Azərbaycan Premyer Liqasının VI turu erkən qırmızı vərəqə ilə “əlamətdar” olub
Bakı, 16 sentyabr, AZƏRTAC
Azərbaycan Premyer Liqasının VI turu erkən qırmızı vərəqə ilə əlamətdar olub.
AZƏRTAC Peşəkar Futbol Liqasının rəsmi saytına istinadən xəbər verir ki, Pyer Zebli “Zirə” - “Sumqayıt” oyununun (1:0) 11-ci dəqiqəsində meydandan kənarlaşdırılıb.
İyirmi altı yaşlı italiyalı yarımmüdafiəçi birbaşa qırmızı vərəqə alıb. O, cari mövsümdə meydandan ən tez kənarlaşdırılan futbolçu olub.
Premyer Liqanın PFL-in bayrağı altında keçirildiyi 2008-ci ildən indiyədək 8-ci dəfə oyunçulardan biri ilk 15 dəqiqədə qırmızı vərəqə ilə cəzalanıb. Pyerə qədər 7 dəfə erkən cəza qeydə alınıb.
On beş ilin ilk 15 dəqiqədə qırmızı vərəqələri arasında ikisi daha erkən gerçəkləşib. Zebli bu dövrdə ən tez cəzalanan 3-cü oyunçudur. Onunla müqayisədə daha erkən cəzalananların hər ikisi 2017/18 mövsümünə təsadüf edib. Mütləq antirekord Dedimar Fereyraya məxsusdur. “Kəpəz”in legioneri 2017-ci il noyabrın 18-də “Səbail”lə ev matçının (2:3) 5-ci dəqiqəsində komandasını azlıqda qoyub.
“Zirə”nin sabiq futbolçusu Milan Duriç isə 9-cu dəqiqədə belə ağır cəza alıb. O, 2018-ci il mayın 12-də “Kəpəz”lə ev görüşündə (2:1) qırmızı vərəqə alıb.
Bölmənin digər xəbərləri
