Azərbaycan Türk dünyasının bütövləşməsi prosesində lokomotiv rolunu oynayır ŞƏRH
Bakı, 7 noyabr, AZƏRTAC
Oxşar mədəni tarixi, adət-ənənəsi və kökləri olan türk dövlətlərinin başçılarının Bişkekdə bir araya gəlməsi dünya mediasının diqqət mərkəzində oldu. Noyabrın 6-da Bişkekdə Türk Dövlətləri Təşkilatı (TDT) Dövlət Başçılarının 11-ci Zirvə görüşü həqiqətən də özünün məhsuldar müzakirələri, vacib mesajları və qəbul olunan ciddi qərarları ilə yadda qaldı. Xüsusilə də Azərbaycan Prezidenti İlham Əliyevin toplantıdakı çıxışı diqqətəlayiq idi. Dövlətimizin başçısının dünyada artan təhlükələr fonunda türk dövlətlərinin müdafiə, təhlükəsizlik və müdafiə sənayesi sahələrində əməkdaşlığı daha da gücləndirməsinin vacibliyinə dair çıxışı maraqla qarşılandı. Bu il Türk Dövlətləri Təşkilatının əsasını qoymuş Naxçıvan Sazişinin 15-ci ildönümüdür. Ötən müddət ərzində təşkilat ciddi güc mərkəzinə çevrilib. İyul ayında Şuşa şəhərində keçirilmiş Dövlət başçılarının qeyri-rəsmi Zirvə görüşündə imzalanmış Qarabağ Bəyannaməsi əməkdaşlığın daha da dərinləşməsinə töhfə verdi. Türk dövlətlərinin təşkilatlanması, güc mərkəzinə çevrilməsi günümüzün tələbidir. Dünyada gedən ictimai-siyasi proseslər, münaqişə, müharibə, parçalanma və qarşıdurmalar türk dövlətləri arasında əlaqələrin gücləndirilməsini diktə edir. Türk dünyasının bütövləşməsi və Azərbaycanın bu prosesdə lokomotivlərdən biri kimi çıxış etməsi göz önündədir.
Bu sözləri AZƏRTAC-a açıqlamasında Milli Məclisin deputatı Tahir Mirkişili söyləyib.
O bildirib ki, TDT üzvü olan ölkələrin ali liderləri hər zaman haqq savaşında Azərbaycana dəstək veriblər: “İkinci Qarabağ müharibəsi dövründə Azərbaycanı tək qoymayan qardaş Türkiyə, o cümlədən Qələbə münasibətilə dövlətimizin başçısını təbrik edən, azad olmuş ərazilərdə aparılan tikinti-quruculuq işlərinə müəyyən töhfələr verən digər türkdilli qardaş ölkələrin başçılarının hər bir dəstəyi bizim üçün önəmli idi. Prezident İlham Əliyev də beynəlxalq tədbirlərdə daim türkdilli dövlətlərə dəstəyini nümayiş etdirib. İlham Əliyevin növbəti müddətə prezident seçilməsindən sonra – bu il fevralın 14-də andiçmə mərasimində çıxış edərkən “TDT bizim üçün əsas beynəlxalq təşkilatdır, çünki bu, bizim ailəmizdir. Bizim başqa ailəmiz yoxdur. Bizim ailəmiz Türk dünyasıdır” deməsi Azərbaycanın xarici siyasət strategiyasının istiqamətini göstərdi. Biz türk dövlətləri ilə əlaqələri ən yüksək formada inkişaf etdirməkdə, vahid türk ailəsinə daha da yaxın olmaqda maraqlıyıq. Azərbaycanın TDT-nin güclənməsi istiqamətində gördüyü işlər, irəli sürdüyü ideyalar və təşəbbüslər ittifaqın daha da güclənməsinə xidmət edir. Azərbaycan Orta dəhliz layihəsinin əsas vəsilələrindən biridir. Ölkəmizdə dəhlizin inkişafı və səmərəliliyi üçün öz ərazisində zəruri olan bütün infrastruktur vasitələri mövcuddur. Bakının dəstəklədiyi Orta dəhliz layihəsinin səmərəsini 1 trilyon ABŞ dollarından çox ümumi daxili məhsula malik olan türk dövlətlərinin hamısı görəcək. Bu dəhliz TDT-yə üzv dövlətlərin əksəriyyətinin yüklərinin Qərb istiqamətində daha qısa zamanda və daha ucuz çatdırılmasını təmin edir. TDT-nin qlobal güc mərkəzlərindən birinə çevrilmək potensialı mövcuddur. Prezident İlham Əliyev Bişkekdə çıxışı zamanı xoş müjdəni də verdi. Vurğuladı ki, Azərbaycan Türk Dövlətləri Təşkilatına maliyyə dəstəyi verəcək: “Türk Dövlətləri Təşkilatının mövcud büdcəsi qarşıya qoyduğumuz hədəflərin həyata keçirilməsi üçün yetərli deyildir. Ümid edirəm ki, Azərbaycanın Türk Dövlətləri Təşkilatının Katibliyinə 2 milyon və Ağsaqqallar Şurasına 100 min ABŞ dolları məbləğində maliyyə dəstəyi təşkilatın potensialının daha da güclənməsinə töhfə verəcək”.
Azərbaycan Prezidentinin də qeyd etdiyi kimi, XXI əsr Türk dünyasının inkişafı əsri olmalıdır. Azərbaycan həmişə Türk dünyasının sıx birləşməsinə öz töhfəsini verib və bundan sonra da Türk dünyasının birliyi amallarına sadiq qalacaqdır”.
Deputat qeyd edib ki, TDT-yə üzv olan dövlətlər sözdə yox, əməldə Azərbaycanın yanındadır: "Dövlətimizin başçısı Özbəkistan, Qazaxıstan, Qırğızıstan və Macarıstanın dövlət və hökumət başçılarına azad olunmuş ərazilərdə qardaşlıq hədiyyəsi olan məktəbə və yaradıcılıq mərkəzinə, eləcə də tikiləcək məktəblərə görə bir daha təşəkkürünü bildirdi. Eyni zamanda qeyd etdi ki, Azərbaycan BMT-nin iqlim dəyişikliyi ilə bağlı 29-cu Konfransı olan COP29-a ev sahibliyi edəcək. Bu qərar Azərbaycanın iqlim dəyişikliyi ilə mübarizədə oynadığı fəal rolun və beynəlxalq ictimaiyyət tərəfindən ölkənin əhəmiyyətli bir mərkəz olaraq qəbul edilməsinin göstəricisidir. COP29 Azərbaycanın bu sahədə liderlik göstərməsi və Türk Dövlətləri Təşkilatına üzv ölkələr başda olmaqla beynəlxalq tərəfdaşlarla ekoloji əməkdaşlığı dərinləşdirməsi üçün mühüm bir fürsət olacaq. Hər bir türkdilli dövlətin uğuru, güclənməsi bütün Türk dünyasının güclənməsi deməkdir”.
Bölmənin digər xəbərləri
