Azərbaycan ilə Ras Əl-Xeymə Əmirliyi arasında əməkdaşlıq üçün yaxşı potensial var VİDEO
Ras Əl-Xeymə, 28 mart, AZƏRTAC
Azərbaycanın Birləşmiş Ərəb Əmirliklərindəki (BƏƏ) səfiri Daşqın Şikarov Ras Əl-Xeymə Əmirliyinə işgüzar səfər edib.
Səfirlikdən AZƏRTAC-a bildiriblər ki, Daşqın Şikarov Ras Əl-Xeymə Əmirliyinin Əmiri Şeyx Səud bin Saqr Əl Qasimi ilə görüşüb. Diplomat Azərbaycan-BƏƏ əlaqələrinin inkişafı kontekstində turizm və investisiya sahələrində qarşılıqlı əməkdaşlıq üçün yaxşı imkanların mövcudluğunu əsas tutaraq, Azərbaycanın bu işbirliyi üçün hazır olduğunu diqqətə çatdırıb. Daşqın Şikarov ötən ilin noyabrından etibarən BƏƏ vətəndaşlarının Azərbaycana vizanı ölkəmizin istənilən hava limanında almaq hüququ əldə etməsi barədə qərarın münasibətlərimizin inkişafına mühüm təkan verəcəyini bildirib.
Səfir ötən iki ildə yüksək səviyyəli qarşılıqlı səfərlərin ikitərəfli əlaqələrin və əməkdaşlığın gücləndirilməsi baxımından əhəmiyyətini vurğulayıb. Ölkəmizdə sabitliyin və əmin-amanlığın qorunub saxlandığını xüsusilə qeyd edən D.Şikarov Azərbaycanda gedən iqtisadi tərəqqi, xüsusilə qeyri-neft sektorunun inkişafı, ölkəmizdə iş adamlarının fəaliyyəti üçün yaradılan münbit şərait barədə ətraflı məlumat verib. Diplomat Ras Əl-Xeymə Əmirliyinin iş adamlarını ölkəmizə investisiya yatırmağa dəvət edib.
Əmir Şeyx Səud Əl Qasimi ölkəmizin xüsusilə son illərdə nəzərəçarpan hərtərəfli inkişafı və böyük regional nüfuzu barədə məlumatlı olduğunu bildirib. O, Prezident İlham Əliyevin rəhbərliyi ilə həyata keçirilən tədbirləri yüksək qiymətləndirdiyini və bu fəaliyyətin ölkəmizdə sabitliyin və əmin-amanlığın başlıca amili olduğunu deyib. Azərbaycan ilə əməkdaşlıq üçün yaxşı potensialın olduğunu vurğulayan Əmir onu üzə çıxarmağa və turizm, investisiya, kənd təsərrüfatı kimi sahələrdə əməkdaşlığa hazır olduqlarını deyib. O, Azərbaycana səfər edəcəyini vəd edib.
Səfir D.Şikarov əzəli Azərbaycan torpaqları olan Dağlıq Qarabağın və ətraf rayonların Ermənistan tərəfindən işğalının bütünlükdə region üçün təhlükə törətdiyini Şeyx Səud Əl Qasiminin diqqətinə çatdırıb. Diplomat, həmçinin münaqişənin həllinə dair son durum barədə müfəssəl məlumat verərək Ermənistan rəhbərliyinin qeyri-konstruktiv mövqeyinin problemin həllində yeganə maneə olduğunu bildirib. D.Şikarov BƏƏ-nin Azərbaycanın haqq işinə davamlı dəstəyinin xalqımız tərəfindən yüksək qiymətləndirildiyini xatırladıb, Birləşmiş Ərəb Əmirliklərinin rəhbərliyinə və xalqına dərin təşəkkürünü bildirib.
Türkiyənin, Pakistanın, Səudiyyə Ərəbistanının işğalçı Ermənistan ilə diplomatik əlaqələr qurmadığını xatırladan səfir işğal zamanı Ermənistan silahlı qüvvələri, habelə hazırda bu ölkədə yüksək postlar tutan o vaxtkı səhra komandirləri tərəfindən törədilən qətliamlar, xüsusən Xocalı soyqırımı barədə ətraflı məlumat verib, erməni cəlladlarının əsasən də qadın, uşaq və qocalardan ibarət günahsız insanlara divan tutduqlarını diqqətə çatdırıb. Səfir, həmçinin Xocalı soyqırımının dünya səviyyəsində tanıdılması məqsədilə Heydər Əliyev Fondunun vitse-prezidenti Leyla Əliyevanın təşəbbüsü ilə başladılan “Xocalıya Ədalət” beynəlxalq təbliğat-təşviqat kampaniyasından geniş bəhs edib.
Münaqişənin həlli ilə bağlı Azərbaycanın mövqeyi barədə Şeyx Səud Əl Qasiminin sualına cavab olaraq səfir D.Şikarov ölkəmizin humanizm nümayiş etdirərək problemin danışıqlar və sülh yolu ilə həllinə tərəfdar olduğunu nəzərə çatdırıb.
Görüşdən sonra səfərin proqramına uyğun olaraq, Ras Əl-Xeymə Azad Ticarət Zonasında yerləşən Əmirliyin turizm və investisiya qurumlarında hər iki sektor üzrə mövcud imkanlar və perspektivlərə dair müvafiq təqdimatlar təşkil edilib, birgə əməkdaşlığın mümkün yolları ətrafında fikir mübadiləsi aparılıb.
Səfərlə bağlı məlumatlar “Al Khaleej”, “Al Bayan”, “Al Wast” rəsmi qəzetlərində və BƏƏ-nin WAM informasiya agentliyinin internet səhifəsində dərc edilib, “Şərca 24” televiziya kanalında nümayiş olunub.
Asya Hacızadə
AZƏRTAC-ın xüsusi müxbiri
Ras Əl-Xeymə
Bölmənin digər xəbərləri
