Azərbaycan basketbol millisinin baş məşqçisi: “Sabah” və "Neftçi"dən avrokuboklarda qələbə gözləyirəm
Bakı, 15 oktyabr, AZƏRTAC
Komandalarımız bu gün Avropada öz sözünü demiş iddialı rəqiblərlə üz-üzə gələcəklər. Bu gün klublarımızdan yalnız qələbə gözləyirəm.
Bu sözləri AZƏRTAC-a açıqlamasında kişi basketbolçulardan ibarət Azərbaycan millisinin baş məşqçisi Tahir Baxşıyev bu gün Avropa Kubokunda mübarizəyə başlayacaq "Neftçi" və Çempionlar Liqasında ikinci oyununu keçirəcək “Sabah” klublarının şanslarını dəyərləndirərkən deyib.
Mütəxəssis Polşada "Trefl" klubu ilə üz-üzə gələcək “Neftçi”nin yeni mövsüm üçün yaxşı heyət formalaşdırdığını və bunun avrokuboklarda yüksək nəticə üçün vacib amil olduğunu vurğulayıb: “Neftçi” Avropa Kubokunda debüt görüşünə çıxacaq. Komandanın təcrübəsi azdır. Amma yaxşı heyət formalaşdırıblar. Ölkə çempionatındakı oyunlarını izləmişəm. Çox yaxşı təsir bağışlayırlar. Rəqib isə avrokuboklarda kifayət qədər təcrübəlidir. Sözsüz ki, çox çətin görüş olacaq. Amma inanıram ki, basketbolçular əllərindən gələni edəcəklər. Çünki “Neftçi”nin olduqca yaxşı heyəti var. Oyunçular keyfiyyətlidir və komandada potensial hiss olunur. Fikrimcə, bu matçda şanslar bərabərdir”.
O, Çempionlar Liqasında Almaniya təmsilçisi "Alba" ilə Bakıda qarşılaşacaq “Sabah”ın da uğurlu nəticə əldə edəcəyinə inandığını söyləyib: “Sabah” tanınmış və təcrübəli rəqibə qarşı çətin matça çıxacaq. Düşünürdüm ki, komandamız ilk matçda qalib gəlib, Çempionlar Liqasına qələbə ilə başlayacaq, amma alınmadı. Fikrimcə, ilk qarşılaşma olduğu üçün həyəcan var idi və öz oyunlarını göstərə bilməmişdilər. Amma “Sabah” çox yaxşı heyətə malik klubdur. Bu gün öz meydanlarında mübarizə aparacaqlar. Təbii ki, azarkeşlərin dəstəyi müəyyən qədər komandaya kömək edə bilər. Hər bir halda gərgin matç izləyəcəyik. İnanıram ki, komandamız bu qarşılaşmada qalib gələ bilər”.
T. Baxşıyev sabah Avropa Kubokunda mübarizəyə başlayacaq Azərbaycanın digər təmsilçisi “Abşeron Lions”dan da yaxşı nəticə, ən əsası, qələbə gözlədiyini bildirib.
Qeyd edək ki, Milli Gimnastika Arenasında təşkil olunacaq "Sabah" - "Alba" matçı saat 20:00-da, Soport şəhərində yerləşən “Sopot Centennial” İdman Zalında keçiriləcək "Trefl" - "Neftçi" görüşü isə Bakı vaxtı ilə saat 21:15-də başlayacaq.
Bölmənin digər xəbərləri
