AZƏRBAYCAN RESPUBLİKASI XARİCİ İŞLƏR NAZİRLİYİNİN BƏYANATI
Azərbaycan-NATO əməkdaşlıq münasibətləri son illərdə olduqca uğurlu inkişaf yolu keçmiş və nəticədə NATO-nun ən fəal tərəfdaşlarından biri olan Azərbaycan Respublikası bu ilin mayında təşkilatın rəhbərliyinə Fərdi Tərəfdaşıq üzrə Əməliyyat Planını da təqdim etmişdir.
Ermənistanın təlimlərin keçirilməsi nəzərdə tutulan ölkəyə - Azərbaycan Respublikasına qarşı hərbi təcavüzü nəticəsində Azərbaycan torpaqlarının 20 faizi hələ də işğal altındadır, bir milyondan çox azərbaycanlı qaçqın və köçkündür. Aparılan sülh danışıqlarında isə bu ölkənin rəhbərliyi getdikcə daha kəskin və qeyri-konstruktiv mövqe tutur. Belə şəraitdə Azərbaycan üçün erməni hərbçilərinin ölkə ərazisində keçirilən hərbi təlimlərdə iştirakı qeyri-mümkün idi.
Azərbaycan tərəfi Avratlantik dəyərlərə və prinsiplərə bağlılığını və Şimali Atlantika Alyansı ilə tərəfdaşlığını daha da dərinləşdirmək əzmini bir daha bildirir və ümid edir ki, NATO ilə Azərbaycan Respublikası arasında illərdən bəri uğurla həyata keçirilən səmərəli tərəfdaşlıq münasibətləri və əməkdaşlıq bundan sonra da dinamik surətdə inkişaf edəcəkdir.
Bölmənin digər xəbərləri
