilməsinə Çexiya tərəfinin böyük əhəmiyyət verdiyini, beynəlxalq təşkilatlarda daha sıx əməkdaşlığın davam etdirilməsinin zəruriliyini vurğulamışdır.
Söhbət zamanı Vilayaət Quliyev və Cozef Braun bu il noyabr ayının 22-də NATO-nun Çexiyada keçiriləcək Praqa sammitində müzakirə olunacaq bir sıra məsələlər barədə fikir mübadiləsi aparmışlar.
Görüşdə qarşılıqlı maraq doğuran bir sıra məsələlər də müzakirə olunmuşdur.
Bölmənin digər xəbərləri
