Azərbaycan Premyer Liqası: “Şamaxı” Bakıdan böyükhesablı məğlubiyyətlə dönüb
Bakı, 24 aprel, AZƏRTAC
Aprelin 24-də futbol üzrə Azərbaycan Premyer Liqasında XXIV turun daha bir oyunu keçirilib.
AZƏRTAC xəbər verir ki, “Sabah” klubu "Şamaxı"nı qəbul edib. Masazırdakı "Bank Respublika Arena"da baş tutan qarşılaşma meydan sahiblərinin 5:1 hesablı qələbəsi ilə yekunlaşıb.
Hesabı 11-ci dəqiqədə paytaxt təmsilçisinin üzvü Coy-Lens Mikels açıb. Matçın 25-ci dəqiqəsində Zurab Oçiqava fərqi artırıb. Dörd dəqiqə sonra Mikels özünün 2-ci, komandasının 3-cü qolunu vurub. Qarşılaşmanın 50-ci dəqiqəsində Felipe Santos fərqi azaltsa da, komandası 84-cü dəqiqədə Xulio Sezar Rodrigesin, 5 dəqiqə sonra isə Aleksey İsayevin fərqlənməsinə mane ola bilməyib.
Oyunun əsas vaxtına əlavə olunmuş 2-ci dəqiqədə qonaqların müdafiəçisi Franko Flores birbaşa qırmızı vərəqə ilə meydandan qovulub.
Bu qələbə ilə xallarının sayını 35-ə çatdıran "Sabah" turnir cədvəlində "Qəbələ"ni qabaqlayaraq 4-cü pilləyə yüksəlib. İyirmi xalı olan "Şamaxı" isə 6-cı sırada qalıb.
Qeyd edək ki, turun açılış oyununda "Qarabağ" Qəbələdə eyniadlı komandanı 2:0 hesabı ilə məğlub edib.
Tura hazırda davam edən "Səbail" - "Neftçi" və "Sumqayıt" - "Zirə" görüşləri ilə yekun vurulacaq.
Bölmənin digər xəbərləri
