Bakı, 7 noyabr, Rabil Kətanov, AZƏRTAC

Azərbaycanın tarixində əlamətdar və tarixi qələbə günləri çoxdur. Bu günlər xalqımızın tarixi inkişaf prosesində nümayiş etdirdiyi şücaətin göstəriciləridir. Tarixi günlərin sırasına 8 Noyabr - Zəfər Gününü yazdıran Prezident, Müzəffər Ali Baş Komandan İlham Əliyev retrospektiv baxımından analoqu olmayan, hərbi, siyasi və diplomatik cəhətdən möhtəşəm, Azərbaycan dövlətinin gələcəyi üçün isə olduqca əhəmiyyətli strategiya həyata keçirdi. 2020-ci il sentyabrın 27-dən başlayan Zəfər yürüşü noyabrın 8-də Şuşanın işğaldan azad edilməsi ilə yekunlaşdı. Müzəffər Ali Baş Komandan İlham Əliyevin “irəli” əmri ilə ordumuz 44 gün ərzində erməni işğalçılarını torpaqlarımızdan qovdu və Azərbaycanın ərazi bütövlüyü 28 ildən sonra bərpa edildi.

Şuşanın işğaldan azad edilməsi əməliyyatı müasir müharibələri təhlil edən hərbi ekspertlər tərəfindən yüksək qiymətləndirildi. Ordumuzun xüsusi təyinatlıları bir nəfər də olsun mülki erməniyə zərər vurmadan sıldırım qayalar üzərindəki Şuşa şəhərini azad etdilər.

Vətən müharibəsi dövründə qəhrəman Azərbaycan Ordusu Cəbrayıl, Füzuli, Zəngilan, Qubadlı şəhərlərini, ümumilikdə 300-dən çox yaşayış məntəqəsini işğaldan azad etdi. 2020-ci il noyabrın 10-da Azərbaycan, Rusiya və Ermənistan liderlərinin imzaladıqları üçtərəfli Bəyanatla hərbi əməliyyatlara son qoyuldu və Ermənistan öz məğlubiyyətini etiraf edərək Kəlbəcər, Ağdam və Laçın rayonlarından silahlı qüvvələrini çıxardı. Beləliklə, münaqişə hərbi-siyasi yolla həllini tapdı.

Prezident İlham Əliyevin 2020-ci il 3 dekabr tarixli Sərəncamı ilə xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət daşıyan Qələbənin əbədiləşdirilməsi məqsədilə hər il noyabrın 8-i Azərbaycan Respublikasında Zəfər Günü kimi təntənəli şəkildə qeyd olunmağa başlandı.

Müharibədən sonra Azərbaycanın qarşısında azad olunmuş ərazilərinin yenidən qurulması və bərpası, minalardan təmizlənməsi kimi mühüm vəzifə dayanırdı. Bu işlərin mərkəzində onilliklər ərzində fundamental hüquqları pozulan azərbaycanlı məcburi köçkünlərin öz evlərinə təhlükəsiz və ləyaqətli şəkildə geri dönüşü dayanır. Artıq məcburi köçkünlər tədricən öz doğma yurdlarına qayıdırlar. Şuşada, Cəbrayılda, Füzulidə, Ağdamda, Zəngilanda və azad olunan digər rayonlarda geniş quruculuq işləri həyata keçirilir - universitet, məktəblər, uşaq bağçaları, xəstəxanalar, hava limanları fəaliyyətə başlayıb. Minlərlə insan uzun illər həsrətində olduğu doğma el-obasında yaşamağa davam edir.

Ermənistan tərəfindən törədilən qeyri-qanuni fəaliyyətin, beynəlxalq hüquq pozuntularının, müharibə cinayətlərinin araşdırılması və bu pozuntulara görə məsuliyyət daşıyanların beynəlxalq ədalət qarşısında cavab vermələri üçün Azərbaycan tərəfindən müvafiq addımlar atılır, bu addımlar növbəti mərhələdə də davam edəcək.

Azərbaycanın gələcəyə baxış strategiyasının əsasını dayanıqlı sülh, inkişaf və tərəqqinin təmin olunması təşkil edir. Ərazilərinin işğalı amilinin aradan qaldırılması ilə Azərbaycan beynəlxalq hüququn normalarına, xüsusilə də suverenlik, ərazi bütövlüyü, beynəlxalq sərhədlərin toxunulmazlığı prinsiplərinə ciddi riayət edilməsi əsasında Ermənistanla münasibətlərin normallaşmasına hazırdır. Bölgədə gələcək sülhün və təhlükəsizliyin təminatı üçün hazırkı mərhələdə üçtərəfli Bəyanatın tam şəkildə icrası vacibdir və Azərbaycan bu istiqamətdə atdığı addımlara Ermənistan tərəfindən qarşılıq verilməsini gözləyir.

Münaqişənin bitməsi ilə Cənubi Qafqaz regionunda yeni reallıqlar yaranıb və hər kəs bunu qəbul etməlidir. Ermənistan regional əməkdaşlıq və qonşularına qarşı qanunsuz, əsassız ərazi iddiaları arasında seçim etməlidir. Beynəlxalq ictimaiyyət bu mənada müsbət rol oynamalı və sülhün alternativinin olmamasını anlaması üçün Ermənistana çağırış etməlidir. Ermənistanda revanşizmin və onun silahlandırılmasının birbaşa və ya dolayı şəkildə dəstəklənməsi cəhdlərinə son qoyulmalıdır.

Azərbaycanın qazandığı Qələbənin əsas mahiyyəti ondan ibarətdir ki, ölkəmizin təhlükəsizliyi təmin edildi. Azərbaycan dünyaya sübut etdi ki, beynəlxalq hüququ təmin etmək üçün dövlətin iqtisadi və hərbi gücü olmalıdır. Azərbaycanın suverenliyinin bir daha pozulmayacağına böyük zəmin yaradıldı.

Təəssüf ki, beynəlxalq aləmdə yürüdülən ikili standartlar siyasəti erməni revanşist qüvvələrin baş qaldırmasına rəvac verir. Azərbaycanın Qələbəsini həzm edə bilməyən xarici siyasi dairələr bu gün Ermənistana havadarlıq edərək yeni münaqişə ocağı yaradıb rəsmi İrəvanı geosiyasi oyunlara qatmağa çalışırlar. Azərbaycanın müstəqil siyasəti və sülh yollarını axtarması Qərbin bir sıra dövlətləri tərəfindən məmnunluqla qarşılanmadı. Rəsmi Bakının beynəlxalq hüquq pozuntusunun qarşısını alması qəbul edilmədi. Məsələnin mahiyyəti heç də Azərbaycanın haqlı və ya haqsız olmasında deyil. Qərb, həmçinin digər böyük dövlətlər Qarabağın Azərbaycana məxsus olduğunu çox yaxşı bilir və 1990-cı illərin əvvəllərində ölkəmizin hərbi təcavüzə məruz qaldığını unutmayıblar. Azərbaycana qarşı nümayiş etdirilən qeyri-adekvat mövqenin səbəbi odur ki, Qərb gündən-günə inkişaf edən ölkəmizi öz geosiyasi oyunlarında görmək istəyir. Azərbaycan vasitəsilə rəqiblərinə siyasi təzyiq göstərməyə çalışan Qərbin bir sıra dairələri ölkəmizin milli maraqlarını qətiyyən nəzərə almır. Azərbaycan isə balanslı xarici siyasət yürüdərək öz maraqlarını, xalqın rifahını, təhlükəsizliyini düşünür.

Bu gün inkişafının yüksək mərhələsini yaşayan müstəqil Azərbaycan artıq qlobal problemlərin həllində aparıcı rol oynamağa başlayıb. İqlim dəyişikliyinin dünya dövlətləri üçün törətdiyi problemlərin öhdəsindən ayrı-ayrılıqda gəlmək mümkün deyil. Quraqlıq, səhralaşma, daşqınlar və digər təbii fəlakətlər kənd təsərrüfatına, ümumilikdə iqtisadiyyata böyük zərər vurur ki, bu da insanların sosial həyatına çox mənfi təsir göstərir. Dünyamiqyaslı bu problemlərin həlli Prezident İlham Əliyevin həyata keçirdiyi siyasətdə prioritet təşkil edir. Bu baxımdan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının - COP29-un Azərbaycanda keçirilməsi təsadüfi xarakter daşımır. Azərbaycan dünya ictimaiyyətinə və dövlətlərinə qlobal problemin həlli üçün çağırış platforması təklif edir.

Prezident İlham Əliyevin yürütdüyü iqtisadi siyasət Azərbaycanı təkcə coğrafi deyil, həm də siyasi baxımdan Avropa ilə Asiyanın qovuşduğu məkana çevirib. Şərq-Qərb, Şimal-Cənub nəqliyyat dəhlizləri, Asiyadan Avropaya ixrac olunacaq yaşıl enerji məhz Azərbaycan ərazisindən tranzit nəql olunacaq. Bunların reallaşması üçün xarici şirkətlər tərəfindən Azərbaycana sərmayə yatırılır, infrastruktur layihələr həyata keçirilir.

Bu gün Azərbaycan Avropanın enerji təhlükəsizliyinin təmin olunmasında mühüm rol oynayır. Hazırda ölkəmiz Avropaya 14 milyard kubmetr qaz ixrac edir və 2026-cı ilədək qaz ixracının həcmi 20 milyard kubmetrə çatacaq.

Beləliklə, İkinci Qarabağ müharibəsində Zəfər qazanan Azərbaycan bu Qələbəni, sadəcə, hərbçilərə “irəli” əmri verməklə əldə etmədi. Bu, həmçinin Prezident İlham Əliyevin ordu quruculuğu, iqtisadi inkişaf, beynəlxalq təşkilatlarla səmərəli əməkdaşlığı və dəyişməz mövqeyi sayəsində mümkün oldu.

Azərbaycanı Zəfərə aparan 44 günlük Vətən müharibəsi zamanı Müzəffər Ali Baş Komandan İlham Əliyev, ilk növbədə, informasiya blokadasını yararaq həqiqəti obyektiv şəkildə dünya ictimaiyyətinə çatdırdı. Dövlətimizin başçısı 1 ay ərzində “CNN International”, “CNN-Türk”, “Sky News”, “Euronews”, “Əl-Cəzirə”, “Əl-Ərəbiyə” kimi dünyanın əsas televiziya kanallarına, o cümlədən Türkiyənin “TRT Haber”, Rusiyanın aparıcı “Rossiya-1”, “Pervıy Kanal”, RBK televiziya kanallarına müsahibələrində ermənilərin işğalçı siyasəti, mülki əhalini hədəfə alması, münaqişənin dinc vasitələrlə nizamlanmasından boyun qaçırması və qadağan olunmuş silahlardan atəş açması barədə ətraflı məlumat verdi. Eləcə də Yaponiyanın “Nikkei” qəzetinə, Amerikanın “Fox News” telekanalına, Fransanın “Figaro” qəzetinə, İtaliyanın “Rai-1” televiziya kanalına verdiyi müsahibələrində Qarabağ münaqişəsi ilə bağlı əsl həqiqətləri söyləyərək Azərbaycana qarşı feyk xəbərləri və qeyri-obyektiv şərhləri ifşa etdi.

Erməni lobbisinin təsiri ilə Azərbaycana 28 il təzyiq göstərən böyük qüvvələr Qarabağın Ermənistanın tabeliyində qalmasına nail ola bilmədilər. Azərbaycana təzyiq göstərməyə cəhd edənlər də ölkəmizin və xalqımızın iradəsini qırıb qeyri-konstruktiv siyasətlərinin nəticəsini görə bilməyəcəklər. Azərbaycan 2020-ci ildə hərbi sahədə necə qalib gəldisə, gələcəkdə, həmçinin siyasi və diplomatik sahələrdə də qələbələrini davam etdirəcək.