AZƏRBAYCAN RABİTƏÇİLƏRİ BÜTÜN GÖSTƏRİCİLƏR ÜZRƏ LİDERDİRLƏR
Azərbaycan rabitəçiləri işin səmərəliliyinin bütün 6 göstəricisi üzrə MDB ölkələri arasında birinci yerdədirlər. Bunu Yeni Azərbaycan Partiyası Bakı Telefon Rabitəsi İstehsalat Birliyi təşkilatının yığıncağında müəssisənin rəhbəri Məmməd Məmmədov bildirmişdir. O demişdir ki, Azərbaycan ərazisində hər bir abonent İnternetdən istifadə edə bilər. Bakı şəhəri MDB ölkələri arasında, demək olar, bütün ATS-lərin elektron sisteminə keçdiyi yeganə paytaxtdır. Azərbaycan eyni zamanda, MDB-də yeganə ölkədir ki, burada artıq neçə ildir telefon çəkilməsi üçün növbə yoxdur.
İB-nın başçısı bildirmişdir ki, Rabitə Nazirliyi sistemində orta əmək haqqı 1995-ci illə müqayisədə 2,5 dəfə artmış və hazırda 541 min manat təşkil edir. Kadr məsələsini uğurla həll etmək üçün birlik nəzdində müasir avadanlığı mənimsəyəcək mütəxəssislər hazırlamaq məqsədi ilə kurslar təşkil olunmuşdur. Rabitəçilərin bütün bu uğurları Azərbaycan Prezidenti Heydər Əliyevin həyata keçirdiyi uğurlu daxili və xarici siyasət, ölkədə aparılan islathatlar nəticəsində mümkün olmuşdur.
Yığıncaqda təşkilat məsələsinə baxılmışdır. Məmməd Məmmədov Ilk partiya təşkilatının sədri seçilmişdir. Yeni üzvlərə partiya biletləri təqdim olunmuşdur.
Bölmənin digər xəbərləri
