Aprelin 2-də İstanbulun ən böyük konsert salonlarından birində - Camal Rəşid Rey adına Mədəniyyət mərkəzində
AZƏRTAC-ın müxbiri xəbər verir ki, Azərbaycan Dövlət Filarmoniyası triosunun konserti olmuşdur. Konsertdə Nərgiz Əliyarova (fortepiano), Töhfə Babayeva (skripka) və Səbihə İbrahimovanın (violonçel) ifasında Baxın, Üzeyir Hacıbəyovun, Süleyman Ələsgərovun, Tofiq Bakıxanovun və digər bəstəkarların əsərləri səslənmişdir. Trionun müşayiəti ilə Azərbaycan Opera və Balet Teatrının solisti Natəvan İsmayılova Baxın, Hendelin, Üzeyir Hacıbəyovun, Tofiq Quliyevin, Vasif Adıgözəlovun əsərlərini oxumuşdur.
Konsert böyük müvəffəqiyyətlə keçmiş, türk musiqisevərləri Azərbaycan sənətçilərinin ifasını gurultulu və sürəkli alqışlarla qiymətləndirmişlər. Konsertin təşkilatçısı, əməkdar incəsənət xadimi, İstanbul böyük şəhər bələdiyyəsinin mədəniyyət üzrə müşaviri, professor Tofiq İsmayılov musiqiçilərimizin ölkəmizi, mədəniyyətimizi layiqincə təmsil etdiklərini bildirmişdir.
Konsert “TRT-İNT” televiziya kanalı ilə Avropa ölkələrinə də yayımlanmışdır.
