Azərbaycan ilə Rusiyanın Həştərxan vilayəti arasında əlaqələr yaxşı perspektiv vəd edir
Bakı, 14 aprel, Rabil Kətanov, AZƏRTAC
Həştərxan vilayəti Rusiya Federasiyasının iqtisadi cəhətdən inkişaf etmiş vilayətidir. Burada balıqçılıq, kənd təsərrüfatı, nəqliyyat, tranzit və logistika sahələri inkişaf edib.
Azərbaycan ilə Həştərxan vilayətinin iqtisadi-ticari əlaqələrinin də yüksələn xətlə inkişafı təsadüfi xarakter daşımır. Həştərxanın “Kutum” dəmir yolu stansiyasında 45 min kvadratmetr ərazini əhatə edən terminal fəaliyyət göstərir. İran və Hindistandan Rusiyaya daşınan yüklər Azərbaycandan tranzit keçərək bu terminalda cəmləşir və daha sonra digər vilayətlərə göndərilir. Yüklər əks istiqamətə də Azərbaycan ərazisindən ixrac edilir.
Rusiya Federasiyasının Həştərxan vilayəti ilə Azərbaycan hökuməti arasında iqtisadi-ticari, elmi-texniki və mədəniyyət sahələrində əməkdaşlıqla bağlı 2011-ci ildə razılaşma imzalanıb. Ötən il Həştərxan vilayəti ilə Azərbaycan arasında 2024-2026-cı illər üçün qarşılıqlı əməkdaşlıq əlaqələrinin genişləndirilməsi barədə proqram qəbul edilib.
Həştərxan vilayətinin xarici əlaqələr naziri Vladimir Qolovkov AZƏRTAC-a müsahibəsində bildirib ki, hazırda həmin proqram icra olunur. İqtisadi-ticari əlaqələr toxunan nazir vurğulayıb ki, Həştərxan vilayətindən Azərbaycana əsasən balıq və balıq məhsulları, gəmi tikintisi üçün materiallar, duz, mebel, elektrik cihazlar ixrac edilir. Azərbaycandan isə Həştərxan vilayətinə müxtəlif təyinatlı borular, meyvə-tərəvəz, elektrik avadanlıqları idxal edilir. 2023-2024-cü illər ərzində Həştərxan vilayətinin sahibkarları Azərbaycanın müvafiq qurumları ilə 670 min dollar dəyərində 10 müqavilə imzalayıblar. Bu müqavilələrə əsasən, Azərbaycana balıqçılıq təsərrüfatı və qida sənayesi məhsulları ixrac olunub. Hazırda Həştərxan vilayətində Azərbaycana məxsus 19 şirkət qeydə alınıb. Bu şirkətlər topdan ticarət, nəqliyyat, kənd təsərrüfatı, gəmiqayırma, sahələrində fəaliyyət göstərir. Həm yerli, həm də regiona sərmayə yatıran azərbaycanlı sahibkarlar Həştərxanda fəaliyyət göstərən Azərbaycan Biznes Mərkəzi ilə yaxından əməkdaşlıq edir, burada müxtəlif sərgilər, görüşlər, forumlar və digər tədbirlər keçirərək fəaliyyət dairələrini daha da genişləndirirlər.
Azərbaycanla Həştərxan vilayəti arasında humanitar sahədə də geniş əməkdaşlıq əlaqələri mövcuddur. Azərbaycan xalqının Ümummilli Lideri Heydər Əliyevin SSRİ Nazirlər Soveti Sədrinin birinci müavini vəzifəsində çalışdığı dövrdə bu regiona diqqətlə yanaşıb ki, bu gün vilayətin əhalisi görkəmli dövlət xadiminin xidmətlərini unutmur. Heydər Əliyev Fondunun burada həyata keçirdiyi humanitar layihələr isə istər Həştərxan şəhəri, istərsə də vilayət sakinləri tərəfindən rəğbətlə qarşılanır. Şəhərin mərkəzi hissəsində salınan park, uşaq əyləncə şəhərciyi, məktəb və uşaq bağçası, eləcə də Volqa çayının şəhərdən keçən qolu üzərindəki körpü əhalinin rahatlığını, istirahətini təmin edib, şəhərə xüsusi gözəllik verib.
Parkdakı müsahibimiz Tatyana Kisilyova deyib ki, əhalinin müraciətinə əsasən, şəhər administrasiyası parka Heydər Əliyevin adının verilməsi barədə qərar qəbul edib. Uşaqlar, yaşlılar burada vaxtlarını çox səmərəli keçirir, istirahət edirlər. “Dostluq” körpüsü isə həm şəhərə gözəllik verir, həm də sakinlərin əks tərəfə keçməsini asanlaşdırır. Əvvəllər digər tərəfə keçmək üçün 2 kilometr məsafəni qət etmək lazım gəlirdi, indi isə kanalın hər iki sahilinə asanlıqla gedib-gəlmək olur.
Volqa çayının sahilində yerləşən Həştərxan şəhərində yaşayan azərbaycanlılar da Heydər Əliyev Fondunun burada həyata keçirdiyi layihələrlə fəxr edirlər. Şəhər sakini və Azərbaycan diasporunun fəallarından olan Asəf Əliyev bildirib ki, Fondun işləri burada yaşayan azərbaycanlılara hörmətlə yanaşmanı şərtləndirir. Həştərxan Rusiyanın çoxmillətli regionudur və burada yaşayan azərbaycanlılar Vətənlə intensiv əlaqə saxlayırlar. Müxtəlif sahələrdə çalışan azərbaycanlılar vilayətin ictimai-siyasi həyatında da fəal iştirak edirlər.
Qeyd edək ki, AZAL Bakı-Həştərxan istiqamətində həftədə 3 reys həyata keçirir. Vilayətin xarici əlaqələr naziri Vladimir Qolovkov bildirib ki, 2024-cü il dekabrın 10-da vilayətin qubernatoru İqor Babuşkinin Azərbaycana səfəri zamanı 2025-ci ildən başlayaraq Bakı-Həştərxan və əks istiqamətə təyyarə reyslərinin sayının həftədə 5 dəfəyə çatdırılması haqqında razılıq əldə olunub.
Həştərxanın ali və orta ixtisas məktəblərində 844 Azərbaycan vətəndaşı təhsil alır. Müxtəlif təhsil müəssisələri Azərbaycanın 21 ali və orta ixtisas məktəbləri ilə əməkdaşlıq edir, təcrübə və tələbə mübadiləsi aparırlar.
Perspektiv baxımdan Həştərxan ilə Azərbaycan arasında iqtisadi-ticari əlaqələrinin daha da inkişaf edəcəyi gözlənilir. Həştərxanda fəaliyyət göstərən Azərbaycan Biznes Mərkəzinin təşəbbüsü ilə 2025-ci ildə vilayətin turizm şirkətlərinin rəhbərlərindən ibarət nümayəndə heyətinin Bakıya və Azərbaycanın rayonlarına səfəri təşkil olunacaq. Səfər çərçivəsində Azərbaycanın turizm potensialı öyrəniləcək, qarşılıqlı turist səfərlərinin təşkili müzakirə olunacaq. Dəmir yolu ilə Azərbaycan ərazisindən yükdaşımaların həcminin 1 milyon tona çatdırılması da nəzərdə tutulub.
İki qonşu və dost dövlətin regionlarının qarşılıqlı faydalı əməkdaşlıq əlaqələri ölkələr arasındakı xoş münasibətlərin, xalqların rifahının yaxşılaşmasının göstəricisidir. Bu gün dünyanın bir çox regionlarında silahlı toqquşmaların, münaqişələrin davam etdiyi bir vaxtda Azərbaycanın yaxın qonşuları ilə mehriban münasibətləri, bunun nəticəsi olaraq, sabitliyin təminatı və insanların millətindən, dinindən asılı olmayaraq, firavan yaşaması Prezident İlham Əliyevin həyata keçirdiyi praqmatik siyasətin ardıcıl şəkildə davam etdirilməsinin nəticəsidir.
Bölmənin digər xəbərləri
