AZƏRBAYCAN RESPUBLİKASININ PREZİDENTİ MİSİRƏ GƏLMİŞDİR
Heydər Əliyev və Azərbaycan nümayəndə heyətinin üzvləri hava limanından onlar üçün ayrılmış iqamətgaha getdilər.
Qısa istirahətdən sonra Azərbaycan Respublikasının Prezidenti BMT-nin baş katibi Butros Qali ilə görüşdü. O, Heydər Əliyevi BMT-nin inkişaf və sosial məsələlərə dair oktyabrın sonunda Kopenhagendə keçirəcəyi konfransa və BMT-nin Baş Məclisinin növbəti sessiyasında iştirak etmək üçün Nyu-Yorka dəvət etdi.
Azərbaycan Prezidenti BMT-nin baş katibinə respublikamızdakı vəziyyət, Ermənistanın ölkəmizə qarşı təcavüzünün ağır nəticələri barədə ətraflı məlumat verdi. Təhlükəsizlik Şurasının bu münaqişə ilə bağlı qəbul etdiyi dörd qətnaməyə təcavüzkarın hələ də məhəl qoymadığını xatırlatdı.
Sonra görüş təkbətək davam etdirildi. Görüşdən sonra BMT-nin baş katibi jurnalistlərin sualına cavabında dedi ki, BMT Dağlıq Qarabağ münaqişəsinin aradan qaldırılması ilə bağlı ATƏM-in fəaliyyətini yüksək qiymətləndirməklə yanaşı, öz rolunu da fəallaşdıracaq, münaqişəyə sülh yolu ilə son qoyulmasına nail olmağa çalışacaqdır. Butros Qali münazişə zonasına BMT müşahidəçilərinin göndəriləcəyini bildirdi. Baş katib Azərbaycan Prezidenti ilə söhbətinin qarşılıqlı anlaşma şəraitində keçdiyini qeyd etdi.
Sentyabrın 5-də Qahirədə BMT-nin “Dünya əhalisi və inkişaf” mövzusunda konfransı işə başladı. Konfransı BMT-nin baş katibi Butros Qali giriş sözü ilə açdı. Konfransın sədri seçilən Misir Prezidenti Hüsni Mübarək geniş nitq söylədi. Sonra çıxışlar oldu.
Konfransda əhalinin artım sürətinin tənzimlənməsi və bu sahədə birgə fəaliyyət məsələləri müzakirə edilir. Hazırda Yer kürəsində əhalinin sürətlə artması çətin problemlər doğurur. Ekspertlər belə hesab edirlər ki, əgər lazımi tədbirlər görülməsə, 2015-ci ildə Yer kürəsində əhalinin sayı 6 milyarddan çox olacaq, bu isə ciddi çətinliklər yaradacaqdır. Konfrans sentyabrın 13-dək davam edəcəkdir.
Sentyabrın 5-də axşam Azərbaycan Respublikasının Prezidenti Heydər Əliyev öz iqamətgahında Misir parlamentinin sədri Fəthi Sürur, parlamentin üzvləri, nazirlər və iri şirkətlərin rəhbərləri ilə görüşdü. Görüşü Misir-Azərbaycan dostluq cəmiyyətinin sədri, məşhur “Əbülxeyir” şirkətinin sahibi, Azərbaycanla əməkdaşlıq sahəsində konkret işlər görən Əbülxeyir açaraq nitq söylədi. Sonra Heydər Əliyev çıxış etdi.
Azərbaycan Prezidenti Misir parlamentinin başçısı ilə söhbətində ölkələrimiz arasında münasibətlərin inkişaf etdirilməsi perspektivləri nəzərdən keçirildi. Sentyabrın 5-də axşamdan xeyli keçmiş Azərbaycan dövlətinin başçısı Heydər Əliyev Misir Prezidenti Hüsni Mübarək ilə görüşmüşdür.
Aslan Aslanov
AZƏRTAC-ın xüsusi müxbiri
Qahirə
Bölmənin digər xəbərləri
