AZƏRBAYCAN BODİBİLDİNQÇİLƏRİ AVROPA ÇEMPİONATINDA İKİ GÜMÜŞ, İKİ BÜRÜNC MEDAL QAZANMIŞLAR
AZƏRTAC xəbər verir ki, mayın 6-da Bakı İdman Sarayında başa çatan bodibildinq, klassik bodibildinq və qarışıq cütlüklər üzrə Avropa çempionatı Azərbaycan idmançıları üçün uğurlu olmuşdur.
Azərbaycan komandası yarışda iki gümüş, iki bürünc medala layiq görülmüşdür.
Yarışların təntənəli açılış mərasimində Beynəlxalq Bodibildinq və Fitness Federasiyasının (İFBB) prezidenti Rafael Santoxa Bakının qitə çempionatını yüksək səviyyədə təşkil etdiyini vurğulayaraq, bunu Azərbaycan idmanının inkişafında mühüm tarixi hadisə kimi qiymətləndirmişdir. Göstərdiyi köməyə görə Azərbaycan hökumətinə minnətdarlığını bildirən qonaq, İFBB adından Azərbaycan Bodibildinq və Fitness Federasiyasının prezidenti Rauf Bünyadəliyevi xüsusi medalla təltif etmişdir.
Gənclər və idman nazirinin müavini İsmayıl İsmayılov son illər Azərbaycan idmanında görünməmiş inkişaf meyillərini diqqətə çatdıraraq, respublikamızın bir çox mötəbər turnirlərə ev sahibliyi etdiyini xatırlatmışdır.
Klassik bodibildinq üzrə yarışlarda Azərbaycan yığmasının heyətində Teymur Aslanov (178 sm) bürünc medala layiq görülmüşdür.
Bodibildinq üzrə yarışlarda isə Yalçın Məmmədov (70 kq) və Vüqar Verdiyev (85 kq) gümüş, Tair Faxruddinov (80 kq) isə bürünc medala sahib olmuşlar.
İdmançılarımızın yarışdığı çəki dərəcələrində birinci yeri Rusiya idmançıları - Aleksandr Eskin (70 kq), İqor Losev (80 kq) və Aleksandr Kodzoyev (85 kq) tutmuşlar.
Ümumiyyətlə, qitə çempionatında ən yüksək nəticəni də 8 qızıl, 2 gümüş medal qazanmış Rusiya atletləri göstərmişlər.
Bölmənin digər xəbərləri
