- Əziz dostlar!

Əziz ivanovkalılar!

Mən sizin hamınızı ürəkdən salamlayıram, sizə öz hörmət və məhəbbətimi bildirirəm. Mən sizin rəhbərinizlə, Azərbaycanın rus icmasının ölkəmizin müxtəlif bölgələrində yaşayan nümayəndələri ilə lap bu yaxınlarda görüşmüşəm. Bizim çox ətraflı, çox açıq söhbətimiz oldu. Müxtəlif nöqteyi-nəzərləri bilmək, Azərbaycanın bütün bölgələrində əmin-amanlıq olduğunu bir daha eşitmək mənə çox xoş idi. Ölkəmizdə yaşayan bütün xalqlar arasında sülh olması bu gün müstəqil Azərbaycanda ən böyük nailiyyətlərdən biridir.

Biz tarixi çox yaxşı bilirik, müxtəlif ölkələrdə baş verən hadisələri izləyir və görürük ki, heç də hər yerdə belə deyildir. Elə ölkələr var ki, orada müxtəlif millətlərin nümayəndələri müxtəlif həyat sürür, müxtəlif maraqlarla yaşayırlar, qarşıdurmalar, problemlər mövcuddur. Bizim ölkəmizdə belə şeylər yoxdur. Bu, Azərbaycanın bütün vətəndaşlarının çox böyük xidmətidir. Bu, 1970-ci illərdə də, 1990-cı illərdə də milli həmrəyliyə, milli sülhə yönəldilən siyasət aparmış ümummilli liderimiz Heydər Əliyevin çox böyük xidmətidir. Azərbaycanın hər bir vətəndaşının eyni hüquqları və vəzifələri vardır. İnsanlar arasında milli və ya dini baxımdan heç vaxt, keçmişdə də heç bir fərq qoyulmayıb və bundan sonra da qoyulmayacaqdır.

Heydər Əliyev sizin kəndə, ivanovkalılara həmişə xüsusi diqqətlə yanaşmışdır, burada dəfələrlə olmuşdur. Onun səmimi xatirələrini mən də eşitmişəm. Sonralar sizin rəhbərliyinizlə görüşümüzdə o günləri biz də xatırladıq. Bu hisslər səmimi idi, qəlbin dərinliklərindən gələn hisslər idi və mən bu hissləri indi də keçirirəm. Bu gün, sizin qonağınız olduğum vaxtda çox dərin məmnunluq hissləri keçirirəm.

Sizin burada firavan yaşamağınızdan, təsərrüfatla məşğul olmağınızdan, bütün məsələlərinizi özünüzün həll etməyinizdən dərin məmnunluq duyuram. Bilirsiniz ki, Heydər Əliyev 1993-cü ildə hakimiyyətə qayıtdıqdan sonra islahatlar, - o cümlədən kənd təsərrüfatında, - başlayanda, belə bir arzu ifadə edildi ki, sizin kolxoz olduğu kimi qalsın. Ona görə də bütün qaydalardan bir istisna kimi, kolxozun saxlanılması qərara alındı.

Məktəb tikintisi barədə müraciət də olmuşdur. Bildiyiniz kimi, indi bir çox rayonlarda məktəblər tikilir. Biz bu müraciət barədə danışdıqdan dərhal sonra hökumətə göstəriş verdim ki, burada ən müasir məktəb tikilməsi üçün layihə hazırlansın, yer ayrılsın. Hörmətli Mariya xalanın dediklərini də tam dəstəkləyirəm ki, ivanovkalılar - yaşlı nəsil də, gənc nəsil də İvanovkada yaşamalıdır, heç kim köçüb getməməlidir. Bunun üçün nə lazımdırsa, hamısını edəcəyik. İrəli sürdüyünüz bütün məsələləri - iş yerləri yaradılması barədə də, maliyyələşdirmə barədə də, əgər lazımdırsa, kredit verilməsi barədə də, kənd təsərrüfatı texnikası barədə də məsələləri həll edəcəyik. Bütün mövcud məsələlər həll olunacaqdır.

Bu gün Azərbaycanda işlər yaxşı gedir, iqtisadiyyat inkişaf edir, regionlar inkişaf edir. Mən Azərbaycanın bütün rayonlarına gedirəm, vəziyyətlə tanış oluram. Dünyada ən yüksək iqtisadi artım bizdədir, büdcəmiz artır. Gələn il büdcəmiz azı 3 milyard 200 milyon dollara çatdırılacaq, bu il 2 milyard 200 milyon dollar, ötən il 1 milyard 500 milyon dollar olmuşdur. Yəni iki ildə büdcə iki dəfədən çox artacaqdır. Dünyanın heç bir ölkəsində belə artım yoxdur. Ona görə də maliyyə imkanlarımız artdıqca, təbii ki, regionların inkişafına, ilk növbədə, kənd təsərrüfatının inkişafına daha çox vəsait ayrılacaqdır. Azərbaycanda güclü sənaye potensialı var və indi neft potensialı da möhkəmlənir. Lakin əhalinin yarısından çoxu kənd yerlərində yaşayır, kənd təsərrüfatı ilə məşğuldur. Ona görə də kənd təsərrüfatının inkişafına kömək üçün müxtəlif tədbirlər görülür, əhalini texnika ilə təmin edəcək “Aqrolizinq” səhmdar cəmiyyəti yaradılmışdır. Əlbəttə ki, sahibkarlara kreditlər veriləcəkdir. Ona görə də bu istiqamətdə məsələlər həll olunacaqdır.

Mən çoxmillətli ölkəmizdə milli həmrəyliyin və sülhün olmasını müstəqil Azərbaycanın ən başlıca nailiyyətlərindən biri hesab edirəm. Çoxmillətli ölkədə yaşamaq böyük xoşbəxtlikdir. Yalnız bir millətin nümayəndələrinin yaşadıqları ölkələrdə insanlar özlərini çox şeydən məhrum edir, mədəniyyətlərin qarşılıqlı təsirindən, bir-birini zənginləşdirməsindən zövq ala bilmir, xalqlar arasında dostluğun nə demək olduğunu başa düşə bilmirlər. Azərbaycanda isə əksinədir və bu, bizim dövlətimizin siyasətidir, bu, ölkənin hər bir vətəndaşının qəlbində, canında yaşayır.

İnsanların hissləri ilə dövlət siyasətinin uyğun gəlməsi çox vacibdir. Başlıcası odur ki, bu, belə də davam etsin, saxlanılsın və ölkəmiz, onun hər bir vətəndaşı gündən-günə daha yaxşı yaşasın, həyat, iş, təhsil üçün yaxşı şərait, yaxşı tibbi xidmət olsun. Bunların hamısı gündəlikdədir və maliyyə imkanları artdıqca bütün sosial məsələlərə - əmək haqqına, pensiyalara və digər sosial ödənişlərə daha çox diqqət yetiriləcəkdir.

Mən sizi bir daha ürəkdən salamlamaq istəyirəm. Bu gün mənim üçün çox fərəhli gündür. Çoxdan sizin kəndinizə gəlmək istəyirdim. Əlbəttə, bunu öz proqramımda planlaşdırmışdım. Biz bu yaxınlarda Bakıda görüşərkən demişdim ki, İsmayıllı rayonunda olacağam və hökmən kəndinizə gələcəyəm. Budur, artıq gəlmişəm. Sizə öz hörmətimi bildirirəm. Xoşbəxt yaşayın. Mən isə sizə kömək üçün öz tərəfimdən hər şeyi edəcəyəm. Sizə xoşbəxtlik və əmin-amanlıq arzulayıram.

/Dövlətimizin başçısının nitqi böyük diqqətlə dinlənildi və alqışlarla qarşılandı/.

X X X

Sonra Azərbaycan Prezidentinə və xanımına xatirə hədiyyələri təqdim edildi.

Dövlətimizin başçısı kolxozun fəaliyyəti ilə tanış oldu, istehsal binalarına baxdı. Mədəniyyət sarayında ivanovkalıların istehsal etdikləri kənd təsərrüfatı məhsullarından ibarət sərgi ilə tanış oldu. Aleksey Kozlovtsev Prezident İlham Əliyevə məlumat verdi ki, kolxoz 1936-cı ildə yaradılıb, hazırda kəndin əhalisi 3 min nəfərdən çoxdur, onların 2250 nəfəri ruslar, 455-i ləzgilər, 324-ü azərbaycanlılardır. Kolxozun ərazisi 8497 hektardır, onun 67 hektarı dövlət mülkiyyəti, 2907 hektarı bələdiyyə mülkiyyəti, 198 hektarı həyətyanı sahə, 4715 hektarı isə özəlləşdirilmiş əkin sahəsidir. Hazırda kolxozda 2617 baş qaramal, 6233 baş davar, 1014 donuz, 2233 ev quşu var. Kolxozda bitki yağı, pendir və kərə yağı, kərpic istehsal edən sexlər, çörək-bulka sexi, iki dəyirman, asfalt zavodu fəaliyyət göstərir.

Prezident İlham Əliyev Mədəniyyət sarayının qonaq salonuna, habelə kənd klubuna da baxdı, mədəniyyət sahəsində ənənələrin qorunub saxlanmasından məmnunluq duyduğunu söylədi.

Sonra Azərbaycan Prezidenti kolxozun və İvanovka bələdiyyəsinin inzibati binaları, habelə kəndin Qonaq evi ilə tanış oldu. Məlumat verildi ki, ümummilli lider Heydər Əliyev 1981-ci ilin iyununda İvanovkada olarkən bu evdə qalmışdır. Dövlət başçısı həmin vaxt çəkilmiş və görkəmli siyasi xadimin qaldığı otaqda nümayiş etdirilən fotoşəkillərə baxdı.

Prezident İlham Əliyev Fəxri qonaqlar kitabına ürək sözlərini yazdı: “Olduqca şadam ki, İvanovka kəndində Heydər Əlirza oğlu, Zərifə Əziz qızı haqqında çox xatirələr var. İvanovkalıların mənim valideynlərimin xatirəsinə belə ehtiramla və səmimi münasibət bəsləməsini yüksək qiymətləndirirəm. Atamın işini davam etdirmək üçün, öz tərəfimdən, var qüvvə ilə səy göstərəcəyəm. İvanovkalılara və kəndin problemlərinə münasibətim Heydər Əliyevin siyasətinin davam etdirilməsidir. Mənə, ailəmə göstərilən səmimi və mehriban münasibətə görə bütün kənd camaatına təşəkkür edirəm. Bütün ivanovkalılara əmin-amanlıq və firavanlıq arzulayıram.

Hörmətlə,

Azərbaycan Prezidenti İlham Əliyev. 18 avqust 2005-ci il”.

X X X

Sonra Prezident İlham Əliyev ailə üzvləri ilə birlikdə Qonaq evində çay süfrəsinə dəvət olundu.