AZƏRBAYCAN BƏSTƏKARININ YUBİLEYİ ALMANİYADA QEYD EDİLƏCƏK
Arif Mirzəyev Bakıda anadan olmuş, burada musiqi təhsili almışdır. Onun müəllimi dahi bəstəkarımız professor Qara Qarayev olmuşdur. O, hazırda Qərbdə “Şərqin və Qərbin meditativ neorenessans və dini musiqisinin çoxüslubluluğu” adlandırılan parlaq fərdi üsluba malik bəstəkar kimi məhz indiki Bakı Musiqi Akademiyasında formalaşmışdır. Onun üslubuna bu tərifi Almaniyanın görkəmli avanqardçı bəstəkarı, müasir musiqi laboratoriyasının direktoru, “Leypsiq-Opera”nın baş dirijoru professor Udo Simmerman vermişdir.
1975-ci ildən Moskvada yaşayan Arif Mirzəyevin əsərləri arasında “İ.S. Baxın xatirəsinə orqan simfoniyası”, Bakıda 1990-cı il Yanvar faciəsi və Qarabağ soyqırımı qurbanlarının xatirəsinə həsr olunmuş “Yanvar mərsiyələri”, “Xocalı uşaqlarına layla”, orqan üçün “Şahzadə Dianaya sarabanda”, nəhayət, ABŞ-dakı 11 sentyabr faciəsinə həsr edilmiş sonuncu ən iri əsəri - kamera orkestri və iki solist üçün “Nyu-York passionları–2001” əsərlər var.
Lakin ona şöhrət gətirən əsəri 1984-cü ildə yaratdığı məşhur “İ.S.Baxın xatirəsinə orqan simfoniyası” olmuşdur. Dahi alman bəstəkarının 300 illiyinə “ornamental-muğam, xoral və polifonik variasiyalar” formasında bəstələnmiş bu simfoniya son 20 il ərzində dünyanın müxtəlif ölkələrində rekord sayda səsləndirilmişdir.
Hazırda Arif Mirzəyev Almaniyanın Hessen əyalətindəki qədim Fulda şəhərində yaşayır və işləyir. Bu ölkəyə orqan ifaçılığını təkmilləşdirmək üçün gəlmiş bəstəkar xüsusi kilsə orqan musiqisi məktəblərində davamlı təhsil almalıdır. Lakin mütəxəssislərin fikrincə, Azərbaycan bəstəkarının orqanda bədahətən improvizasiya məharəti güclüdür, bu keyfiyyət olmadan isə kilsə orqançısı olmaq çox çətindir. Arif Mirzəyevin 2004-cü il fevralın 15-də Fulda şəhərinin kilsəsində xorla ibadət zamanı orqan çalması sensasiya doğurmuşdur. Çünki həmvətənimiz başqa dini konfessiyanın məbədində orqan çalan ilk müsəlman bəstəkar və orqançıdır.
Arif Mirzəyev Azərbaycan musiqisinə həsr edəcəyi ilk yubiley konsertini Berlində verəcəkdir. Bəstəkar böyük konsert salonunda hələlik improvizəçi pianoçu kimi çıxış edəcəkdir. Proqramda Üzeyir Hacıbəyovun, Qara Qarayevin, Fikrət Əmirovun, Tofiq Quliyevin, habelə Amerika cazının, populyar dünya kino müsiqisinin ən yaxşı nümunələri səslənəcəkdir. Sonra bəstəkar Almaniya, Avstriya, İsveçrə, Belçika, Hollandiya və Fransanın ən iri kilsələrində solo orqan konsertləri ilə çıxış edəcəkdir.
Arif Mirzəyev Qərb ölkələrində polifonist bəstəkar, Azərbaycanın dini-xatirə, orqan və polifonik musiqisinin, habelə islam mərsiyə musiqisinin banisi kimi tanınmışdır. Onun “İ.S.Baxın xatirəsinə orqan simfoniyası” və “Yanvar mərsiyələri” dünya musiqi mədəniyyətində əsl kəşf kimi dəyərləndirilmiş, müəllif isə beynəlxalq statuslu “İ.S.Baxın varisləri” xatirə gümüş medalına layiq görülmüşdür.
Bəstəkar Almaniyada “İ.S.Bax adına yeni beynəlxalq musiqi cəmiyyəti”nin fəxri üzvləri sırasına qəbul olunmuşdur.
Həmvətənimizi yubileyi münasibətilə təbrik edirik.
Bölmənin digər xəbərləri
