- Mən hesab edirəm ki, çox səmərəli müzakirə aparıldı və qarşıda duran məsələlər bir daha nəzərdən keçirildi. Azərbaycanda yeni iş yerlərinin açılması prosesi o qədər sürətlə gedir ki, iqtisadiyyatımızın bütün sahələrinə öz təsirini göstərir. Kənd təsərrüfatının inkişafı, turizmin inkişafı, xüsusilə rayonlarda bu iki istiqamətdə aparılan işlər çox sürətlə getməlidir. Bunu təmin etmək üçün, bayaq dediyim kimi, bütün infrastruktur məsələləri öz həllini tapmalıdır. 

Bu ilin və gələn ilin sonuna qədər Azərbaycanın müxtəlif yerlərində tikiləcək kiçik həcmli elektrik stansiyaları bölgələrdə enerji qıtlığını tamamilə aradan qaldırmalıdır. Mənə verilən məlumata görə, şimal bölgəsində olduğu kimi, burada da elektrik enerjisi problemi yoxdur. Amma əsas odur ki, qışda problem olmasın. Bizim əsas problemimiz qışdadır və bunu aradan qaldırmaq üçün dediyim kimi, 2006-cı ilin sonuna qədər kiçik elektrik stansiyaları tikiləcəkdir. Eyni zamanda, Bakının istilik sistemi tamamilə yenidən qurulacaqdır. Biz buna nail olsaq, həm əhalini istiliklə təmin etmiş oluruq, həm də təbii ki, elektrik enerjisinə tələbat azalacaqdır.

Dediyim kimi, gələn il büdcəmiz həm də investisiyayönümlü olacaqdır. Büdcədə infrastruktur layihələrinin həyata keçirilməsi üçün və sosial obyektlərin - məktəblərin, xəstəxanaların tikintisi, yolların salınması və başqa infrastruktur obyektlərinin tikintisi üçün böyük həcmdə vəsait nəzərdə tutulacaqdır. Azərbaycanda idman komplekslərinin tikintisi də geniş vüsət alıbdır. Milli Olimpiya Komitəsi 2000-ci ildə bu təşəbbüslə çıxış edib və ötən müddət ərzində, artıq sayını da itirdik, səhv etmirəmsə, 12 idman kompleksi yüksək səviyyədə tikilibdir. Sonuncu dəfə Şamaxıda açılışda iştirak etdik. Buraya gələrkən yoldan gördüm ki, bəli, yaxşı fəaliyyət göstərir. Qusarda da təməlqoyma mərasimini keçirdik. Ona görə bu işlər gələn il də nəzərə alınmalıdır. Mən bilirəm, hər bir rayonun əhalisi istəyir ki, o rayonda tikilsin və biz də bunu təmin etməliyik, çalışırıq. Sizin də təklifləriniz nəzərə alınacaq, nazirlik və Milli Olimpiya Komitəsi birgə baxacaqlar, ardıcıllığı da təmin edəcəklər ki, harada, nə vaxt tikilsin. Hər halda, ildə bir neçə idman kompleksi tikiləcəkdir. Biz bu məsələyə böyük diqqət göstəririk.

Vaxtilə, 1970-ci illərdə belə bir layihə var idi - Oğuz, Qəbələ zonasından Bakıya yeni su kəmərinin çəkilməsini təmin etmək. O vaxt alimlər, mütəxəssislər bu layihə üzərində çox işlədilər və faktiki olaraq, layihə icraya hazır idi. Amma Azərbaycanda 1980-ci illərin ortalarından gedən proseslər və ondan sonrakı dövrdəki xoşagəlməz proseslər, əlbəttə, imkan vermədi ki, layihə gerçəkləşsin. Ondan sonrakı illərdə də bu məsələ vaxtaşırı qaldırılırdı, amma bunu həyata keçirməyə imkanımız yox idi. Xarici maliyyə qurumlarının kreditlərinə ümid bəsləyirdik. Onlar da o qədər də böyük meyil göstərmirdi.

İndiki şəraitdə artıq bizim xarici kreditlərə çox ehtiyacımız yoxdur. Çünki bizim pulumuz var. Neft Fondunda da pul var. Valyuta ehtiyatımız da var və büdcəmiz də ildən-ilə artır. Ona görə hələ bir il bundan əvvəl hökumətin qarşısında vəzifə qoyuldu ki, bu məsələ yenidən öyrənilsin, araşdırılsın və təkliflər verilsin. Artıq 2005-ci ilin büdcəsində müəyyən işlərin görülməsi nəzərdə tutulmuşdur. Müəyyən yerlərdə quyular qazılmalıdır ki, suyun həcmi daha dəqiq bilinsin. Bu yaxınlarda “Azərsu” Səhmdar Cəmiyyəti qarşısında vəzifə qoyulub ki, tezliklə təkliflərini versin. Əgər biz bu su kəmərini tiksək, demək olar ki, Bakının su problemi tamamilə aradan qaldırıla bilər.

Bu, böyük layihədir. Tikiləcək kəmərin məsafəsi təxminən 300 kilometrdən çoxdur. Əlbəttə, böyük vəsait tələb edir, amma biz bunu etməliyik. Biz insanları narahat edən bütün məsələləri həll etməliyik, böyük diqqətlə yanaşmalıyıq. Mən fikirləşirəm ki, planlaşdırım, bəlkə bu ilin sonunda artıq əməli işlərə başlaya bilərik. 2006-2007-ci illərdə bunu başa çatdıraq. Əminəm ki, tikinti başlayacaqdır.

Əlbəttə, bu, həm də bölgədə yeni iş yerlərinin açılmasına gətirib çıxaracaq, kəmərin tikintisi ilə məşğul olan çoxsaylı insanlar işlə təmin olunacaqdır.

Bütövlükdə, bu rayonlarda gedən quruculuq-abadlıq işləri məni qane edir. Mən çox məmnunam, amma istəyirəm ki, işlər daha da sürətlə getsin. Həm inkişaf, həm də insanlara qayğı daha da artsın. Bu günlərdə təmasda olduğum insanlar çox xoş sözlərlə mənə təşəkkür edirlər ki, rayonlarda rəhbərliyin dəyişməsi nəticəsində işlər çox sürətlə getməyə başladı. Bu, çox sevindirici haldır. Çünki yerli icra hakimiyyətlərinin başçıları mənim yerlərdəki nümayəndələrimdir. Siz mənim siyasətimi burada həyata keçirirsiniz və sizin fəaliyyətinizdən çox şey asılıdır. Mən də sizə kömək edəcəyəm, sizi dəstəkləyirəm. Bu, çox vacibdir, həm də mənəvi dəstəkdir. Eyni zamanda, maliyyə dəstəyi də göstərəcəyəm və elə edəcəyəm ki, sizin işləriniz daha da sürətlə getsin.

Qarşıdan parlament seçkiləri gəlir və icra hakimiyyətlərinin başçılarından tələbim odur ki, siz bu məsələlərə müdaxilə etməyin. Seçkilər tam şəffaf, ədalətli keçməlidir. Bütün namizədlərə eyni şərait yaradılmalıdır. Seçki kampaniyası artıq başlanıbdır. İndi namizədlər öz seçiciləri ilə görüşə gələcəklər. Min nəfərdən çox namizəd qeydiyyata düşmək istəyir. Bu da özlüyündə çox böyük göstəricidir. Deməli, insanlarda inam var ki, seçkilər ədalətli keçəcəkdir. Əgər inam yox idisə, heç kim özünə bu əziyyəti verməzdi.

Sizdən tələbim budur ki, bu proseslərə müdaxilə etməyin və yerlərdə olan nümayəndələrə də deyin. Bəzi hallarda yaxşılıq etmək üçün, yaxud hansısa xidmət göstərmək üçün müdaxilələr olur, amma bunlar bizə lazım deyildir. Bu “ayı xidməti” bizə lazım deyildir. Seçkilər tam ədalətli, şəffaf keçiriləcəkdir. Mən şübhə etmirəm ki, bizim gördüyümüz işlər nəticəsində, Azərbaycanda gedən quruculuq-abadlıq işləri nəticəsində, görünən tərəqqi nəticəsində Azərbaycan seçiciləri bizim namizədlərə öz səsini verəcəkdir. Yeni Azərbaycan Partiyasının nümayəndələrinə, müstəqil nümayəndələrə, o insanlara ki, onlar öz əməli işləri ilə artıq nüfuz qazanıblar, həm də o insanlara ki, onların nəsə edəcəklərinə ümid vardır.

Bilirsiniz, boşboğazlıq dövrü Azərbaycanda artıq çoxdan keçmişdir. Sadəcə olaraq, bəzi üzdəniraq siyasətçilər bunun fərqində deyillər. Bəziləri hələ 1980-ci illərin sonlarında, 1990-cı illərin əvvəllərində baş vermiş hadisələrlə, ab-hava ilə yaşayırlar. Artıq bu, tarixdir. Özü də o qədər də xoşagəlməyən tarixdir. Bu gün Azərbaycanın qarşısında tam başqa məsələlər, məqsədlər durur. İnkişaf, dünya birliyinə inteqrasiya məsələləri, regionların inkişafı, Azərbaycanda iqtisadi potensialın güclənməsi, ordu potensialının güclənməsi, milli həmrəylik məsələləri - bizim bugünkü Azərbaycanın həyatını səciyyələndirən amillər budur. Ona görə, naftalin qoxusu gələn siyasətçilərə heç kim səs verməyəcəkdir. Mən bunu da nəzərə alıb sizdən tələb edirəm ki, heç bir namizədə heç bir çətinlik, heç bir maneçilik törədilməsin. Müxalifətdə olan adamlar nə qədər çox danışsalar, özlərini o qədər çox biabır edəcəklər. Ona görə heç bir müdaxilə olmamalıdır, seçkilər şəffaf keçirilməlidir və Azərbaycan xalqının iradəsi öz əksini tapmalıdır.

Sizə gələcək fəaliyyətinizdə uğurlar arzulayıram. Mən bir daha demək istəyirəm ki, bu dörd rayonda icra hakimiyyətlərinin başçıları, demək olar yeni təyin ediliblər. Yaxşı başlamısınız, mən razıyam. Əgər belə, mənim tələblərimə uyğun şəkildə davam etsəniz, sizi həmişə dəstəkləyəcəyəm və sizə kömək edəcəyəm. Sağ olun.