AZƏRBAYCAN RESPUBLİKASI ALİ MƏHKƏMƏSİNİN PLENUMU OLMUŞDUR
Ali Məhkəmənin sədri plenum iclasını açaraq, son illər ölkəmizdə bütün istiqamətlərdə, o cümlədən məhkəmə-hüquq sahəsində aparılan məqsədyönlü islahatlardan, həmçinin dünyada və regionda qlobal dəyişikliklərin getdiyi bir şəraitdə ədalət mühakiməsini həyata keçirmək, qanunun aliliyini təmin etmək məqsədilə məhkəmələrin qarşısında duran vəzifələrdən danışmışdır.
Plenumda, əvvəlcə “Yol hərəkəti və ya nəqliyyat vasitələrinin istismarı qaydalarının pozulmasına dair cinayət işləri üzrə məhkəmə təcrübəsi haqqında” Azərbaycan Respublikası Ali Məhkəməsi Plenumunun 2004-cü il 7 oktyabr tarixli qərarının yerinə yetirilməsi gedişi haqqında” qərar layihəsi müzakirə edilmişdir. Bu barədə Ali Məhkəmənin hakimi Rafiq Məmmədovun məruzəsi dinlənilmişdir.
Qeyd olunmuşdur ki, respublikanın məhkəmələri tərəfindən bu növ cinayət işləri əsasən qanunvericiliyin və Ali Məhkəmənin Plenumunun müvafiq qərarının tələblərinə uyğun həll edilir. Lakin ümumiləşdirmə göstərir ki, məhkəmələrin bu qəbildən olan işlər üzrə fəaliyyətində, xüsusilə cəzanın təyin edilməsində hələ də ciddi nöqsanlar mövcuddur.
Bu növ işlər üzrə şəxsin təqsirlilik məsələsi həll edilərkən yekun məhkəmə qərarlarında təqsirkarın “Yol hərəkəti haqqında” Qanunun məhz hansı normalarının tələblərini pozması, bu pozuntunun konkret olaraq nədə ifadə olunması, onun əməli ilə baş vermiş nəticə arasında səbəbli əlaqənin olub-olmaması ətraflı şərh edilmir, şəxsin hadisənin qarşısını almağa imkanının olmasına dair avtotexniki ekspertizanın rəyinə istinad edilməklə kifayətlənilir.
Çıxış edənlər vurğulamışlar ki, məhkəmələr bu qəbildən olan işlərə baxarkən hələ də yol hərəkəti və ya nəqliyyat vasitələrinin istismarı qaydalarının pozulması ilə əlaqədar cinayətlərin baş verməsinə səbəb olmuş halların və şəraitin ətraflı aydınlaşdırılmasına lazımı diqqət yetirmir, nadir hallarda bu sahədə nöqsan və çatışmazlıqların aradan qaldırılması məqsədilə xüsusi qərarlar çıxarırlar.
Plenumda Bakı şəhər Yasamal və Əzizbəyov rayon məhkəmələri sədrlərinin və Mingəçevir şəhər məhkəməsi hakiminin 2005-ci ildə baxılmış işlərə dair məlumatları dinlənilmişdir.
Bildirilmişdir ki, bu məhkəmələrdə ədalət mühakiməsi həyata keçirilərkən qanunvericiliyin tələblərinə əsasən əməl olunmuşdur. Bununla yanaşı, həmin məhkəmələr fəaliyyətlərində yekun qərarın ləğv edilməsinə və dəyişdirilməsinə səbəb olan qanun pozuntularına, iddia ərizələrinin qəbulundan əsassız imtina edilməsi hallarına yol vermiş və bəzi hallarda məhkəmə qərarlarının icrasına laqeyd münasibət göstərmişlər.
Plenumda konkret cinayət işlərinə və mülki işlərə də baxılmışdır.
Plenum müzakirə olunan məsələlər və baxılan işlər barədə müvafiq qərarlar qəbul etmişdir.
Azərbaycan Respublikası baş prokurorunun birinci müavini Rüstəm Usubov və ədliyyə nazirinin müavini Toğrul Musayev plenumun işində iştirak etmişlər.
Bölmənin digər xəbərləri
