AZƏRBAYCAN FİTOSANİTAR NƏZARƏTİ XİDMƏTİNİN ƏMƏKDAŞLARI TÜRKİYƏDƏ TƏCRÜBƏ MÜBADİLƏSİ APARIRLAR
Nazirliyin baş məsləhətçisi Eldəniz Cəfərlinin rəhbərlik etdiyi mütəxəssislər qrupu Türkiyənin Kənd Təsərrüfatı Nazirliyinin “Bitki sanitariyası və karantini” layihəsi çərçivəsində Ankarada yerləşən və Avropada ən zəngin təcrübəyə malik olan laboratoriyaların iş prinsipi ilə tanış olmuş, öz biliklərini daha da zənginləşdirmişlər. Layihənin Türkiyə tərəfdən baş məsləhətçisi Əhməd Dəmirçi 2001-ci ilin avqustundan TİKA-nın maliyyə dəstəyi ilə ölkəmizdə həyata keçirilən layihənin 3 əsas komponenti olduğunu bildirmişdir. Bunlar, müasir standartlara cavab verən Bakı, Astara və Samur laboratoriyalarının qurulması, bitki mühafizəsi sahəsində qanunvericilik bazasının yaradılması və təlim kurslarının keçirilməsidir. Ümumilikdə, layihənin həyata keçirilməsinə 300 min dollar vəsait ayrılmışdır. Bugünədək təşkil olunmuş təlim kurslarına isə Azərbaycan Kənd Təsərrüfatı Nazirliyinin 63 əməkdaşı cəlb olunmuşdur. Qanunvericilik bazasına gəldikdə isə, ölkələrimizin mütəxəssislərinin hazırladıqları 2 əsasnamə artıq qəbul olunmuş, daha 5 əsasnamə üzərində işlər tamamlanmaq üzrədir. Təlim kurslarını bitirmiş mütəxəssislər bitki karantini sahəsində müfəttişliyin əsas bazasını təşkil edəcəklər.
Ankarada elmi tədqiqat institutlarının fəaliyyətini öyrənən qrup Türkiyənin sərhəd məntəqələrində bitki karantini prosesləri ilə də yaxından tanış olacaq, müxtəlif xəstəliklərin daşıyıcısı olan kənd təsərrüfatı məhsullarının ölkəyə girişinin qarşısının alınması yollarını öyrənəcəklər.
Qrupun başçısı Eldəniz Cəfərli TİKA-da təşkilatın rəhbərləri ilə görüşmüş, azərbaycanlı mütəxəssislərə yaradılmış bu imkana görə təşəkkürünü bildirmişdir.
Bölmənin digər xəbərləri
