Azərbaycan güləşçiləri Avropanın ən güclü olduqlarını bir daha təsdiqlədilər - ŞƏRH
Bakı, 1 may, AZƏRTAC
Prezident İlham Əliyevin Avropa çempionatında komanda hesabında qalib olan güləşçilərimizi qəbul etməsi ölkəmizdə idmanın inkişafına verdiyi xüsusi önəmin bariz nümunəsidir. Albaniyanın paytaxtı Tiranada keçirilən Avropa çempionatında Azərbaycan millisinin 6-cı dəfə Avropa çempionu olması güləşçilərimizin qitənin ən güclü olduqlarını bir daha təsdiqlədi. Yunan-Roma güləşi üzrə millinin ardınca sərbəst güləş üzrə yığmamız da Avropanın zirvəsini fəth etdi. Millimiz Albaniyada medalların əyarına görə son 17 ilin ən yaxşı nəticəsinə imza atıb: 3 qızıl, 2 gümüş və 1 bürünc medal. Bu, 2009-cu ildən bu yana Avropa çempionatında sərbəst güləşdə ən yaxşı göstəricimizdir. Beləliklə, Azərbaycan 2022 və 2025-ci illərdə olduğu kimi, həm yunan-Roma, həm də sərbəst güləş üzrə komanda hesabında Avropa çempionu olaraq qızıl dubla imza atıb.
Bu fikirləri AZƏRTAC-a açıqlamasında Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə deyib.
Hüquq müdafiəçisi deyib ki, bu, Azərbaycan Prezidenti, Milli Olimpiya Komitəsinin prezidenti İlham Əliyevin ölkəmizdə idmanın inkişafına göstərdiyi xüsusi diqqət və qayğının nəticəsidir. İdmançılarımız müxtəlif idman növləri üzrə Avropa, Dünya və Olimpiya oyunlarında, həmçinin nüfuzlu beynəlxalq yarışlarda qalib adını qazanaraq Azərbaycanın Bayrağının ən yüksəkliyə qaldırılmasına və Dövlət Himnimizin səsləndirilməsinə nail olurlar. Qalib güləşçiləri təbrik edən dövlətimizin başçısı bu qələbənin bizim hamımızı sevindirdiyini dedi: “Avropa çempionatında komanda hesabında birinci olmaq, əlbəttə ki, böyük nailiyyətdir. Xüsusilə, nəzərə alsaq ki, bu gün həm dünyada, həm Avropada güləş üzrə mübarizə daha gərgin keçir, bir çox ölkələrdən olan tanınmış güləşçilər böyük nəticələr göstərirlər və mübarizə də çox gərgin idi. Bəzi yarışları mən də izləmişəm və görmüşəm ki, bizim idmançılarımız öz peşəkarlığını göstərərək rəqibləri ədalətli mübarizədə məğlub etmişlər. Bu, əlbəttə, bütün xalqımızı sevindirir və bir daha göstərir ki, güləşimiz uğurla inkişaf edir”.
Ç.Qənizadə güləşimizin böyük ənənələri olduğunu vurğulayaraq deyib ki, idmançılarımız bu gün də bu ənənələri yaşadırlar. Hazırda təcrübəli güləşçilərlə bərabər gənc güləşçilərimizin də böyük nəticələr əldə etməsi idmanın bu növünün sürətlə inkişaf etməsindən xəbər verir. Hər dəfə nüfuzlu turnirlərdə, Avropa, Dünya və Olimpiya oyunlarında Dövlət bayrağımız ən yüksəkliyə qaldırılanda və Dövlət Himnimiz səsləndiriləndə bütün Azərbaycan xalqı qürur hissi keçirir, sevinir. Bu qələbə sevincini xalqımıza idmançılarımız bəxş edir və bu da, öz növbəsində, gənc nəsli vətənpərvərlik ruhunda tərbiyə etmək üçün çox önəmli amildir. İdman, ümumiyyətlə, cəmiyyətimizin ayrılmaz hissəsidir və xüsusilə son illər ərzində idmanda gedən müsbət proseslər, əlbəttə ki, hamımızı sevindirir.
Tanınmış hüquqşünas Prezident İlham Əliyevin Azərbaycan idmanının ümumi inkişafından da söhbət açdığını vurğulayıb: “Prezident dedi ki, həm Olimpiya Oyunlarında, həm də dünya, Avropa çempionatlarında bizim idmançılarımız ölkəmizi ləyaqətlə təmsil edirlər. Əlbəttə ki, uğurlarla bərabər məğlubiyyətlər də olur. Amma idmanda hər şey mümkündür. Əsas odur ki, idmançılarımızda qələbə əzmi çox güclüdür və bir daha ölkəmizin ümumi inkişafını əks etdirir. Bu gün qalib dövlət və qalib xalq kimi yaşayan dövlətimiz, xalqımız, o cümlədən idman uğurları ilə fəxr edir”. Ölkə başçısı, eyni zamanda, 30 ilə yaxın müddət ərzində Azərbaycan Olimpiya Komitəsinə rəhbərlik etdiyini və bu müddət ərzində bir çox müsbət məqamların olduğunu xatırlatdı. Qeyd etdi ki, idmanın dayanıqlı inkişafı, uğurlarımızın ardıcıl şəkildə davam etməsi və gənc nəslin yetişməsi – hər şey onun gözləri önündən keçib.
Hüquq müdafiəçisi dövlətimizin başçısının çıxışına istinadla deyib ki, ölkəmizdə keçirilən idman yarışları idman növlərini daha da populyarlaşdırır. Bu sahədə bizim zəngin təcrübəmiz var və respublikamızda çox nüfuzlu beynəlxalq yarışlar keçirilib. Həm Avropa Oyunları, həm İslam Həmrəyliyi Oyunları, keçən il MDB Oyunlarının paytaxtda yox, bölgələrdə keçirilməsi Azərbaycanın reytinqli turnirlərin keçirilməsinə hazır olmasından xəbər verir. Dövlətimizin başçısı gələcəkdə də qızlarımızın qızıl medal qazanacaqlarına əminliyni ifadə edib.
Ç.Qənizadə dövlətimizin başçısının Avropa yarışlarında Azərbaycan idmançılarına qarşı ədalətsizlikdən də söhbət açdığını xatırladıb: “Azərbaycan Prezidenti dedi ki, yəqin ki, Avropada heç də hamı Azərbaycanın Avropa çempionatlarında iştirak etməsinə və təkcə iştirakına deyil, həm də bütün Avropa ölkələrinə qalib gəlməsinə sevinmir. Məhz bu səbəbdən bir daha məmnunluqla qeyd etmək və arzulamaq istərdim ki, harada olmağınızdan asılı olmayaraq, - xalça üzərində və xalçadan kənarda, - layiqli davranış prinsiplərinə daim sadiq qalmağa davam edəcəksiniz. Bu, ölkəmizi təmsil edən bütün idmançılara aiddir”.
Bölmənin digər xəbərləri
