Azərbaycan diasporunun təmsilçiləri Duysburq-Essen Universitetində müzakirələr aparıblar
Berlin, 30 aprel, AZƏRTAC
Almaniyadakı diasporumuzun fəal üzvlərindən olan Ruhr Universiteti Boxumun baş dosenti, iqtisadiyyat üzrə tədqiqatçı və Almaniya Azərbaycanlıları Alyansının İdarə Heyətinin üzvü Elxan Riçard Sadıxzadə, eləcə də Avropa Azərbaycan Mərkəzinin sədri, beynəlxalq insan hüquqları üzrə ixtisaslaşmış hüquqşünas və Alyansın İdarə Heyətinin üzvü Zaur Əliyev Duysburq-Essen Universitetinin nəzdində fəaliyyət göstərən Türk Araşdırmaları və İnteqrasiya Tədqiqatları Mərkəzinin (ZfTI) dəvəti ilə bu nüfuzlu elmi-tədqiqat müəssisəsinin qonağı olublar.
AZƏRTAC xəbər verir ki, həmyerlilərimiz Mərkəzin “İqtisadiyyat və bələdiyyə iştirakı” proqramının rəhbəri, eyni zamanda, miqrasiya, inteqrasiya və sosial iştirak sahəsində aparıcı ekspertlərdən olan Cem Şentürk ilə görüşüblər.
Görüşdə Almaniyada Cənubi Qafqaz Araşdırmaları İnstitutunun yaradılması təşəbbüsü ilə bağlı fikir mübadiləsi aparılıb. Vurğulanıb ki, belə bir institut təkcə elmi-tədqiqat baxımından deyil, həm də mədəniyyətlərarası dialoq və maarifləndirmə baxımından strateji əhəmiyyət daşıyır. Bu institutun yaradılması, xüsusilə enerji təhlükəsizliyi, regional iqtisadi transformasiya, nəqliyyat-logistika infrastrukturu, dayanıqlı resurs idarəçiliyi, ətraf mühitin qorunması, rəqəmsal keçid, urbanizasiya, mədəni irs və sosial inteqrasiya kimi sahələrdə çoxşaxəli tədqiqatları əhatə edəcək.
Elxan Riçard Sadıxzadə Cənubi Qafqaz regionunun geoiqtisadi əhmiyyətinə diqqət çəkərək qeyd edib ki, bu bölgə Avropanın enerji təhlükəsizliyi, alternativ marşrutların inkişafı və regional sabitlik baxımından mühüm potensiala malikdir. Belə bir institut təkcə akademik müstəvidə deyil, siyasi qərarların elmi əsaslı formalaşması üçün də bilik bazası rolunu oynaya bilər.
Zaur Əliyev qeyd edib ki, Avropadakı elmi ictimaiyyət və qərarverici institutlar Cənubi Qafqaz barədə əsasən fraqmentar və bəzən qərəzli təsəvvürlərə malikdir. Bu baxımdan institut vasitəsilə bölgənin real vəziyyəti, sosial-mədəni strukturu və tarixi irsi obyektiv şəkildə təqdim oluna, stereotiplər elmi əsaslarla aradan qaldırıla bilər. O, bu təşəbbüsün elm və vətəndaş cəmiyyətinin qarşılıqlı əlaqəsini gücləndirmək baxımından da önəmini qeyd edib.
Cem Şentürk bu təşəbbüsü alqışlayıb və ZfTI-nin belə bir layihəyə dəstək verməyə hazır olduğunu ifadə edib. O bu institutun təkcə akademik tədqiqatlar aparmaqla kifayətlənməyəcəyini, həm də Avropada yaşayan gənc nəsil üçün təhsil və təcrübə platforması rolunu oynayacağını vurğulayıb. Bu cür təşəbbüslərin Avropadakı elmi plüralizmi gücləndirdiyi, müxtəlif regionlara dair biliklərin balanslı şəkildə təqdim olunmasına şərait yaratdığı qeyd olunub.
Görüşdə qarşılıqlı maraq doğuran mövzularda konkret əməkdaşlıq formatlarının strukturlaşdırılması qərara alınıb.
Qeyd edək ki, Cem Şentürk uzun illərdir Almaniyada müxtəlif sosial qrupların əmək bazarına və yerli idarəetməyə inteqrasiyası üzrə layihələrə rəhbərlik edir. O, həmçinin Şimali Reyn-Vestfaliya əyalətinin Polis və İctimai İdarəetmə Ali Məktəbində (HSPV NRW) “Miqrasiya və inteqrasiya” üzrə mühazirələr deyir. Onun rəhbərlik etdiyi proqramın əsas strategiyası demokratik iştirakın təşviqi, bələdiyyə səviyyəsində vətəndaş cəlbediciliyinin artırılması və sosial müxtəlifliklər arasında əməkdaşlığın gücləndirilməsi üzərində quurlub.
Berlin
Bölmənin digər xəbərləri
