Azərbaycan ilə Vyetnam arasında mədəniyyət, idman və turizm sahələrində əməkdaşlığın perspektivləri müzakirə edilmişdir
Bakı, 31 oktyabr (AZƏRTAC). Oktyabrın 30-da Azərbaycan Respublikasının Vyetnam Sosialist Respublikasındakı səfiri Anar İmanov bu ölkənin mədəniyyət, idman və turizm naziri Hoang Tuan Anh ilə görüşmüşdür.
Azərbaycan Respublikasının Xarici İşlər Nazirliyindən AZƏRTAC-a bildirmişlər ki, Hoang Tuan Anh Azərbaycanın Vyetnamda səfirliyinin təsis olunmasının iki ölkə arasında münasibətlərin inkişaf etdirilməsi baxımından vacibliyini bildirmişdir. O, ölkələrimiz arasında əməkdaşlığın böyük tarixə malik olduğunu və ikitərəfli münasibətlərin bundan sonra intensivləşəcəyinə inandığını söyləmişdir.
Səfir Anar İmanov Azərbaycanın turizm potensialı və turizm infrastrukturunun inkişaf etdirilməsi üçün görülən işlər barədə həmsöhbətinə məlumat vermişdir.
Görüş əsnasında xalqlarımız arasında əlaqələri daha da möhkəmlətmək üçün hər iki ölkənin mədəniyyəti barədə təbliğat işlərinin aparılmasının və qarşılıqlı olaraq mədəniyyət günlərinin keçirilməsinin vacibliyi vurğulanmışdır.
Səfir A.İmanov Azərbaycanın son illər idman sahəsində qazandığı uğurlardan bəhs etmişdir. O, ölkəmizdə yaradılan geniş idman infrastrukturu barədə məlumat verərək Azərbaycanın bir çox beynəlxalq səviyyəli yarışlara ev sahibliyi etdiyini, o cümlədən 2015-ci ildə ilk dəfə keçiriləcək Avropa Oyunlarının Azərbaycanda təşkil ediləcəyini diqqətə çatdırmışdır.
Hoang Tuan Anh Azərbaycanın idman sahəsində uğurlarından xəbərdar olduğunu bildirmiş və bu sahədə iki ölkə arasında təcrübə mübadiləsinin həyata keçirilməsinin məqsədəuyğun olduğunu vurğulamışdır.
Bölmənin digər xəbərləri
