AZƏRBAYCAN SƏFİRİ PREZİDENT İLHAM ƏLİYEVİN ABŞ-A SƏFƏRİNİN NƏTİCƏLƏRİNƏ DAİR KONQRESDƏ BRİFİNQ KEÇİRMİŞDİR
Senatın və Nümayəndələr palatasının xarici əlaqələr komitələri təmsilçilərinin iştirak etdiyi bu brifinqdə Hafiz Paşayev Azərbaycan Prezidentinin ABŞ Prezidenti, vitse-prezidenti, dövlət katibi, müdafiə və ticarət nazirləri və Administrasiyanın bir sıra digər əsas üzvləri ilə keçirdiyi görüşləri iki strateji tərəfdaş arasında danışıqlar kimi səciyyələndirmişdir. Diplomat xatırlatmışdır ki, Prezident İlham Əliyev qısa səfərinin 4 saatını ancaq Konqresdə keçirərək, Amerika qanunvericiləri ilə enerji təhlükəsizliyi, İranla bağlı vəziyyət və qarşılıqlı maraq doğuran bir sıra digər məsələləri müzakirə edib.
“Fikrimcə, danışıqlarda əsas yeni məsələ Azərbaycanın dünya bazarına qaz hasilatçısı kimi daxil olmasıdır”, - deyən diplomat “Şahdəniz” qazının bu ilin sonuna qədər Avropa bazarlarına çıxarılacağını bildirmişdir: “Son hadisələr göstərdi ki, bölgəmizdə alternativ qaz təchizatçısına ehtiyac çox böyükdür. Bakı-Tbilisi-Ceyhan tam istifadəyə verildikdən sonra indi diqqəti qaz kəmərinin fəaliyyətə başlamasına keçirmək olar”.
Hafiz Paşayev bildirmişdir ki, 2003-cü ilin prezident seçkilərindən sonra Azərbaycandakı vəziyyət Amerika mediasında təhrif edilmişdi və bu səbəbdən İlham Əliyevin Birləşmiş Ştatlara səfəri təxirə salınmışdı. Lakin dövlətimizin başçısı Amerikadakı danışıqlarında ölkəmizdəki real vəziyyət, həyata keçirilən siyasi və iqtisadi islahatlar, bölgədə baş verənlərə dair Azərbaycanın mövqeyi barədə məlumatı birbaşa Amerika tərəfinə çatdırmışdır. “Artıq mən hiss edirəm ki, Amerikanın müxtəlif dairələri Azərbaycandakı vəziyyəti olduğu kimi görürlər”, - deyən diplomat əlavə etmişdir ki, demokratik islahatlar həyata keçirilmədən Azərbaycan çox şeyə nail ola bilməyəcəkdir. Bu, İlham Əliyev hakimiyyətinin mövqeyidir. Prezident İlham Əliyev Corc Buşla görüşündə də bildirmişdir ki, demokratiyanın inkişafı sahəsində ABŞ-dan alınan yardımdan razıdır və gələcəkdə birgə əməkdaşlığa ümid bəsləyir.
Vaşinqton səfəri zamanı Prezident İlham Əliyevin yaddaqalan daha bir görüşü Azərbaycanda fəaliyyət göstərən qeyri-hökumət təşkilatları nümayəndələri ilə idi. Görüşdə iştirak edən ABŞ Milli Demokratiya Fondunun təmsilçisi demişdir ki, ilk dəfədir dövlət başçısı qeyri-hökumət təşkilatlarına vaxt ayırıb onların rəyini dinləyir. Hafiz Paşayevin sözlərinə görə, görüşdən hər iki tərəf razı qalmışdır. Çünki suallara birbaşa cavablar alınmışdır.
Brifinq iştirakçıları Hafiz Paşayevə Azərbaycan Prezidenti İlham Əliyevin səfəri ilə bağlı suallar vermişlər. “Azərbaycan-Amerika əlaqələrində gələcəkdə hansı yenilik görmək istəyirsiniz?” sualına səfir belə cavab vermişdir: “13 il əvvəl görmək istədiyimi - Konqres tərəfindən Azərbaycana qarşı qəbul edilən ədalətsiz 907-ci maddənin tamamilə aradan qaldırılmasını”.
Bölmənin digər xəbərləri
