Bakı, 7 noyabr, AZƏRTAC

Hər bir xalqın tarixində unudulmaz hadisələr olur. Xalqımızın tarixində müstəqillik, qurtuluş və bir sıra digər tarixi günlər olsa da, bütün bu hadisələri tamamlayan, elə xalq və dövlət kimi bizi bütövləşdirən və birləşdirən Zəfər günümüz yox idi. Biz həm xalq, həm də dövlət olaraq tələsirdik, tezliklə otuz yaşımız olacaqdı ki, yarımçıq vəziyyətdə müstəqilliyimizə qovuşmuşduq, ancaq hələ də natamam, hələ də yaralı idik və qələbə üzünə həsrət idik. Beynəlxalq hüququn bizə verdiyi kağız üzərində olan yazılı və dillərdə olan şifahi vədlərdən və sözlərdən yorulmuş, usanmışdıq. Əslində, bu otuz ilə yaxın müddət bizim üçün sadəcə vaxt itkisi də deyildi. Biz bu qısa zamanda qəti qələbəmizi təmin edəcək səviyyədə inkişaf etməklə yanaşı, həm də keçmiş münaqişəyə olan beynəlxalq yanaşmanın bizə heç vaxt qəti qələbə qazandırmayacağını da anlamağa imkan tapdıq. 2020-ci il sentyabrın 27-də başlayan Vətən müharibəsi cəmi 44 gün davam etdi və əslində, bir bazar səhərində başlayan bu möhtəşəm tarix elə bir bazar günündə də üçrəngli Bayrağımızın Şuşamızda dalğalandırılması ilə yekunlaşdı.

Bu fikirləri AZƏRTAC-a açıqlamasında Siyasi və Hüquqi Araşdırmalar Mərkəzinin rəhbəri, politoloq Xəyal Bəşirov səsləndirib.

O qeyd edib ki, otuz il vəhşi, qəddar və işğalçı düşmənin tapdağı altında hər gün təhqir olunan, əzilən və öldürülən doğma torpaqlarımızın hər qarışı müqəddəs şəhidlərimizin qanı və canı ilə sanki yenidən canlandırıldı: “Sanki igid və qəhrəman əsgər və zabitlərimiz canlarını, qanlarını o torpaqların canlanması üçün qurban verməyə tələsirdilər. Bütün hadisələr o qədər sürətlə baş verdi ki, hər şey bizə yuxu kimi gəlirdi. Ancaq yuxu qədər şirin, yuxu qədər ani və yuxu qədər əlçatmaz olsa da, baş verənlərin hamısı reallıq, həqiqət idi. Artıq bütün torpaqlarımız, hətta Qarabağ da, Şuşa da, uzun illər işğal altında olan hər bir qarış torpağımız da əlçatan idi. Azərbaycan xalqı öz dövləti, onun ordusu və rəhbər sərkərdəsi ətrafında dəmir yumruq kimi birləşərək ən böyük istəyinə və arzusuna çatdı. Qələbə bizim idi və o Zəfər bizim otuzillik müstəqillik tariximizi, hətta iki əsrlik qələbəsiz tariximizi bölərək qələbəli tarixə çevirdi. Artıq ancaq bizə aid olan Zəfər günümüz var. Onu heç kim deyil, bizim özümüz öz canımız və qanımızla əldə etdik. 8 Noyabr - Zəfər Günü dünyada iki yüzə yaxın dövlət və minlərlə xalq üçün hansısa başqa bir mənanı kəsb edən və ya etməyən bir gün, sıradan bir tarix ola bilər, ancaq adında azərbaycanlı adı, qanında azərbaycanlı qanı olan hər bir şəxs üçün əbədi bir Zəfər tarixi oldu”.

Politoloq deyib ki, zəfərimizə nail olmaqla keçmiş münaqişə dövründə tam haqlı olduğumuzla yanaşı, həm də güclü olduğumuzu isbat etdik: “Biz bütün dünyaya onu da göstərdik ki, Cənubi Qafqaza “Troya atı” kimi yerləşdirilən ermənilər bütövlükdə saxta miflərdən ibarətdirlər. Onların “böyük” arzuları da, “qədim” və “mədəni” xalq olmaları da, elə “güclü orduya və sərkərdələrə” sahib olmaları da ancaq və ancaq mif olub. Erməni toplumuna rəhbərlik edənlər regiona yerləşdirildiyi bu uzun müddət ərzində xəyanətkarlıqdan, işğalçılıqdan, barbarlıqdan və saxtakarlıqdan irəli gedə bilməyiblər. Bu mifləri və böyük erməni yalanlarını 44 günlük Vətən müharibəsi günlərində müzəffər Ordumuzun uğurlu əməliyyatlarına Ali Baş Komandanlıq edən Prezident İlham Əliyev həmin günlərdə dünyanın aparıcı media qurumlarına müxtəlif dillərdə verdiyi dolğun və geniş müsahibələri ilə də tam ifşa etdi. Artıq dünyanın ən əhəmiyyətli və həssas regionlarından olan Cənubi Qafqazda dörd ildir ki, yeni reallıqlar formalaşıb və hər keçən gün o reallıqların təməli daha da möhkəmlənir və güclənir. Bu reallıqların müəllifi isə Azərbaycandır. Ölkəmiz artıq özünün qələbəsini, regiondakı dominantlığını və söz sahibi olduğunu bütün dünyaya qəbul etdirib”, - deyə X.Bəşirov diqqətə çatdırıb.