AZƏRBAYCAN-ALMANİYA BİZNES FORUMU
AZƏRTAC-ın xüsusi müxbirləri xəbər verirlər ki, fevralın 16-da Berlində - “Almaniya İqtisadiyyat Evi”ndə Azərbaycan-Almaniya biznes forumu keçirilmişdir.Azərbaycan Prezidenti İlham Əliyev forumda iştirak etmişdir.
Salona toplaşanlar dövlətimizin başçısını hərarətlə qarşıladılar.
Azərbaycanın 30-dan çox, Almaniya tərəfindən isə 200-dən çox iş adamının iştirak etdiyi biznes forumu ölkəmizin Almaniyadakı səfirliyi, İqtisadi İnkişaf Nazirliyi və Azərbaycanda İxracın və İnvestisiyaların Təşviqi Fondu təşkil etmişdir.
Tədbiri “Şərqi və Mərkəzi Avropa Birliyi” Cəmiyyətinin sədri Klaus Ksolner açdı.
Sonra Almaniyanın “Wintershall” şirkətinin idarə heyətinin sədri Raynip Svitserloot, Almaniyanın iqtisadiyyat və yeni texnologiyalar naziri Mixael Qlos çıxış etdilər. Onlar Azərbaycan ilə Almaniya arasında əlaqələrin yüksək sürətlə inkişaf etdiyini, dünyada Azərbaycanın ən inkişaf edən ölkə olduğunu xatırlatdılar. Bildirdilər ki, Azərbaycan neftdən gələn gəlirləri qeyri-neft sektoruna yönəldir və bu, çox müsbət haldır, Almaniyanın iş adamları ilə əlaqələri genişləndirmək faydalı nəticələr verəcəkdir. Neft sahəsində zəngin ənənəsi olan Azərbaycanın yeni neft strategiyası onun sürətli inkişafına təkan vermişdir. Azərbaycanın regionda böyük rolu vardır.
Çıxış edənlər keçən ilin noyabrında Azərbaycanla Avropa İttifaqı arasında enerji məsələləri üzrə strateji tərəfdaşlığa dair anlaşma memorandumunun imzalanmasını yüksək qiymətləndirdilər. Onlar Azərbaycanın qeyri-neft sektorunda da əməkdaşlıq üçün potensial imkanların olduğunu, bu sahəyə sərmayə qoymaq istədiklərini bildirdilər və öz ölkələrinin şirkətlərini Azərbaycanda fəaliyyətə dəvət etdilər. Azərbaycanın dünyada da rolunun artdığını vurğulayan natiqlər Almaniyanın ölkəmizə daim dəstək verəcəyini bildirdilər.
Almaniya nümayəndələri Xəzər regionunun əhəmiyyətinin getdikcə artdığını vurğulayaraq, bu məkanın iqtisadi perspektivlərindən, Bakı-Tbilisi-Ceyhan, Bakı-Tbilisi-Ərzurum neft-qaz layihələrinin reallaşmasından danışdılar. Transxəzər nəqliyyat dəhlizinin yaranmasında maraqlı olduqlarını bildirdilər və bu sahədə Azərbaycanın rolunu yüksək qiymətləndirdilər.
Xüsusi vurğulandı ki, Almaniya Azərbaycanın Dünya Ticarət Təşkilatına üzvlüyünü dəstəkləyir və Avropa İttifaqının sədri kimi bu işdə ölkəmizə köməyini göstərəcəkdir.
Prezident İlham Əliyev biznes forumda nitq söylədi.
Dövlətimizin başçısı dedi ki, Azərbaycan-Almaniya əlaqələri yüksələn xətlə inkişaf edir və indiki səfər ona yeni təkan verəcəkdir. Azərbaycan iqtisadiyyatı son illər sürətlə inkişaf edir, düzgün enerji siyasətindən istifadə edib insanların həyat tərzini yaxşılaşdıracağıq. Neftdən gələn gəlirlər iqtisadiyyatın şaxələndirilməsinə yönəldiləcəkdir. Enerji sahəsində Avropa ilə tərədaşlığımız artır.
Prezident bildirdi ki, ölkəmizə son 10 ildə 30 milyard dollar sərmayə qoyulub, Azərbaycan xarici sərmayədarlar üçün cəlbedici ölkəyə çevrilibdir. Eyni zamanda, indi Azərbaycanın özünün də investisiya qoymaq imkanları yaranıbdır. Özəl sektor Azərbaycanda aparıcı rol oynayır. Prezident İlham Əliyev sosial məsələlərin həlli istiqamətində görülən işlərdən, yoxsulluğun səviyyəsinin azaldılmasından, qeyri-neft sektorunun inkişafından da danışdı. Xarici sərmayədarlar üçün Azərbaycanın qeyri-neft sektorunun da maraqlı olduğunu deyən Prezident İlham Əliyev son 3 ildə 520 min yeni iş yerinin açıldığını bildirdi. Dövlətimizin başçısı alman biznesi üçün Azərbaycanda yaxşı tərəfdaşlar olduğunu vurğulayaraq dedi ki, Almaniya şirkətləri ölkəmizdəki əlverişli imkanlardan istifadə edərək, sərmayə qoya bilərlər. Bu forumdan sonra iş adamları arasında sazişlər imzalanacaq, əlaqələr daha da genişlənəcəkdir.
Prezident İlham Əliyev Neft Fondunun fəaliyyətindən, Bakı-Tbilisi-Qars dəmir yolu layihəsinin əhəmiyyətindən, Şərq-Qərb dəhlizində Azərbaycanın rolundan da danışaraq dedi ki, bütün bu layihələrin təşəbbüskarı Azərbaycandır və biz bununla fəxr edirik.
Avropanın enerji təhlükəsizliyinin təmin olunmasında Azərbaycanın rolu böyükdür, Avropa İttifaqı ilə “Yeni qonşuluq siyasətinə dair fəaliyyət planı” və enerji məsələləri üzrə strateji tərəfdaşlığa dair anlaşma memorandumu imzalanmışdır.
Dövlətimizin başçısı son iki ildə Almaniya ilə iqtisadi əlaqələrin xeyli genişləndiyini və gələcəkdə daha da inkişaf edəcəyini bildirdi və forumun işinə uğurlar arzuladı.
Sonra forum öz işini davam etdirdi. İqtisadi inkişaf naziri Heydər Babayev “Azərbaycan iqtisadiyyatı: perspektivlər və ikitərəfli əməkdaşlıq” mövzusunda çıxış etdi, “Azərbaycanda investisiya mühiti, ticarət və biznes imkanları” mövzusunda təqdimat keçirildi. Sonra açıq müzakirələr oldu.
Biznes forumda qeyri-neft sektorunun müxtəlif sahələrinə aid bir neçə saziş imzalanmışdır. “Bakıelektrikşəbəkə” ilə “Siemens AG“ arasında imzalanan və 30 milyon avro dəyəri olan saziş Azərbaycanda elektrik stansiyasının tikilməsini nəzərdə tutur.
Azərbaycanın “İmprotex Tracks and Buses“ şirkəti Almaniyanın “Liebnerr-Export AG” şirkəti ilə eksklüziv təmsilçilik, “Man“ şirkəti ilə 3 milyon avro dəyərində nəqliyat vasitələrinin alışı, “Faun“ şirkəti ilə eksklüziv təmsilçilik və 2,3 milyon avro dəyərində nəqliyyat vasitələrinin alışı, “Naxçıvan Mebel Fabriki” Almaniyanın “Bio Ethanol Arneburq“ şirkəti ilə Azərbaycanda birgə müəssisənin yaradılması haqqında saziş, “ADES” Azərbaycan-Almaniya birgə müəssisəsi Almaniyanın “Mark.AT” şirkəti ilə əməkdaşlıq barədə memorandum imzalamışdır.
“Bakı Tələbat Qabları” Almaniyanın “Remax” şirkətindən 450 min avro dəyərində press-formaların alınması haqqında, “Karvan-L” şirkəti “Clariant Iberica SA” şirkətinə 250 min ABŞ dolları məbləğində kimyəvi məhsulların satışı barədə saziş imzalamışdır. Bundan əlavə, biznes forumunda bir sıra Azərbaycan və Almaniya şirkətləri arasında əməkdaşlıq haqqında ilkin razılıq əldə olunmuşdur.
Bölmənin digər xəbərləri
