Bakı, 20 iyul, AZƏRTAC

İyulun 15-də Prezident İlham Əliyev Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında bir çox mühüm məsələlərə toxunub. Onun dərin məzmunlu, proqram xarakterli çıxışı ölkəmizin inkişafı, gələcək strateji istiqamətlərin və həyata keçirilməli olan vacib layihələrin müəyyən edilməsi baxımından xüsusi əhəmiyyət daşıyır.

Bu fikirləri AZƏRTAC-a açıqlamasında Milli Məclisin Ailə, qadın və uşaq məsələləri komitəsinin sədri, professor Hicran Hüseynova bildirib.

Deputat qeyd edib ki, dövlət başçısı əvvəlcə iyulun 12-də günorta saatlarından başlayaraq Ermənistan silahlı qüvvələrinin Azərbaycan-Ermənistan dövlət sərhədinin Tovuz rayonu istiqamətində atəşkəs rejimini kobud şəkildə pozmaqla törətdiyi təxribatdan danışaraq işğalçı dövlətin və onun rəhbərinin əsl simasını bütün dünyanın bir daha şahidi olduğunu qeyd etdi. Bu hadisələrdə qardaş və dost ölkələrin, beynəlxalq təşkilatların reaksiyası da çox vacib idi. İlk növbədə, qardaş Türkiyənin Prezidenti Rəcəb Tayyib Ərdoğan və Türkiyənin müvafiq dövlət qurumları Azərbaycanın haqlı mövqeyini müdafiə etdilər. Prezident İlham Əliyev də bu dəstəyi yüksək qiymətləndirərək deyib: “Bir daha bütün dünya, Türkiyə və Azərbaycan xalqları gördü ki, biz əsl qardaşıq. Yaxşı günlərdə və ağır günlərdə bir-birimizin yanındayıq. Yəqin ki, həm Türkiyə vətəndaşları, həm Azərbaycan vətəndaşları mənim dəfələrlə dediyim sözləri xatırlayırlar və görürlər ki, mən nə qədər haqlı idim deyəndə ki, dünya miqyasında Türkiyə ilə Azərbaycan qədər bir-birinə yaxın olan ikinci ölkələr yoxdur. Bu yaşanan vəziyyət bir daha onu göstərir. Ona görə bir daha qardaş Türkiyə xalqına, onun Prezidentinə Azərbaycan xalqı adından və öz adımdan dərin təşəkkürümü bildirmək istəyirəm”. Həmçinin Pakistan, bir sıra başqa ölkələrin rəsmi nümayəndələri, Türkdilli Dövlətlərin Əməkdaşlıq Şurası, 57 dövləti özündə birləşdirən İslam Əməkdaşlıq Təşkilatı Azərbaycanı dəstəkləyən bəyanatla çıxış etdilər. Amma Ermənistana heç kim dəstək göstərmədi. O, məkrli niyyətinə nail ola bilmədi, hər bir təşkilat, dövlət tərəfindən təcrid olundu. Çünki beynəlxalq ictimaiyyət də Azərbaycanın haqlı olduğunu bilir. ATƏT-in Minsk qrupunun fəaliyyətsizliyi, işğalçı ilə işğala məruz qalan dövlətə, demək olar ki, eyni münasibətin göstərilməsi isə artıq dözülməz bir vəziyyət yaradır. Bu məsələyə münasibət bildirən ölkə başçısı Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında qeyd etdi: “Ermənistan-Azərbaycan Dağlıq Qarabağ münaqişəsi ilə bağlı mən bu yaxınlarda Azərbaycan telekanallarına müsahibədə öz mövqeyimi, bizim prinsipial mövqeyimizi bir daha ifadə etdim. Azərbaycan xalqının bu mənasız danışıqlardan bezdiyini ifadə etdim. Ona görə bu məsələ ilə məşğul olanlar və bu günlər ərzində öz vasitəçilik təkliflərini irəli sürənlər bu haqda düşünsünlər, Azərbaycan xalqının səbri tükənməz deyil. Bu gün biz güclü ordu yaratmışıq. Bu gün xalq-iqtidar birliyi Azərbaycanda sabitliyin inkişafının əsas şərtidir. Ona görə Ermənistan-Azərbaycan, Dağlıq Qarabağ münaqişəsi ilə bağlı bir addım geri atmayacağıq. Azərbaycanın ərazi bütövlüyü bərpa edilməlidir və bizim bu məsələ ilə bağlı fikrimiz qətidir”.

Azərbaycan isə bütün istiqamətlərdə öz haqlı mübarizəsini müdafiə edib və bu dəfə də düşmənə sarsıdıcı zərbə vurdu. Ermənistan tərəfi öz itkilərini gizlətməyə çalışsa da buna nail ola bilmədi. Artıq xalqımız yaxşı bilir ki, şəhid qəhrəmanlarımızın qisası alınıb. Prezident İlham Əliyevin dediyi kimi, “yaxın tarix dəfələrlə bunu göstərib, həm siyasi müstəvidə, diplomatik müstəvidə, eyni zamanda, döyüş meydanında. Nəyi ediriksə, dəqiqliklə edirik. Son dörd il ərzində üç əməliyyat keçirilmişdir, üç toqquşma olmuşdur. Üçündə də qalib gəldik. Üçündə də bayrağımızı istədiyimiz yerə sancdıq. Üçündə də düşmənə sarsıdıcı zərbələr endirdik”. Bəli, xalqımız ordusuna, Ali Baş Komandanına, əsgərinə arxayındır. İyulun 14-dən 15-nə keçən gecə xalq ordusuna, dövlətinə, onun rəhbərinə, Ali Baş Komandanına öz dəstəyini göstərdi. Vətənpərvərlik nümayiş etdirən insanların bu əzmi qürurverici idi. Lakin birdən-birə hadisələr məcrasından çıxmağa başladı, təxribatçı qüvvələr bütövlükdə bu möhtəşəm prosesi dağıdaraq, öz maraqlarına yönəltməyə cəhd etdilər. 5-ci kalon, bir dəstə qaragüruh yenə də özünü göstərməyə başladı. Azərbaycanın qüdrətindən, xalq-iqtidar birliyindən narahat olan bu bir dəstə tör-töküntü müəyyənləşdirilməli, onlara ən ağır cəza verilməlidir! Müharibənin qanunları bunu tələb edir. Bu ünsürlər Vətən xaini, xalq düşmənləridirlər, onlara qarşı amansız olmaq lazımdır. Azərbaycanın bu ağır günlərində onların törətdiyi təxribat düşmənlərimizi sevindirir, xalqımızı isə məyus edir.

Çox mühüm məsələlərdən biri də vuruşmaq istəyən vətəndaşlarla bağlı münasibət idi. Ali Baş Komandan vurğuladı ki, “əgər kimsə, hansısa vətənpərvər insan orduda xidmət etmək istəyirsə, mən bunu ancaq alqışlayıram. Amma bu gün meydanda səslənən və ola bilər yaxşı niyyətlə “mən gedim Qarabağda vuruşum” sözlərinə son qoymaq lazımdır. Populizmin vaxtı deyil”. Doğrudan da hissə və emosiyalara qapılıb, çağırışlar etmək olar, digərlərini ardınca aparmaq olar, lakin hər şey nizam-intizam qaydaları çərçivəsində olmalıdır. Bu gün ölkəmiz bütün məsələləri qanunvericilik daxilində həyata keçirir. Bu günədək Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin çağırışına səs verən 38000-ə yaxın vətəndaş Səfərbərlik və Hərbi Xidmətə Çağırış üzrə Dövlət Xidmətinə elektron qaydada, həmçinin Xidmətin qeydiyyatda olduqları yerli idarə, şöbə və bölmələrinə gələrək könüllü olaraq orduda xidmət etmək haqqında öz arzularını ifadə edib və müvafiq formada qeydiyyata alınıb.

Bu günlərdə xaricdə yaşayan həmvətənlərimizin ölkəsinə, onun rəhbərinə və ordusuna göstərdikləri dəstək birliyimizin möhtəşəm ifadəsi idi. Onlar “Qarabağ Azərbaycandır!” deyərək diqqəti Ermənistanın təcavüz siyasətinə yönəltməyə çalışıblar, dünya ictimaiyyətini Azərbaycan xalqına dəstək olmağa və BMT qətnamələrinin yerinə yetirilməsinə çağırıblar.

İclasda, həmçinin pandemiya dövründə ölkə iqtisadiyyatında baş verən dəyişikliklər, qarşıda duran bir çox məsələlər müzakirə olunub. Prezident bildirdi: “Bu il çox çətin ildir, təkcə bizim üçün yox, bütün dünya üçün. Təsadüfi deyil ki, aparıcı beynəlxalq maliyyə qurumlarının verdiyi açıqlamaya görə, dünyanın 150 ölkəsindən çoxu maliyyə yardımı üçün beynəlxalq maliyyə qurumlarına müraciət edib. Azərbaycanın adı bu siyahıda yoxdur. Azərbaycan öz inkişafını öz hesabına təmin edir”.

Azərbaycan Prezidenti uğurlu dövlət idarəçiliyi, onun başçılığı ilə aparılan sistemli islahatlar, göstərdiyi siyasi iradə hər bir vətəndaşın rifahının yüksəldilməsinə yönəlib. Xüsusilə vurğulamalıyıq ki, ölkənin daxilində baş verən siyasi proseslər, sosial və idarəetmə sahəsində aparılan islahatlar həm əhalinin həyat şəraitinin yaxşılaşdırılmasına, həm də dövlətimizin daha da gücləndirilməsinə öz mühüm və müsbət təsirini göstərir. Ölkə rəhbəri hər zaman vətəndaşın yanındadır, bütün hallarda onun hüquqlarının qorunması və sosial müdafiəsinin gücləndirilməsi üçün lazımi addımlar atır. Bu çətin pandemiya dövründə də Azərbaycan dövləti, onun başçısı İlham Əliyev vətəndaşların sağlamlığının qayğısına qalmaqla yanaşı, iqtisadi və maliyyə sabitliyinin, əhalinin sosial müdafiəsinin, koronavirusun mənfi təsirindən maksimum dərəcədə qorunması məqsədilə bütün imkanlardan istifadə edir.

Azərbaycan bütün çətinliklərə baxmayaraq, öz inkişaf tempini qoruyub saxlamaqda davam edir. Bu fikri söyləməyə yaxın günlərdə çap olunmuş BMT-nin “Dayanıqlı inkişaf indeksi” ilə bağlı yeni hesabatı da əsas verir. Bu hesabatda Azərbaycan keçən ilə nisbətən irəliləyərək 54-cü yerdə qərarlaşıb. Bu göstəriciyə görə Azərbaycan regionda liderdir. Ümumi daxili məhsul bir qədər aşağı düşsə də, bu, təbii səbəblər üzündən baş verib. Bütövlükdə ilin altı ayını müsbət qiymətləndirmək olar. İlin sonuna qədər qarşıda duran bütün vəzifələr icra edilməlidir.