AZƏRBAYCAN MƏKTƏBLİLƏRİ BEYNƏLXALQ OLİMPİADADA İŞTİRAK EDİRLƏR
Olimpiadanı RF hökuməti yanında Rus Dili Şurasının və Rusiya XİN-in köməyi ilə ölkənin Təhsil və Elm Nazirliyi və A.S.Puşkin adına Dövlət Rus Dili İnstitutu keçirir.
Azərbaycan təhsil nazirinin müavini İradə Hüseynova Açılış mərasimində çıxışında olimpiadanın təşkilatçılarını və iştirakçılarını salamlayaraq bildirmişdir ki, rus dili millətlərarası ünsiyyət dilidir və mənəvi, mədəni dəyərlərin daşıyıcısıdır. O, bu baxımdan olimpiadanın əhəmiyyətini vurğulayaraq, Azərbaycanda rus dili ilə bağlı vəziyyətdən danışmışdır. Bildirilmişdir ki, respublikamızda rus dilinin qorunub saxlanmasına ölkədəki mövcud şərait əlverişli imkan yaradır. Belə ki, Azərbaycanda rus dilində 378 məktəb fəaliyyət göstərir, ali məktəblərin geniş şəbəkəsi mövcuddur, kitablar, dərsliklər, elmi-bədii ədəbiyyat nəşr olunur, Rusiyanın televiziya kanalları translyasiya edilir, yerli teleradio kanallarında rus dilində verilişlər aparılır. Müasir Azərbaycan çoxmilli demokratik dövlətdir və burada ölkəmizdə yaşayan xalqların mədəniyyətləri təmsil olunmuşdur və bu baxımdan rus dili respublikamızın ictimai həyatında xüsusi yer tutur.
İ.Hüseynova daha sonra vurğulamışdır ki, bütün bunlar ümummilli liderimiz Heydər Əliyevin yeritdiyi müdrik xarici siyasətin nəticəsidir. Heydər Əliyev rus dilinin, rus mədəniyyətinin inkişafına və qorunub saxlanmasına xüsusi diqqət yetirirdi. Məhz onun belə uzaqgörən siyasəti sayəsində Rusiya ilə dostluq münasibətlərinin, eləcə də rus dilinin və rus mədəniyyətinin qorunub saxlanması mümkün olmuşdur. Azərbaycan Prezidenti İlham Əliyev dostluğa və əməkdaşlığa yönəlmiş bu müdrik siyasəti davam etdirir və Rusiya ilə münasibətlərə də xüsusi diqqət yetirir.
Olimpiadada rusdilli məktəblərin 9-11 sinif şagirdləri - rus dili üzrə regional müsabiqələrin və milli olimpiadaların qalibləri iştirak edirlər. Birinci turda iştirakçılara rus dilinin ayrı-ayrı bölmələri – fonetika, leksika, qrammatika, stilistika üzrə 15-dək tapşırıq təklif olunur. İkinci turda iştirakçılar yaradıcılıq tapşırıqlarını yerinə yetirəcək, dil mədəniyyəti üzrə suallara cavab verəcəklər. Olimpiada iştirakçıları öz arzuları ilə iki müsabiqədə də iştirak edə bilərlər: “Gənc şair”, “Gənc natiq”. Qaliblər mükafatlarla təltif olunacaq, mütləq qaliblərə isə təqaüd və RF Təhsil və Elm Nazirliyinin göndərişi ilə Rusiyanın ali məktəblərində “Rus dili və ədəbiyyatı” ixtisası üzrə təhsil almaq hüququ veriləcəkdir.
Azərbaycan məktəbliləri Nigar Kələntərli, Əhməd İbrahimov, Cəmilə Sultanova, Fərəc Abbasov, Sona Kələntərli olimpiadada mübarizə aparırlar.
Olimpiadanın qalibləri aprelin 18-də elan ediləcəkdir.
Bölmənin digər xəbərləri
