Azərbaycan narının ixracının artırılması məsələləri müzakirə olunub
Bakı, 4 iyun, AZƏRTAC
Azərbaycan narının ixracının artırılması məsələləri müzakirə olunub.
Azərbaycanda İxracın və İnvestisiyaların Təşviqi Fondundan (AZPROMO) AZƏRTAC-a bildirilib ki, müzakirələr AZPROMO-nun dəstəyi ilə keçirilən Azərbaycan Nar İstehsalçıları və İxracatçılarının (ANİİA) IV Ümumrespublika yığıncağında aparılıb.
Yığıncağın əsas məqsədi bu ilin mayın 16-18-də XII Azərbaycan Beynəlxalq Kənd Təsərrüfatı (Caspian Agro 2018) sərgisində Azərbaycan Nar İstehsalçıları və İxracatçıları Assosiasiyasının iştirak etməsi, Azərbaycan Respublikasının Prezidenti İlham Əliyevin assosiasiyanın pavilyonunda olması, assosiasiyanın fəaliyyəti, xidmətləri və üzvləri haqqında məruzəni dinləməsi, Prezidentin ANİİA-nın gələcək fəaliyyətinə aid tapşırıq və tövsiyələri olması və dövlət başçısının tapşırıq və tövsiyələrini yerinə yetirmək, mövsüm qabağı görüləcək işlərin müzakirəsi, ixrac potensialının artırılmasıdır.
Tədbirdə assosiasiyanın sədri Fərhad Qaraşov assosiasiyanın yenilənmiş veb saytı (pomegranate.az) haqqında və mayın 16-18-də keçirilən XII Azərbaycan Beynəlxalq Kənd Təsərrüfatı (Caspian Agro 2018) sərgisində assosiasiyanın pavilyonu haqqında məlumat verib: “Bildiyiniz kimi assosiasiyanın veb saytı artıq hazırdır. Sayt Azərbaycan narının təbliğatında, bu sektorun inkişafında töhfəsini verəcək. Həmçinin assosiasiya üzvlüyünə qəbul üçün online müraciət və online köməklik xidmətlərindən yararlanmaq imkanları da mövcuddur. Sahibkarlar logistika, sertifikatlaşdırma, ixrac sənədləri və bu kimi xidmətlərdən yardım ala bilərlər. Bundan başqa assosiasiya XII Azərbaycan Beynəlxalq Kənd Təsərrüfatı (Caspian 2018) sərgisində iştirak edib. Azərbaycan Respublikası Prezidenti İlham Əliyev assosiasiyanın pavilyonunda olub, assosiasiyanın fəaliyyəti və üzvləri haqqında məruzəni dinləyib. Yığıncağın əsas məqsədi də verilən tövsiyə və tapşırıqları yerinə yetirmək, nar və nar məhsullarının ixrac potensialını artırmağa çalışmaqdır”.
ANİİA-nın sədri Fərhad Qaraşov assosiasiyanın üzvlərinə ANİİA-nın fəaliyyəti haqqında çap olunmuş kitabçaları təqdim edib.
Daha sonra AZPROMO-nun vitse-prezidenti Yusif Abdullayev çıxış edərək assosiasiyanın fəaliyyətini yüksək qiymətləndirib və fondun fəaliyyəti haqqında istehsalçılara və ixracatçılara geniş məlumat verib.
2018-ci ilin daha uğurlu olması üçün qarşıda duran vəzifələr və problemlər geniş müzakirə olunub, bu problemlərin həlli üçün müvafiq dövlət qurumlarına assosiasiya sədri və üzvləri ilə birlikdə müraciət olunması qərara alınıb.
Daha sonra tədbirə dəvət olunan Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının üzvləri, Azərbaycan Respublikası Kənd Təsərrüfatı Nazirliyinin nümayəndəsi, İqtisadiyyat Nazirliyinin nümayəndəsi, Qida Təhlükəsizliyi Agentliyinin nümayəndəsi, Göyçay rayon İcra Hakimiyyətinin nümayəndəsi və digər iştirakçılar çıxış ediblər.
Tədbirdə assosiasiyaya yeni üzv olanlar iştirakçılara tanıdılıb.
Sonda iştirakçılara assosiasiyanın qələmi, kitabçası və keramikdən hazırlanmış nar fiquru hədiyyə olunub.
Bölmənin digər xəbərləri
