Qeyd edilməlidir ki, bu məqsədlə son aylarda, istər respublikanın ayrı-ayrı regionlarında, istərsə də Bakı şəhərində əvvəlcədən razılaşdırılmış yerlərdə keçirilən və əksəriyyəti müxalifətin təşkil etdiyi onlarla kütləvi aksiya zamanı daxili işlər orqanları tərəfindən asayiş və ictimai qayda qorunmuş, mitinq iştirakçılarının təhlükəsizliyi təmin edilmiş və belə tədbirlərdə heç bir hüquqazidd əməl qeydə alınmamışdır.

Namizədlərə, siyasi partiyalara, siyasi partiyaların bloklarına seçkiqabağı təşviqatın aparılması məqsədi ilə təkcə Bakı şəhərində 200-dən çox yer ayrılmışdır. Eyni zamanda, onların müraciətlərinə əsasən, Bakı Şəhəri İcra Hakimiyyəti tərəfindən, daha çox seçicilərin iştirak edə biləcəyi kütləvi tədbirlər üçün paytaxtın müxtəlif yerlərində beş iri meydan da müəyyən edilmişdir.

Buna baxmayaraq, “Azaqlıq” blokuna daxil olan partiyaların rəhbərləri Azərbaycan Respublikasının “Sərbəst toplaşmaq azadlığı haqqında” qanunun və seçki məcəlləsinin tələblərinə zidd olaraq, məhz özlərinin müəyyən etdikləri, o cümlədən icra, məhkəmə və digər dövlət orqanlarının yaxınlığında, ictimai obyektlərin normal iş ahənginin, nəqliyyatın hərəkətinin, vətəndaşların təhlükəsizliyinin və konstitusion hüquqlarının pozulmasına gətirib çıxaracaq yerlərdə yürüş-mitinqlərin keçirilməsində israrlı olduqlarını bildirirlər. Onlar təhdid və hədə dolu bəyanatlarında qəsdən hakimiyyət strukturları ilə qarşıdurma yaratmaq, hər vəshlə iğtişaş törətmək, bununla da Azərbaycanın demokratik imicinə zərbə vurmaq niyyətləri güdür, cəmiyyətin ciddi etirazı ilə qarşılanan qeyri-qanuni vasitələrə əl atırlar. Bu qanunsuz hərəkətlər hakimiyyəti zorla ələ keçirmək, ölkədə və paytaxtda mövcud sabitliyi pozmaq çağırışları, eləcə də vətəndaşları qanunsuzluqlara sövq etmək kimi hüquqazidd əməllərlə müşayiət olunur.

2005-ci il sentyabrın 25-də və oktyabrın 1-də keçirilən razılaşdırılmamış belə aksiyalar da “Azadlıq” blokuna daxil olan Müsavat, Azərbaycan Xalq Cəbhəsi və Demokrat partiyalarının üzvləri, habelə onların yaxın təəssübkeşləri mövcud qanunların tələblərini pozaraq ayrı-ayrı qruplarla müxtəlif istiqamətlərdən şəhərin mərkəzinə - Bakı dəmir yolu vağzalının və metronun 28 may stansiyasının qarşısındakı Cəfər Cabbarlı meydanına toplaşmağa cəhdlər etmişlər. Onlar bu qanunsuz aksiyanın qarşısını almaq istəyən polisə müqavimət göstərmiş, zorakılıq hallarına yol vermişlər. Xidməti vəzifələrini yerinə yetirən polisin qanunauyğun tədbirləri nəticəsində asayişin kütləvi şəkildə pozulmasının qarşısı alınmışdır.

Oktyabrın 1-də keçirilmiş sonuncu qanunsuz aksiyada iştirak edən deputatlığa namizədlər Rauf Arifoğlunun, Arif Hacılının və Qabil Hüseynlinin ətrafında olan şəxslər isə əvvəlcədən hazırladıqları, kağıza bükülmüş armatur və dəmir parçaları ilə qanun keşikçilərinə hücum edərək onlara qarşı zor tətbiq etmişlər.

Qanunsuz aksiyanın fəal iştirakçılarından və təhrikçilərindən 80 nəfəri polis orqanlarına gətirilmiş, hərəkətlərində ciddi qanun pozuntuları aşkar edilməmiş böyük əksəriyyəti 1-2 saat ərzində şəxsiyyətləri müəyyən edilərək buraxılmış, 34 nəfər haqqında isə müvafiq protokol tərtib olunaraq barələrində inzibati tənbeh tədbirlərinin görülməsi təmin edilmişdir. Məhkəmələr tərəfindən onlardan 15 nəfəri 2 sutkadan 15 sutkayadək inzibati qaydada həbs olunmuş, 10 nəfəri inzibati qaydada cərimə edilmiş, 9 nəfər isə xəbərdarlıq edilərək buraxılmışdır. Hazırda qanunsuz aksiya iştirakçılarından cəmi 12 nəfəri inzibati həbsdə saxlanılır.

Qəsdən yaradılmış qarşıdurmalar zamanı bütövlükdə 24 polis əməkdaşına müxtəlif dərəcəli bədən xəsarətləri yetirilmişdir.

“Azadlıq” blokunun təşkil etdiyi yürüş-mitinqlərin məhz belə məcrada inkişafı, onların hakimiyyət orqanları ilə qarşıdurma yaratmaq niyyətini, bunu həyata keçirmək üçün konkret vəziyyətə hazır olmalarını, hətta cinayət törətməkdən belə çəkinmədiklərini bir daha təsdiqləyir.

Xüsusi qeyd edilməlidir ki, ictimai asayişin və hüquq qaydasının pozulmasına yönəlmiş qanunsuz aksiyalarda “Azadlıq” blokuna daxil olan partiyaların bir çox deputatlığa namizədləri də iştirak etmişlər.

Bununla yanaşı, həmin partiyaları təmsil edən ayrı-ayrı mətbuat orqanlarında oktyabrın 1-də keçirilmiş qanunsuz aksiyada müxalifət partiyalarının liderlərinə qarşı fiziki qüvvə tətbiq olunması, habelə döyülmələri haqqında təhrif olunmuş məlumatlar yayılır.

Əslində isə, son qanunsuz aksiyada şəxsən iştirak etməyən həmin partiyaların rəhbərlərinin fiziki təzyiqlərə məruz qalması məqsədli şəkildə uydurulmuş yalandır.

Azərbaycan Xalq Cəbhəsi Partiyasının sədri Əli Kərimlinin mühafizəçilərinin guya seçkilər ərəfəsində deputatlığa namizəd olan həmin partiya liderinə təzyiq göstərmək üçün qanunsuz həbs edilməsi ilə bağlı yayılmış məlumatlara gəldikdə isə, qeyd olunmalıdır ki, onun mühafizəçilərindən biri – Ağa İbrahimov, məhz Azərbaycan Respublikası İmişli rayon məhkəməsinin 9 sentyabr 2005-ci il tarixli qərarı ilə barəsində həbs qətimkan tədbiri seçilərək axtarışa elan edildiyi üçün tutulmuşdur. Digər mühafizəçiləri – Kərim Mehdiyev və Elmar Rüstəmov isə Ağa İbrahimovu həbs edən polis əməkdaşlarına müqavimət göstərdiklərinə görə saxlanılmış və məhkəmə tərəfindən barələrində inzibati həbs tənbeh növü tətbiq edilmişdir.

Bu gün Azərbaycan Respublikasında həyata keçirilən hüquq mühafizə siyasətinin əsasını humanizm, məsuliyyət, törədilmiş hüquqazidd əmələ görə cəzanın mütənasibliyi və ədalətliliyi təşkil edir.

Ölkədə vətəndaş qarşıdurması və iğtişaşlar törətməyə yönələn hər cür cəhdlərin qarşısı dünyanın bütün sivil dövlətlərində olduğu kimi, asayiş keşikçiləri tərəfindən qətiyyətlə alınacaqdır.

Azərbaycan Respublikasının daxili işlər orqanları əmin olduğunu bildirir ki, ölkənin hakimiyyət strukturlarının beynəlxalq hüquq prinsiplərinə söykənən obyektiv və prinsipial mövqeyi, qanunların aliliyinin, ictimai-siyasi sabitliyin dönməzliyinin qorunması naminə Konstitusiya çərçivəsində gördükləri tədbirlər həm respublika ictimaiyyəti, həm də beynəlxalq təşkilatlar tərəfindən düzgün anlaşılacaqdır.