AZƏRBAYCAN İLƏ İSVEÇRƏ ARASINDA MÜNASİBƏTLƏR YÜKSƏK QİYMƏTLƏNDİRİLMİŞDİR
Xarici İşlər Nazirliyinin mətbuat mərkəzindən AZƏRTAC-a bildirmişlər ki, nazir Elmar Məmmədyarov Azərbaycanla İsveçrə Konfederasiyası arasındakı münasibətləri yüksək qiymətləndirmiş və ikitərəfli əlaqələrin möhkəmlənməsinə, əməkdaşlığın bir çox sahələrdə genişlənməsinə tərəfdar olduğunu bildirmişdir.
Sonra nazir Elmar Məmmədyarov Ermənistan-Azərbaycan, Dağlıq Qarabağ münaqişəsi və onun həlli istiqamətində görülən işlər və münaqişə nəticəsində doğma torpaqlarından didərgin düşmüş qaçqın və məcburi köçkünlərin ağır vəziyyəti barədə qonağa ətraflı məlumat vermiş, həmçinin bu münaqişənin beynəlxalq hüququn prinsip və normaları əsasında tezliklə həlli üçün beynəlxalq birliyin səylərinin artırılmasının vacibliyini qeyd etmişdir.
Görüş zamanı ölkəmizin xarici siyasət idarəsinin başçısı Elmar Məmmədyarov regiondakı vəziyyət, respublikamızda aparılan iqtisadi islahatlar, neft sənayesinin inkişafı və bu kimi sahələrdə görülən işlərin perspektivləri barədə ətraflı məlumat vermişdir.
Öz növbəsində Bleys Godet İsveçrə Konfederasiyasının Azərbaycan ilə hərtərəfli əlaqələrin genişlənməsinə böyük əhəmiyyət verdiyini diqqətə çəkmişdir. O, Ermənistan-Azərbaycan, Dağlıq Qarabağ münaqişəsinə toxunaraq, münaqişənin tezliklə beynəlxalq birliyin birgə səyləri əsasında sülh yolu ilə həll edilməsinə ümidvar olduğunu bildirmişdir.
Görüş zamanı, həmçinin ikitərəfli münasibətlərin müxtəlif istiqamətləri müzakirə edilmiş, beynəlxalq qurumlar çərçivəsində əməkdaşlığa dair fikir mübadiləsi aparılmışdır.
Bölmənin digər xəbərləri
