Azərbaycan öz ərazisində “boz zona”nın qalması ilə heç vaxt barışmayacaq
Bakı, 15 sentyabr, AZƏRTAC
“Boz zona”lar nəzarətsiz ərazilərdir və hansı dövlətin ərazisindədirsə, ora təhlükə mənbəyi olaraq qalır. Bu ərazilər sivil qanunlar işləməyən və cinayətkar qruplaşmaların müəyyənləşdirdiyi qaydalarla idarə olunaraq onların maraqlarına xidmət edən bir məkana çevrilir. Həm də “boz zona”larda yaşayan insanlar müəyyən qrup separatçı və ya terrorçunun əsirinə çevrilir, onların çirkin planlarının icraçıları olurlar. Belə yerlər dünyanın ayrı-ayrı qitələrində mövcuddur. Məsələn, Latın Amerikasında, Kolumbiyada (FARC üsyançı hərəkatları), Peruda (“Sendero luminoso” (Parlaq yol) terror təşkilatı) və Boliviyanın bəzi bölgələrində belə yerlər var. Bu “boz zonalar”dan gələn əsas transmilli təhlükələr narkotiklərin qanunsuz dövriyyəsi, silah ticarəti, terror təşkilatlarının filiallarının və separatizm ocaqlarının fəaliyyəti ilə bağlıdır.
Azərbaycan da belə təhlükə ilə uzun illər üzləşmiş ölkələr sırasındadır. Məlum olduğu kimi, Ermənistan Azərbaycan torpaqlarını işğal etdiyi 30 ildə həmin əraziləri “boz zona”ya çevirmişdi. Belə ki, 10 min kvadratkilometrdən böyük bir ərazidə sivil qanunlar işləməyib və ora müəyyən qruplaşmaların gəlir mənbəyinə çevrilib. İşğal altındakı ərazilərimiz uzun illər ərzində silah ticarəti üçün məkan və narkotik vasitələrin tranzit daşınması üçün mərkəz rolunu oynayıb. Həmçinin Asiyadan gətirilən narkotiklər İrandan keçirilərək Ermənistanın nəzarəti altında olan torpaqlarımıza daşınıb, sonra da Avropa dövlətlərinə, o cümlədən Müstəqil Dövlətlər Birliyi (MDB) məkanına nəql edilib. Amma təəssüf ki, dünya birliyi qlobal təhlükə mənbəyinə çevrilən bu “boz zona”nın aradan qaldırılması üçün qətiyyətli addımlar atmayıb.
Bu sözləri AZƏRTAC-a açıqlamasında Milli Məclisin deputatı Azər Badamov söyləyib.
Deputat qeyd edib ki, Azərbaycan 3 il əvvəl öz gücü ilə ərazilərində “boz zona”nın aradan qaldırılması üçün hərəkətə keçərək oranı terrorçulardan və narkotacirlərdən azad etdi. Amma təəssüf ki, Qarabağda təhlükə mənbəyi bu gün də qalmaqdadır. Uzun illər yerüstü və yeraltı sərvətlərimizin talanmasından, narkotik və silah ticarətindən böyük gəlir əldə etməyə öyrəşən separatçılar, Ermənistandakı Qarabağ klanı bu vasitəni əlindən buraxmaq istəmir və hər cəhdlə qorumağa çalışır. Təbii ki, Azərbaycan dövləti özünün suveren ərazisində “boz zona”nın qalmasına imkan verməyəcək.
Xankəndidə sivil dövlət qanunları işləmir və orada yaşayan erməni əsilli sakinlər separatçıların girovuna çevrilib. Həm də Xankəndi beynəlxalq maraqların toqquşduğu ərazi kimi özünü göstərir. Bu gün həmin ərazidə müvəqqəti olaraq Rusiya sülhməramlıları yerləşdirilib. Amma Fransa bunu həzm edə bilmir və hər vasitə ilə ərazilərimizi öz təsiri altına salmağa çalışır.
Laçın sərhəd-buraxılış məntəqəsi qurulana qədər bu yol nəzarətsiz olub və cinayət məqsədləri üçün istifadə edilib. Talanan milli sərvətlərimiz, eyni zamanda, terrormu dəstələr üçün silahlar və narkotiklər bu yolla daşınıb. Amma cari il aprelin 23-də Həkəri çayı üzərində post qurmaqla Azərbaycan öz ərazilərinə qanunsuz daşımaların qarşısını aldı. Təəssüf ki, Xankəndi və onun ətraf əraziləri Ermənistanın maliyyələşdirdiyi separatçı rejimin nəzarəti altında hələ də qalmaqdadır. Bu ərazilərə qanunsuz daşımaları davam etdirmək üçün Ermənistan müxtəlif yollara əl atdı. Lakin bütün cəhdləri iflasa uğrandı və Azərbaycanın istəyinə uyğun şəkildə Xankəndiyə humanitar daşımalar üçün Ağdam-Xankəndi yolu açıldı. Azərbaycan Qarabağdakı erməni sakinlərin taleyinə biganə qalmır. Ona görə də Azərbaycan Qarabağ sakinləri üçün ölkədaxili bütün təminat yollarını təklif edib. Eyni zamanda, ərazilərimizdə yaşayan ermənilərin təminatlarını həyata keçirməyə hazır olduğunu bildirib.
“Azərbaycan öz ərazisində “boz zona”nın qalması ilə heç vaxt barışmayacaq. Belə ki, bu ərazilərdə konstitusion hüquqlarımız bərpa olunmalı, Qarabağ iqtisadi rayonu separatçılardan və qanunsuz silahlılardan təmizlənməlidir. Azərbaycan dövlət bu məsələləri Qarabağda yaşayan separatçılara hələ ki, “yumşaq” şəkildə çatdırır. Amma silahlı hərbi birləşmələr Azərbaycan qanunlarına tabe olmazsa və erməni sakinlərin reinteqrasiyasına mane olmaqda davam edərlərsə, antiterror əməliyyatının keçirilməsi qaçılmaz olacaq. Qarabağdakı separatçılar və onları maliyyələşdirən Ermənistan birmənalı şəkildə bilməlidir ki, əgər antiterror əməliyyatının keçirilməsinə məcbur olsaq, heç kimə güzəşt edilməyəcək və bütün cinayətkarlar ittiham kürsüsünə çıxarılacaq. Qarabağın Azərbaycan torpağı olduğunu bütün dünya ictimaiyyəti təsdiq edib. Sentyabrın 9-da Qarabağ iqtisadi rayonunda keçirilən qondarma seçkiləri beynəlxalq ictimaiyyətin tanımaması bunu bir daha sübut etmiş oldu. Bu ərazilər qısa müddətdə mütləq şəkildə Azərbaycanın nəzarətinə qaytarılmalıdır. Sülh yolu ilə baş tutmazsa, bunun güc yolu ilə reallaşacağı labüddür. Ona görə də ermənilər və onları ruhlandıranlar mövcud reallığı tez qəbul etməli, proseslərin dinc yolla başa çatmasına hazır olduğunu bildirməlidirlər”, - deyə A.Badamov vurğulayıb.
Bölmənin digər xəbərləri
